باس بەتجاڭالىقتارادەبيەت-كوركەمونەروقۋ-اعارتۋمادەنيەتەلەس
كوز ايىم ساتتەرەكران الەمىتاڭداپ تىڭداڭىزقازاق رەداكسياسىارناۋلى تاقىرىپايماق-وبىلىس
جاڭا حابارلار

جۇڭگو حالىق ازاتتىق ارمياسى قۇرىلعاندىعىنىڭ 90 جىلدىعىن قۇتتىقتاۋ جينالىسىندا سويلەنگەن ءسوز

    كەلۋ قاينارى: شينجياڭ گازەتى    2017-08-04 19:41:33  

(2017-جىلى 1-تامىز)
شي جينپيڭ

 جولداستار، دوستار:   
 بۇگىن ءبىز وسىندا سالتاناتتى جينالىس وتكىزىپ، جۇڭگو حالىق ازاتتىق ارمياسى قۇرىلعاندىعىنىڭ 90 جىلدىعىن قۇتتىقتاپ، جۇڭگو كوممۋنيستىك پارتياسىنىڭ باسشىلىعىنداعى حالىق ارمياسىنىڭ شۇعىلالى تاريحي بارىسىن ەسكە الىپ، مەملەكەت قورعانىسى جانە ارميانى وسىزامانداندىرۋ قۇرىلىستارىنىڭ جارقىن بولاشاعىنا كوز جىبەرىپ، بۇكىل پارتيانى، بۇكىل ارميانى جانە بۇكىل ەلدەگى ءار ۇلت حالقىن ۇزدىكسىز كۇرەس جۇرگىزىپ، مەملەكەتتى، ارميانى قۇدىرەتتەندىرۋگە كۇش توپتاپ، «قوس 100 جىلدىق» كۇرەس نىساناسىن ورىنداپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن ىسكە اسىرۋعا جۇمىلدىرىپ وتىرمىز.
  جولداستار، دوستار:
  90 جىلدىڭ الدىندا، ەلىمىز جارتىلاي وتار، جارتىلاي فەودالدىق قوعامدى باستان وتكەرىپ، جۇڭحۋا ۇلتى ەرەكشە كەدەي، ەرەكشە ءالسىز كۇيدە، ىشكى بۇلىنشىلىك پەن سىرتقى شاپقىنشىلىقتىڭ ازاپ - تاۋقىمەتىنە تەرەڭ باتىپ، جۇڭگو حالقى اش - جالاڭاشتىق جايلاعان، ەل كۇيزەلگەن قاسىرەتتى حالدە تۇرعان ەدى. ۇلتتىڭ تاۋەلسىزدىگى مەن حالىقتىڭ ازاتتىعى ءۇشىن، يمپەرياليزم، فەوداليزم، بيۋروكرات كاپيتاليزم سىندى ءۇش ۇلكەن تاۋدى اۋدارىپ تاستاۋ ءۇشىن، جۇڭگو كوممۋنيستىك پارتياسى مەن جۇڭگو حالقى قايتپاس قايسارلىقپەن جاپالى كۇرەستەر جۇرگىزدى.
  الايدا ۇلكەن توڭكەرىس شيەلەنىسە تۇسكەن ساتتە، گومينداڭ كەرتارتپاشىلارى توڭكەرىسكە، حالىققا وپاسىزدىق جاساپ، جۇڭگو كوممۋنيستىك پارتياسى مەن توڭكەرىسشىل بۇقاراعا قاندى قىلىش كوتەردى. جۇڭگو توپىراعى ءبىر مەزەت قان قاساپ استىندا قالىپ، جۇڭگو كومپارتياسى تىپ - تيپىل قۇرتىلۋعا شاق قالعان اۋىر قاتەرگە ءدوپ كەلىپ، جۇڭگو توڭكەرىسى قىسىلتاياڭ ساتكە جولىقتى. قاتال كۇرەس پەن قاندى ساباقتان پارتيامىز توڭكەرىس قارۋى بولماسا، قارۋلى كەرى توڭكەرىستى جەڭۋگە بولمايتىنىن، جۇڭگو توڭكەرىسىنە باسشىلىق ەتۋدەي ماڭىزدى مىندەتتى ارقالاي المايتىنىن، جۇڭگو توڭكەرىسىنىڭ جەڭىسىنە قول جەتكىزۋگە بولمايتىنىن، جۇڭگو حالقى مەن جۇڭحۋا ۇلتىنىڭ تاعدىرىن وزگەرتۋگە بولمايتىنىن تەرەڭ تانىپ جەتتى.
  1927 - جىلى 1 - تامىز كۇنى، نانچاڭ قامالىنان اتىلعان مىلتىق داۋىسى پارتيامىزدىڭ گومينداڭ كەرتارتپاشىلارىنا كورسەتكەن قارۋلى قارسىلىعىنىڭ شىمىلدىعىن اشتى. بۇل جۇڭگو كوممۋنيستىك پارتياسىنىڭ تاريحىنداعى ۇلى وقيعا، جۇڭگو توڭكەرىسىنىڭ تاريحىنداعى ۇلى وقيعا جانە جۇڭحۋا ۇلتىنىڭ دامۋ تاريحىنداعى ۇلى وقيعا.
  نانچاڭ قامالىنداعى مىلتىق داۋىسى تۇنگى اسپاندى نايزاعايداي ءتىلىپ ءوتتى، جۇڭگو حالقىنا قارا تۇنەكتەن توڭكەرىس ءۇمىتىن كورسەتتى، كەرى كەتكەن جاعدايدا قايراتقا كەلۋدىڭ كۇشىن كورسەتتى. نانچاڭ كوتەرىلىسى كۇزگى جيىن - تەرىن كوتەرىلىسىمەن، گۋاڭجوۋ كوتەرىلىسىمەن، سونداي - اق باسقا كوپتەگەن جەردەگى قارۋلى كوتەرىلىستەرمەن بىرگە جۇڭگو كوممۋنيستىك پارتياسىنىڭ توڭكەرىستىك سوعىسقا دەربەس باسشىلىق ەتۋىنىڭ، حالىق ارمياسىن قۇرۋىنىڭ باستاماسىن كورسەتىپ، جۇڭگو توڭكەرىسىنىڭ جاڭا ءداۋىرىن اشتى.
  سول كەزدەن باستاپ، جۇڭگو كوممۋنيستىك پارتياسىنىڭ باسشىلىعىنداعى حالىق ارمياسى جۇڭگو حالقى ءۇشىن ازاتتىققا، باقىتقا ۇمتىلۋدىڭ، جۇڭحۋا ۇلتى ءۇشىن تاۋەلسىزدىككە، كوركەيۋگە تالپىنۋدىڭ تاريحي اساۋ اعىسىنا ەرلىكپەن ات سالىسىپ، جۇڭگو حالقىنىڭ جانە جۇڭحۋا ۇلتىنىڭ تاعدىرىمەن بىتە قايناستى.
  90 جىلدان بەرى، حالىق ارمياسى قاندى مايدانداردى باستان وتكەرىپ، بەت قاراتپاس ەكپىن تانىتىپ، وتە ۇلكەن قۇرباندىق بەرىپ، شۇعىلالى جەڭىستەرگە جەتىپ، پارتيا مەن حالىققا ۇلى تاريحي ەڭبەكتەر ءسىڭىردى.   − وسى ۇلى تاريحي ەڭبەك مىنالار: قاھارمان حالىق ارمياسى پارتيانىڭ باسشىلىعىنداعى 22 جىلدىق قارۋلى توڭكەرىستىك كۇرەستە، جەڭىمپاز قاھارماندىق جىگەرمەن، مۇقالماس توڭكەرىستىك قاجىر - قايراتپەن، جاندى دا يكەمدى ستراتەگيالىق تاكتيكامەن، ەر جۇرەك، قايسار جاۋىنگەرلىك ستيلمەن ويعا ەلەستەتۋدىڭ ءوزى قيىن ءار ءتۇرلى جاپا - ماشاقات پەن قيىنشىلىقتاردى جەڭىپ، ەل ءىشى - سىرتىنداعى ەرەكشە قانقۇيلى جاۋلاردى جەر جاستاندىرىپ، جەر توڭكەرىسى سوعىسىنىڭ، جاپون شاپقىنشىلارىنا قارسى سوعىستىڭ، ازاتتىق سوعىسىنىڭ ۇلى جەڭىسىنە قول جەتكىزىپ، جۇڭگو حالقىنىڭ جەلكەسىنەن باسىپ تۇرعان ءۇش ۇلكەن تاۋدى اۋدارىپ، ىستىق قاندارى مەن ومىرلەرى ارقىلى حالىق قوجايىندىعىنداعى جاڭا جۇڭگونىڭ قۇرىلۋىنا بەرىك نەگىز قالاپ، جۇڭحۋا ۇلتىنىڭ تاياۋ زاماننان بەرگى مەشەۋلىك، تاياق جەۋ سىندى ىرىقسىز جاعدايىن تۇبەگەيلى وزگەرتتى.   − وسى ۇلى تاريحي ەڭبەك مىنالار: قاھارمان حالىق ارمياسى سوتسياليستىك توڭكەرىس پەن قۇرىلىسقا بەلسەنە ات سالىسىپ، وتاندى قورعاۋ، حالىقتىڭ بەيبىت ەڭبەگىن قورعاۋ فۋنكتسياسىن جاپپاي اتقارىپ، امەريكا جيانگەرلىگىنە قارسى تۇرىپ، چاۋشيانعا كومەك بەرۋ سوعىسىن جانە تالاي رەتكى شەكاراداعى ءوزىن قورعاۋ سوعىسىن جەڭىسپەن جۇرگىزىپ، مەملەكەتتىڭ، ارميانىڭ ايباتىن اسىرىپ، وتاننىڭ ۇلان - بايتاق شەكارا ءوڭىرىن جانە تەڭىز، اۋە كەڭىستىگىن قورعاپ، جاڭا حالىق بيلىگىن بەكەمدەۋگە، جۇڭگونىڭ ءىرى ەلدىك مارتەبەسىن قالىپتاستىرۋعا، جۇڭحۋا ۇلتىنىڭ ابىرويىن قورعاۋعا مىزعىماس قالقان ازىرلەدى.
− وسى ۇلى تاريحي ەڭبەك مىنالار: قاھارمان حالىق ارمياسى رەفورمانىڭ، ەسىك اشۋدىڭ جاڭا ۇلى توڭكەرىسىنە بەلسەنە ات سالىسىپ، مەملەكەتتىڭ رەفورما، دامۋ، ورنىقتىلىق جالپى جاعدايىنا كۇش سالا قىزمەت كورسەتىپ جانە ونى قامتاماسىز ەتىپ، شياڭگاڭنىڭ، اۋمىننىڭ قورعانىس ىستەرى قىزمەت جاۋاپكەرشىلىگىن زاڭ بويىنشا وتەپ، مەملەكەت حاۋىپسىزدىگىندە ءدوپ كەلگەن ءتۇرلى قاتەرلەرگە ءونىمدى تۇردە توتەپ بەرىپ، بارلىق فورماداعى بولشەكتەۋ، ءبۇلدىرۋ ارەكەتتەرىنە باتىل سوققى بەرىپ، شەتەلدەرمەن اسكەري بارىس - كەلىس، سەلبەستىگى جانە ب م ۇ - نىڭ بەيبىتشىلىكتى ساقتاۋ ارەكەتتەرىنە بەلسەنە ات سالىسىپ، جۇڭگو كوممۋنيستىك پارتياسىنىڭ باسشىلىعى مەن ەلىمىزدىڭ سوتسياليستىك ءتۇزىمىن قورعاۋعا، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋعا، ەلىمىزدىڭ دامۋىنىڭ ماڭىزدى ستراتەگيالىق وراي مەزگىلىن قورعاۋعا، ءوڭىر مەن دۇنيە ءجۇزىنىڭ بەيبىتشىلىگىن قورعاۋعا قۇدىرەتتى كۇش - تىرەك ازىرلەدى.
 حالىق ارمياسى قۇرىلعاننان بەرى، پارتيا مەن حالىق ىستەرىنىڭ دامۋ اياق الىسىنا ىلەسىپ، شايقاستاردا ەسەيىپ، مۇراگەرلىك ەتە ءجۇرىپ جاڭالىق اشىپ، قۇرىلىس بارىسىندا دامىپ، توڭكەرىستەنۋ، وسىزاماندانۋ، مۋنتيزمدەنۋ دەڭگەيى ۇزدىكسىز ءوستى، سەس كورسەتۋ، ناقتى سوعىس قابىلەتى ۇزدىكسىز ارتتى. حالىق ارمياسى وتكەندەگى ءبىر عانا ارميا ءتۇرى بار ارميادان كوپتەگەن ارميا، اسكەر ءتۇرى بار قۇدىرەتتى ارمياعا، وتكەندەگى «سوك پەن مىلتىققا» سۇيەنگەن ارميادان دامىپ، ماشينالاندىرۋدى نەگىزىنەن ىسكە اسىرعان، ينفورماتسيالانۋعا جەدەل قادام تاستاعان قۇدىرەتتى ارمياعا اينالدى.
  جولداستار، دوستار!
  90 جىلدان بەرى، ءبىزدىڭ مەملەكەتىمىز بەن ۇلتىمىز اۋىر سىننان وتسە دە ەڭسەسىن تىك ۇستاپ، قايعى - قاسىرەت كورسە دە داڭق قۇشىپ، بۇرىن بولماعان تاريحي وزگەرىسكە قولى جەتىپ، ەڭسە كوتەرۋدەن داۋلەت قۇراۋعا، ونان قۇدىرەت تابۋعا دەيىنگى ۇلى سەكىرىستى ىسكە اسىردى. بۇل جۇڭگو كوممۋنيستىك پارتياسىنىڭ پارمەندى باسشىلىعىنىڭ جەڭىسى، جۇڭگو حالقىنىڭ قاجىماي - تالماي كۇرەس جاساۋىنىڭ جەڭىسى جانە حالىق ارمياسىنىڭ ەرلىككە تولى شايقاستارىنىڭ جەڭىسى.
  وسى داڭقتى جانە سالتاناتتى ساتتەردە، ءبىز حالىق ارمياسىن قۇرعان جانە جەتىلدىرگەن ماۋ زىدۇڭ، جوۋ ىنلاي، ليۋ شاۋچي، جۋ دى، دىڭ شياۋپيڭ جولداستاردى جانە پىڭ دىحۋاي، ليۋ بوچىڭ، حى لۇڭ، چىن ي، لو رۇڭحۋان، شۇي شياڭچيان، نيە رۇڭجىن، يە جيانيىڭ جولداستار سياقتى اعا بۋىن توڭكەرىسشىلەر مەن اسكەري مامانداردى تەرەڭ ساعىنىشپەن ەسكە الامىز. ولاردىڭ ۇلى ەڭبەكتەرى جۇڭحۋا ۇلتىنىڭ تاريحىنا ماڭگى جازىلادى!   وسى داڭقتى ءارى سالتاناتتى ساتتەردە، ءبىز حالىق ارمياسىنان جۇڭگو حالقىنىڭ ازاتتىق ىستەرى مەن سوتسياليستىك قۇرىلىس ىستەرى جولىندا ەرلىكپەن جان قيعان توڭكەرىستىك قۇربانداردى تەرەڭ ساعىنىشپەن ەسكە الامىز. ولاردىڭ بەرگەن قۇرباندىعى مەن قوسقان ۇلەسى جۇڭگو حالقىنىڭ جۇرەگىندە ماڭگى ساقتالادى!
  وسى ارادا، مەن پارتيا ورتالىق كوميتەتى، مەملەكەتتىك كەڭەس جانە ورتالىق اسكەري ىستەر كوميتەتى اتىنان وتاندى قورعاۋدىڭ، وتاندى كوركەيتۋدىڭ ءارقايسى قىزمەت ورنىندا كۇرەس جۇرگىزىپ جاتقان حالىق ازاتتىق ارمياسىنىڭ كوماندير - جاۋىنگەرلەرىنىڭ، قارۋلى ساقشى بولىمدەرىنىڭ كوماندير - جاۋىنگەرلەرىنىڭ، زاپاستاعى اسكەريلەردىڭ جانە قالىڭ حالىق جاساعىنىڭ مەرەكەسىنە قۇتتى بولسىن ايتامىن! حالىق ارمياسىنان جۇڭگونىڭ توڭكەرىس، قۇرىلىس، رەفورما ىستەرىنە ەلەۋلى ۇلەس قوسىپ، دەمالىسقا، زەينەتكە شىققان قارت جولداستارعا شىن جۇرەكتەن سالەم جولدايمىن! ءار كەزەڭدە حالىق ارمياسىنىڭ قۇرىلىسىنا سۇبەلى ۇلەس قوسىپ كاسىپ اۋىستىرعان، قوسىننان شەگىنگەن اسكەريلەردەن، توڭكەرىستىك مۇگەدەك اسكەريلەردەن جانە قۇربانداردىڭ ءۇي ىشىندەگىلەردەن شىنايى حال سۇرايمىن! قورعانىس عىلىم - تەحنيكاسى جانە قورعانىس ونەركاسىبى شەبىندە قايسارلىقپەن كۇرەس جۇرگىزىپ جاتقان عالىمدارعا، ينجەنەر - تەحنيكالىق قىزمەتكەرلەرگە جانە قالىڭ كادرلارعا، جۇمىسشى - قىزمەتشىلەرگە شىن جۇرەكتەن العىس ايتامىن! ۇزاق مەزگىلدەن بەرى حالىق ازاتتىق ارمياسىنىڭ قۇرىلىسىنا كوڭىل ءبولىپ، قولداۋ كورسەتىپ كەلگەن بۇكىل ەلدەگى ءار ۇلت حالقىنا ايرىقشا قۇرمەت بىلدىرەمىن!
  جولداستار، دوستار!
  90 جىلدان بەرى، ۇزاق ۋاقىتتىق اماليات بارىسىندا حالىق ارمياسى پارتيا تۋى استىندا العا ىلگەرىلەپ، ارميانى قۇرۋدىڭ، ارميانى جونگە سالۋدىڭ جۇيەلى پرينسيپتەرىن قالىپتاستىرىپ، حالىقتىق سوعىستىڭ ستراتەگيا - تاكتيكالارىن دامىتىپ، وزگەشە داڭقتى ءداستۇر مەن تاڭداۋلى ستيلدى جەتىلدىردى. بۇل حالىق ارمياسىن جەڭىستەن - جەڭىسكە جەتكىزگەن اسىل جاۋھار، حالىق ارمياسى ماڭگىلىك ەستە ساقتاۋعا ءتيىستى توڭكەرىستىك رۋح. − حالىق ارمياسىنىڭ جەڭىستەن - جەڭىسكە جەتۋى جۇڭگو كوممۋنيستىك پارتياسى باسشىلىعىنىڭ ۇلى كۇشىن ايگىلەدى. ماۋ زىدۇڭ جولداس كەزىندە «ءبىزدىڭ پرينسيبىمىز − مىلتىققا پارتيا قولباسشىلىق ەتۋ، ال پارتياعا مىلتىقتىڭ قولباسشىلىق ەتۋىنە استە جول بەرمەۋ» دەپ اتاپ كورسەتكەن. پارتيانىڭ ارمياعا ابسوليۋتتى باسشىلىعىنىڭ ءتۇبىرلى پرينسيبى مەن ءتۇزىمى نانچاڭ كوتەرىلىسىنەن باستاۋ الىپ، سانۋانداعى قايتا قۇرۋدا نەگىزى قالانىپ، گۋتيان ماجىلىسىندە تۇراقتانعان، بۇل حالىق ارمياسىن وزىنە دەيىنگى بارلىق كونە ارميالاردان پارىقتاندىرىپ تۇراتىن ساياسي وزگەشەلىك پەن تۇبەگەيلى ارتىقشىلىق بولاتىن. سانسىزداعان توڭكەرىس ساردار - ساربازدارى بۇلجىماستان پارتيانىڭ سوزىنە قۇلاق اسىپ، پارتياعا ءجىتى ىلەسىپ، ساتسىزدىككە تاپ بولسا دا ەڭسەسىن تىك ۇستاپ، اۋىر كۇندەردە تايسالماي العا باسىپ، سۋعا سالسا باتپايتىن، وتقا سالسا جانبايتىن، المايتىن قامالى، جەڭبەيتىن دۇشپانى جوق بولاتتاي بەرىك قۋاتتى ارميا بولىپ ۇيىمداستى. بوران - شاشىندى سالقار توڭكەرىس جولىندا، ءبىزدىڭ ساردار - ساربازدارىمىز «پارتياعا ىلەسسەك، ءسوز جوق، جەڭىسكە جەتەمىز» دەگەن ءسوزدى اۋزىنان تاستامادى. ادالدىق حالىق ارمياسىنىڭ پارتياعا دەگەن قالتقىسىز ادالدىعىن سومدادى، حالىق ارمياسى مەن حالىقتىڭ بالىق پەن سۋداي ەتەنە بايلانىسىن سومدادى، حالىق ارمياسىنىڭ پارتيا مەن حالىق ءۇشىن تولارساقتان قان كەشەتىن مىعىم ەركىن سومدادى.
 تاريح بىزگە مىنانى ۇعىندىردى: مىلتىققا پارتيا قولباسشىلىق ەتۋ − حالىق ارمياسىنىڭ قاسيەتى مەن باستى ماقساتىن ساقتاۋدىڭ ءتۇبىرلى كەپىلى، بۇل پارتيامىز قاندى مايدان، قاتاڭ كۇرەستە كوز جەتكىزگەن بۇلجىماس اقيقات. جۇڭگو كوممۋنيستىك پارتياسى جانە جۇڭگو كوممۋنيستىك پارتياسىنىڭ پارمەندى باسشىلىعى بولعاندىقتان عانا، حالىق ارمياسى العا باسۋ جولىندا باعدار تاۋىپ، كۇش - قۋاتقا يە بولدى. العا باسۋ جولىندا حالىق ارمياسى، ءسوز جوق، پارتيانىڭ ارمياعا ابسوليۋتتى باسشىلىعىنان اۋىتقىماۋى، ونى حالىق ارمياسىنىڭ ماڭگى وزگەرمەيتىن رۋحى، ماڭگى كوزدەن تاسا قىلمايتىن جان تامىرى دەپ ءبىلىپ، ءارقانداي ۋاقىت، ءارقانداي جاعدايدا پارتيانىڭ تۋىن تۋ، پارتيانىڭ باعىتىن باعىت، پارتيانىڭ ەركىن ەرىك ساناۋى كەرەك.
  − حالىق ارمياسىنىڭ جەڭىستەن - جەڭىسكە جەتۋى مۇرات پەن سەنىمنىڭ ۇلى كۇشىن ايگىلەدى. بيىك مۇرات، بەرىك سەنىم − جۇڭگو كوممۋنيستەرىنىڭ ساياسي جانى، حالىق ارمياسىنىڭ رۋحاني تىرەگى. دىڭ شياۋپيڭ جولداس كەزىندە «نە ءۇشىن ءبىز وتكەندەگى وتە اۋىر جاعدايدا دا كۇرەستەن قاجىماي، سانسىز قيىندىقتاردى جەڭىپ، توڭكەرىستى جەڭىسكە جەتكىزە الدىق، ونىڭ سەبەبى بىزدە مۇرات بولدى، ماركسيزمگە، كوممۋنيزمگە دەگەن سەنىم بولدى» دەپ اتاپ كورسەتكەن بولاتىن. جيڭگاڭشانداعى جاپالى دا ناتيجەلى كۇرەستەن قيىندىق پەن قاتەرگە تولى ۇزاق جورىق جولىنا دەيىن، جاپون شاپقىنشىلارىنا قارسى قاندى سوعىستان كونەنى تالقانداپ، جاڭانى ورناتقان ازاتتىق سوعىسىنا دەيىن، مەملەكەتتىڭ يەلىك ۇقىعىن، حاۋىپسىزدىگىن، تەرريتوريا تۇتاستىعىن باتىل قورعاۋ جولىنداعى ەرلىك كۇرەستەن اپاتتان ارالاشاپ، حالىقتىڭ ءومىرى مەن مال - مۇلكىنىڭ حاۋىپسىزدىگىن قورعاۋ جولىنداعى جان كەشتى كۇرەسكە دەيىن، مەملەكەتتىڭ ەكونوميكالىق، قوعامدىق قۇرىلىسىنا جاسالعان قالتقىسىز كومەكتەن ءوڭىر مەن دۇنيە ءجۇزىنىڭ بەيبىتشىلىگىن قورعاۋ جولىنداعى ناقتى ارەكەتكە دەيىن، بيىك مۇرات، بەرىك سەنىمنىڭ شام - شىراعى حالىق ارمياسىن ۇدەرە العا تارتۋعا باستاپ وتىردى.
  تاريح بىزگە مىنانى ۇعىندىردى: توڭكەرىستىك مۇرات − اسپاننان دا بيىك، حالىق ارمياسىنىڭ قيىندىقتارعا بوگەلمەي، كەز كەلگەن جاۋدى جەڭىپ، دامىپ، ىرگەلەنۋى، تۇپتەپ كەلگەندە، حالىق ارمياسىنىڭ ماركسيزممەن قارۋلانعاندىعىنىڭ، بيىك مۇرات - سەنىم ۇستانعانىنىڭ، مۇرات - سەنىم جولىندا ەرلىكپەن ۇلەس قوسۋعا بەل بۋعان اسقاق تالپىنىسىنىڭ بولعاندىعىنىڭ ارقاسى. بيىك مۇرات - سەنىم − حالىق ارمياسىن ەرلىكپەن العا باستىراتىن رۋحاني كۇش، بۇكىل ارمياداعى ساردار - ساربازداردىڭ جۇرەگىندە مازداعان جارىق الاۋ. العا باسۋ جولىندا حالىق ارمياسى، ءسوز جوق، بيىك مۇرات - سەنىمگە بۇلجىماستان تاباندى بولىپ، ءارقانداي كەزدە، ءارقانداي جاعدايدا بيىك مۇرات - سەنىم جولىندا جان قيارلىقپەن كۇرەس جۇرگىزۋى كەرەك.
  − حالىق ارمياسىنىڭ جەڭىستەن - جەڭىسكە جەتۋى رەفورما جاساۋ مەن جاڭالىق اشۋدىڭ ۇلى كۇشىن ايگىلەدى. حالىق ارمياسىنىڭ جەتىلۋ، دامۋ تاريحى − رەفورما جاساۋ، جاڭالىق اشۋ تاريحى. جەر توڭكەرىسى سوعىسى جىلدارىندا ارميا قۇرۋدىڭ جۇيەلى پرينسيپتىك ءتۇزىمى العا قويىلدى، جاپون شاپقىنشىلارىنا قارسى سوعىس مەزگىلىندە اسكەردى سۇرىپتاپ، ۇكىمەت ورىندارىن ىقشامداۋ جولعا قويىلدى، ازاتتىق سوعىسى مەزگىلىندە، 5 ءىرى دالا ارمياسى ۇيىمداستىرىلدى. جاڭا جۇڭگو قۇرىلعاننان كەيىن، ءتۇزىلىس پەن شتات كوپ مارتە رەتتەلدى، حالىق ارمياسى سوعىسا ءجۇرىپ وزگەرىس جاسادى، قۇرا ءجۇرىپ وزگەرىس جاسادى، وزگەرتكەن سايىن قۇدىرەتتەنە ءتۇستى. قىزىل ارميا كەزىندەگى «ون التى تاڭبالى امالدان» جاپون شاپقىنشىلارىنا قارسى سوعىس مەزگىلىندەگى «ۇزاققا سوزىلاتىن سوعىسقا» دەيىن، ازاتتىق سوعىسى مەزگىلىندەگى «ون ءىرى اسكەري پرينسيپتەن» امەريكا جيانگەرلىگىنە قارسى تۇرىپ، چاۋشيانعا كومەكتەسۋ سوعىسى مەزگىلىندەگى «جابىسپاق كامپيتتى ونان - مۇنان مۇجۋعا» دەيىن، ونان جاڭا جۇڭگو قۇرىلعاننان كەيىنگى اسكەري - ستراتەگيالىق باعىتتاردىڭ ۇزبەي رەتتەلۋىنە دەيىن، حالىق ارمياسى سوعىستىڭ جاي - جاپسارىن سوعىسا ءجۇرىپ ۇيرەنىپ، اماليات بارىسىنان زاڭدىلىقتاردى قاراستىرىپ، الەمنىڭ اسكەري تاريحىنا سوعىس ونەرىنىڭ ۇزبەي جاڭالانۋىنىڭ جاندى مىسالدارىن جازدى.   تاريح بىزگە مىنانى ۇعىندىردى: رەفورما، جاڭالىق اشۋ، داۋىرمەن بىرگە العا باسۋ − حالىق ارمياسىنىڭ ۇزدىكسىز دامۋىنداعى داڭعىل جول، حالىق ارمياسىنىڭ كۇشى رەفورمادان، جاڭالىق اشۋدان كەلگەن، حالىق ارمياسىنىڭ جەڭىسى رەفورمادان، جاڭالىق اشۋدان كەلگەن. تەك ۇزدىكسىز رەفورما جاساپ، جاڭالىق اشقاندا عانا، دامۋ اياق الىسىنىڭ جاندى ومىرشەڭدىك كۇشىنە ۇزدىكسىز قول جەتكىزە الامىز، ماڭگى جەڭىمپاز بولا الامىز. العا باسۋ جولىندا حالىق ارمياسى، ءسوز جوق، باتىلدىقپەن رەفورما جاساپ، جاڭالىق اشۋعا شەبەر بولىپ، ءارقانداي كەزدە، ءارقانداي جاعدايدا ماڭگى توقىراماۋى، ماڭگى توقتاماۋى كەرەك.
− حالىق ارمياسى جەڭىستەن - جەڭىسكە جەتۋدە جاۋىنگەرلىك رۋحتىڭ ۇلى كۇشىن ايگىلەدى. باتىلدىقپەن كۇرەس جاساپ، جەڭىسكە جەتىپ، بىرىنشىدەن، جاپادان قورىقپاۋ، ەكىنشىدەن، ولىمنەن قورىقپاۋ − حالىق ارمياسىنىڭ جالىنى مەن جىگەرىنىڭ جاندى كارتيناسى. «لاڭياشانداعى 5 باتىر»، «قويان - قولتىق سايىسقان ەر جۇرەكتەر روتاسى»، «ليۋ لاۋجۋاڭ روتاسى»، دۇڭ سۇنرۇي، چيۋ شاۋيۇن، حۋاڭ جيگۋاڭ سياقتى سانسىزداعان ەر جۇرەكتەر توبى جانە توڭكەرىستىك قاھارماندار ىستىق قانى ارقىلى العان بەتىنەن قايتپايتىن باتىرلىق قاسيەتىن ايگىلەدى. وق بوراعان شايقاس مايدانىندا، ورەكپىگەن كۇشتى جاۋلار الدىندا حالىق ارمياسى «ۇشكە سەنبەۋ»، ياعني توڭكەرىستىك جاۋىنگەرلەرىنىڭ الدىندا ورىنداي المايتىن مىندەتى بولۋىنا سەنبەۋ، جەڭە المايتىن قيىنشىلىق بولۋىنا سەنبەۋ، جەڭە المايتىن جاۋ بولۋىنا سەنبەۋ قاھارماندىق جارناماسىن جاريالادى. ەرجۇرەكتىكپەن قايسارلىق كورسەتىپ، ولىمنەن جاسقانباي، سوڭىنا دەيىن قاندى شايقاس جۇرگىزدى، حالىق ارمياسى تايسالماس ارىنىمەن پارتيانىڭ سەنىمىنە، حالىقتىڭ القاۋىنا ءارى دۇنيە ءجۇزىنىڭ قۇرمەتىنە بولەندى.
 تاريح بىزگە مىنانى ۇعىندىردى: سوعىس − ماتەريالدىق بەلدەسۋ عانا ەمەس، ونان دا ماڭىزدىسى، رۋحاني كۇرەس. قايسار قايرات بولماسا، قۇربان بەرۋگە باتىلدىق ەتەتىن قاسيەت بولمايدى، قانشا وزىق قارۋ - جاراق تا جەڭىسكە كەپىلدىك ەتە المايدى. نەشە ۇرپاق توڭكەرىستىك اسكەريلەر ولىمنەن تايسالمايتىن ەرلىككە تولى بۇلجىماس بەكىمگە سۇيەنىپ، ءارقانداي جاۋعا استە باعىنبايتىن، قايتا جاۋ اتاۋلىنى باسىپ تۇسەتىن ۇلى ارىن قالىپتاستىردى. العا باسۋ جولىندا حالىق ارمياسى، ءسوز جوق، باتىلدىقپەن شايقاس جاساپ، ءسوزسىز، جەڭىسكە جەتەتىن رۋحاني قاسيەتىن بارىنشا ساۋلەلەندىرىپ، ءارقانداي كەزدە، ءارقانداي جاعدايدا توڭكەرىستىك قاھارماندىق اسقاق جىگەرىن ساقتاۋى كەرەك.
  − حالىق ارمياسىنىڭ جەڭىستەن - جەڭىسكە جەتۋى توڭكەرىستىك ءتارتىپتىڭ ۇلى كۇشىن ايگىلەدى. حالىق ارمياسى ءتارتىبىنىڭ قاتالدىعىمەن بارشاعا ايگىلى، قۇرىلعان كۇننەن تارتىپ، توڭكەرىستىڭ بەكەمدىگىن، ساياسيدىڭ سانالىلىعىن، ءتارتىپتىڭ قاتالدىعىن ءوزارا بىرلەستىرىپ، بىردەي جىگەر، ءبىر تۇتاس قولباسشىلىق، بىردەي ارەكەتتە بولىپ، جەر قايىسقان قالىڭ قول بۇيرىق بويىنشا قيمىلداپ، تيداۋ سالعاننان تيىلىپ، شايقاستا ازۋلى ارىستانداي، قورعانىستا تايشانداي بەرىك بولدى. وسكەلەڭ ساياسي سانا نەگىزىندە قۇرىلعان توڭكەرىستىك ءتارتىپ بولعاندىقتان، ساردار - ساربازداردى اشتىق پەن اياز مەڭدەتسە دە، بۇقارانىڭ ينە ساباق جىبىنە تيىسپەدى؛ جالاڭداعان وت جالىنى جانىن جالماۋعا اينالسا دا، قايىسپاستان باسىن ءباي تىگۋگە دەيىن باردى؛ قيىن - قىسپاقتا قالسا دا، سوعىس مايدانىنان تاپجىلمادى، ءتىپتى ءومىرىن ارنادى. حالىق ارمياسى قاشاندا وسكەلەڭ ىنتىماقتى، ءبىر تۇتاستىلىقتى ساقتايتىن كۇرەسكەر كوللەكتيۆ، ول قۇدىرەتتى ۇيىسقىشتىعى مەن جاۋىنگەرلىك قۋاتىن باستان - اقىر ساقتادى.
  تاريح بىزگە مىنانى ۇعىندىردى: تارتىپشەڭدىك كۇشەيسە، توڭكەرىس جەڭىسكە جەتپەي قويمايدى. ارميانىڭ كۇشىن باعالاۋدا ونىڭ ادام سانىنا، قارۋ - جاراق، جابدىقتارىنا قاراپ عانا قالماستان، ونىڭ تارتىپشەڭدىگىنە دە قاراۋ كەرەك. ءتارتىبى جوق ارميا − دارمەنسىز توبىر عانا. العا باسۋ جولىندا حالىق ارمياسى، ءسوز جوق، بولاتتاي بەرىك ءتارتىپ ارقىلى قۇرىشتاي ەرىك - جىگەر تۇلعالاپ، قۇرىشتاي ستيل سومداپ، قۇرىشتاي قوسىن شىڭداپ، ءارقانداي كەزدە، ءارقانداي جاعدايدا بارلىق ارەكەتتە قولباسشىلىققا بويسۇنۋى، اياق الىستى بىرلىككە كەلتىرىپ، العا باسۋى كەرەك.
  − حالىق ارمياسىنىڭ جەڭىستەن - جەڭىسكە جەتۋى ارميا مەن حالىق ىنتىماعىنىڭ ۇلى كۇشىن ايگىلەدى. حالىق ارمياسى قاشاندا حالىق بۇقاراسىمەن تىنىستاس، تاعدىرلاس، جۇرەكتەس بولىپ، حالىق ءۇشىن تۇبەگەيلى كۇرەس جاساپ، جاۋ قايدا، قيىنشىلىق قايدا بولسا، حالىقتىڭ پەرزەنت اسكەرلەرى سوندا بولدى. كىم حالىقتى كوكەيىندە ساقتاسا، حالىق سول ادامدى جۇرەك تۇكپىرىندە ساقتادى. «ەڭ سوڭعى ءبىر شىنى استىقتى ارمياعا اتادىم، ەڭ سوڭعى ءبىر كەز كەزدەمەدەن اسكەري كيىم تىكتىم، زۋزاعا جاپتىم ەڭ سوڭعى ماقتالى شاپاندى، مايدانعا مەن جىبەردىم ەڭ سوڭعى ءبىر بالامدى». سوعىس جىلدارىندا كەڭىنەن تاراعان وسى حالىق جىرى ارميا مەن حالىقتىڭ توننىڭ ىشكى باۋىنداي تاتۋلىعىنىڭ جاندى بەينەسى.
  تاريح بىزگە مىنانى ۇعىندىردى: حالىق تىلەگىنە بەيىمدەلگەندە، حالىق رايىن تياناق ەتكەندە، حالىق كۇشىن ۇيىستىرعاندا حالىق ارمياسى جەڭىسكە جەتپەي قويمايدى، الەمدە تەڭ كەلەتىن جاۋى دا بولمايدى. قاشاندا حالىقتىڭ تۇرعىسىندا تۇرىپ، قالىڭ حالىقتىڭ شىنايى قولداۋىنا يە بولعاندا عانا، ەل بىرلىگى بەرىك قامال بولعان قۇرىش قورعان سوعا الامىز. العا باسۋ جولىندا حالىق ارمياسى، ءسوز جوق، بۇكىل ىنتا - پەيىلىمەن حالىق ءۇشىن قىزمەت ىستەۋدەي ءتۇبىرلى ماقساتتى ەستە بەرىك ساقتاپ، ءارقانداي كەزدە، ءارقانداي جاعدايدا حالىقتىڭ پەرزەنت اسكەرى بولۋى كەرەك.
  جولداستار، دوستار!
  حالىق ارمياسىنىڭ شۇعىلالى تاريحى قىزىل قان، قىرشىن جاننان قالىپتاسقان، ماڭگى ءبىزدىڭ ەسىمىزدە ساقتالۋعا ءتيىستى. حالىق ارمياسىنىڭ تاريحي تاجىريبەلەرىنە جاپالى ىزدەنىستەر ارقىلى قول جەتكەن، ءبىزدىڭ ماڭگى اسقاقتاتۋىمىزدى قاجەت ەتەدى. حالىق ارمياسىنىڭ تاريحي دامۋى ادالدىق پەن مىندەتكەرلىكتى قوزعاۋشى كۇش ەتكەن، ءبىزدى ماڭگى العا باسۋعا ىنتالاندىرادى.
پارتيا 18 - قۇرىلتايىنان بەرى، ءبىز «قوس 100 جىلدىق» كۇرەس نىساناسىن جۇزەگە اسىرۋدى، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋدى كوزدەپ، پارتيانىڭ قولباسشىلىعىنا قۇلاق اساتىن، جەڭىستى سوعىس جۇرگىزە الاتىن، ستيلى تاماشا حالىق ارمياسىن قۇرۋ سىندى پارتيانىڭ جاڭا جاعدايداعى ارميانى قۇدىرەتتەندىرۋ نىساناسىن ورتاعا قويىپ، اسكەري ىستەر ستراتەگياسىنا داۋىرگە ىلەسە جاڭالىق اشۋ ارقىلى جەتەكشىلىك ەتىپ، جاڭا جاعدايداعى اسكەري ىستەر ستراتەگيالىق باعىتىن بەلگىلەدىك. ءبىز گۋتياندا بۇكىل ارميا بويىنشا ساياسي قىزمەت ءماجىلىسىن اشىپ، ساياسيدى باسشىلىققا الىپ ارميا قۇرۋدى بارىنشا كۇشەيتىپ، پارتيا ستيلى، پاكتىك قۇرىلىسى جانە جەمقورلىققا قارسى تۇرۋ كۇرەسىن مىزعىماي ورىستەتتىك. ءبىز مەملەكەت قورعانىسى مەن ارميا رەفورماسىن جاپپاي تەرەڭدەتۋدى ىلگەرىلەتىپ، اسكەري كوميتەت جالپى جاقتان باسقارۋ، سوعىس رايونى شايقاسقا جاۋاپتى بولۋ، ارميا تۇرلەرى قۇرىلىستى نەگىز ەتۋ سىندى جاڭا جاعداي قالىپتاستىرىپ، حالىق ارمياسىنىڭ ۇيىمدىق فورماتسياسىن جالپى بەتتىك جاڭالاپ، جۇڭگوشا ەرەكشەلىككە يە اسكەري قۋات جۇيەسىن قۇرۋدىڭ تاريحي باسقىشىنا قادام تاستادىق، حالىق ارمياسىنىڭ ءتۇزىلىسى، قۇرىلىمى، جۇلگەسى، بەت - بەينەسى شىت جاڭا بەينەگە ەندى. ءبىز ارميانى زاڭ بويىنشا جونگە سالۋ، ارميانى قاتاڭ جونگە سالۋدا تاباندى بولىپ، ارميانى جونگە سالۋدىڭ ۇلگىسىنە تۇبەگەيلى وزگەرىس جاساۋدى ىلگەرىلەتتىك. ءبىز جاۋىنگەرلىك قۋات سىندى وسى بىردەن - ءبىر ولشەمدە تاباندى بولىپ، اسكەردى جاتتىقتىرىپ، سوعىسقا دايىندالۋدى ىشكەرىلەي ىلگەرىلەتىپ، مەملەكەت تەرريتورياسىنىڭ يەلىك ۇقىعى مەن تەڭىز - مۇحيتىنىڭ ۇقىق - مۇددەسىن باتىل قورعادىق. ءبىز جاڭا دامۋ ۇستانىمىن ىشكەرىلەي دايەكتىلەندىرىپ، نازاردى ناقتى سوعىس جۇرگىزۋگە بارىنشا شوعىرلاندىرىپ، جاڭالىق اشۋ ارقىلى دامۋدى ىلگەرىلەتۋگە، جۇيە قۇرىلىسىنا، شوعىرلى، جوعارى ءونىمدى بولۋعا، ارميا مەن حالىقتى توعىستىرۋعا بارىنشا ءمان بەرىپ، حالىق ارمياسى قۇرىلىسىنىڭ ساپاسى مەن ونىمدىلىگىن ۇزبەي جوعارىلاتتىق.
 5 جىلدىق قۇلشىنىس ارقىلى حالىق ارمياسى ساياسي ەكولوگيانى جاڭالاۋدى، ۇيىمدىق فورماتسيانى جاڭالاۋدى، كۇش جۇيەسىن جاڭالاۋدى، ستيل وبرازىن جاڭالاۋدى جۇزەگە اسىردى، حالىق ارمياسى قايتالاي جاساقتالىپ، تاعى دا جورىققا اتتانىپ، ارميانى قۇدىرەتتەندىرۋدىڭ جۇڭگوشا جولىندا نىق قادام باستى.
  جولداستار، دوستار!
  تاريح تەگەرشىگى توقتاۋسىز العا ىلگەرىلەيدى. بۇگىنگى الەمدە حالىقارالىق جاعدايدا بۇرىندى - سوڭدى بولىپ كورىلمەگەن زور وزگەرىستەر تۋىلۋدا. بۇگىنگى جۇڭگودا جۇڭگوشا سوتسياليزم جاپپاي العا ىلگەرىلەۋدە. ءبىز جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن ىسكە اسىرۋدا قىمباتتى ورايعا ءدوپ كەلىپ وتىرمىز، نەگىزىمىز بەرىك، سەنىمىمىز كۇشتى. سونىمەن بىرگە ءبىز الداعى جولىمىز جاتىق جول ەمەس، ءتۇرلى قيىن سىن - سايىستارعا، اۋىر حاۋىپ - قاتەرگە، جويقىن بوگەتكە، زور قايشىلىقتارعا ءدوپ كەلەتىندىگىمىزدى، تالاي جاڭا تاريحي ەرەكشەلىككە يە ۇلى كۇرەستەردى جۇرگىزەتىندىگىمىزدى، ءسوز جوق، سەرگەكتىكپەن كورە ءبىلۋىمىز كەرەك.
  تاريحتىڭ تىڭ بەلەسىندە ءبىز جۇڭحۋا ۇلتىنىڭ ازاپ - بەينەتتەن قۇتىلۋى، جۇڭگو حالقىنىڭ ازاتتىققا قول جەتكىزۋى ەرجۇرەك حالىق ارمياسىنىڭ ارقاسىندا جۇزەگە اسقانىن؛ جۇڭحۋا ۇلتىنىڭ ۇلى گۇلدەنۋى، جۇڭگو حالقىنىڭ ءتىپتى جارقىن تۇرمىسقا قولى جەتۋى ءۇشىن، ءسوز جوق، حالىق ارمياسىن جەدەل قارقىنمەن الەمدەگى ماڭداي الدى ارميا ەتىپ قۇرىپ شىعۋ كەرەك ەكەنىن ءتىپتى دە تەرەڭ سەزىندىك. ءبىز اۋەلگى ماقساتتى ۇمىتپاي، ۇدەرە العا ىلگەرىلەپ، ارميانى قۇدىرەتتەندىرۋدىڭ جۇڭگوشا جولىنان جازباي، ارميانى قۇدىرەتتەندىرۋ ءىسىن توقتاۋسىز العا ىلگەرىلەتۋىمىز كەرەك.
  − ارميانى قۇدىرەتتەندىرۋ ىستەرىن ىلگەرىلەتۋ ءۇشىن، پارتيانىڭ ارمياعا بولعان ابسوليۋتتى باسشىلىعىنا، ءسوز جوق، بۇلجىماي تاباندى بولىپ، حالىق ارمياسىنىڭ ماڭگى پارتياعا ىلەسۋىنە كەپىلدىك ەتۋ كەرەك. پارتيانىڭ باسشىلىعى − حالىق ارمياسىنىڭ كۇشتى ۇيىسۋ قۋاتىن، جۇدىرىقتاي جۇمىلۋ قۋاتىن، جاڭالىق اشۋ قۋاتىن، جاۋىنگەرلىك قۋاتىن ساقتاۋىنىڭ ءتۇبىرلى كەپىلى. پارتيانىڭ ارمياعا بولعان ابسوليۋتتى باسشىلىعى − جۇڭگوشا سوتسياليزمنىڭ ماندىك ەرەكشەلىگى، پارتيا مەن مەملەكەتتىڭ ماڭىزدى ساياسي باسىمدىعى، حالىق ارمياسىنىڭ ارميا قۇرۋداعى نەگىزى، ارميانى قۇدىرەتتەندىرۋىنىڭ جانى. زامان مەيلى قالاي دامىسا دا، جاعداي مەيلى قالاي وزگەرسە دە، ءبىزدىڭ ارميامىز ماڭگى پارتيانىڭ ارمياسى، حالىقتىڭ ارمياسى. تۇتاس ارميا ساياسي تانىمدى، جالپى جاعداي تانىمىن، ۇيتقى تانىمىن، ساپ تۇزەۋ تانىمىن كۇشەيتىپ، پارتيا ورتالىق كوميتەتىنىڭ بەدەلىن باتىل قورعاپ، پارتيانىڭ ارمياعا بولعان ابسوليۋتتى باسشىلىعى سىندى نەگىزگى پرينسيپ پەن ءتۇزىمدى باتىل دايەكتىلەندىرىپ، پارتيا ورتالىق كوميتەتى مەن ورتالىق اسكەري ىستەر كوميتەتىنىڭ قولباسشىلىعىنا باتىل قۇلاق اسۋى كەرەك. وسىنداي ماڭىزدى پرينسيپتىك ماسەلەدە وي - سانانى ەرەكشە سەرگەك ۇستاۋىمىز، پوزيتسيامىز ەرەكشە ايقىن بولۋى، ارەكەتىمىز ەرەكشە باتىل بولۋى كەرەك، تيتتەي دە سولقىلداقتىق ىستەمەۋىمىز، ەشقانداي شەگىنشەكتەمەۋىمىز، ەشقانداي ءدۇدامال بولماۋىمىز كەرەك.
− ارميانى قۇدىرەتتەندىرۋ ىستەرىن ىلگەرىلەتۋدە پارتيانىڭ اسكەري ىستەرگە جەتەكشىلىك ەتۋ نازارياسىنا، ءسوزسىز، تاباندى بولىپ جانە ونى دامىتىپ، ماركسيزمدىك اسكەري ىستەر نازارياسىنىڭ جانە قازىرگى زامانعى جۇڭگو اسكەري ىستەر امالياتىنىڭ دامۋ جاڭا ءورىسىن ۇزدىكسىز اشۋ كەرەك. حالىق ارمياسىنىڭ ۇزدىكسىز دامىپ، زورايۋىنىڭ تەتىگى − وزىق اسكەري ىستەر نازارياسىن جەتەكشى ەتۋگە باستان - اياق تاباندى بولۋىندا. پارتيا 18 - قۇرىلتايىنان بەرى پارتيامىز مەملەكەت قورعانىسى جانە ارميا قۇرىلىسىن ارقاۋ ەتىپ، جاڭا يدەيالاردى، جاڭا كوزقاراستاردى، جاڭا تۇجىرىمداردى، جاڭا تالاپتاردى العا قويىپ، پارتيانىڭ جاڭا داۋىردەگى ارميانى قۇدىرەتتەندىرۋ يدەياسىن قالىپتاستىردى. بۇكىل ارميا پارتيانىڭ اسكەري ىستەرگە جەتەكشىلىك ەتۋ نازارياسىن دەن قويا دايەكتىلەندىرىپ، پارتيانىڭ جاڭا داۋىردەگى ارميانى قۇدىرەتتەندىرۋ يدەياسى ارقىلى كوماندير - جاۋىنگەرلەردىڭ وي - ساناسىن قارۋلاندىرۋعا تاباندى بولىپ، ارميانى قۇدىرەتتەندىرۋ ىستەرىندە ۇزبەي تىڭ ىلگەرىلەۋشىلىككە قول جەتكىزۋگە جەتەكشىلىك ەتۋ كەرەك. امالياتتىڭ دامۋىنىڭ شەگى بولمايدى، اقيقاتتى تانۋدىڭ شەگى بولمايدى، نازاريادا جاڭالىق جاراتۋدىڭ شەگى بولمايدى. ارميانى قۇدىرەتتەندىرۋ توتەنشە كۇشتى جاسامپازدىق ءىس. جاڭا جاعدايعا ۇزبەي سايكەسىپ، جاڭا سىن - سايىستارعا توتەپ بەرىپ، تىڭ ماسەلەلەردى شەشىپ، امالياتتا باتىلدىقپەن ىزدەنىس جاساپ، نازاريادا باتىلدىقپەن جاڭالىق اشىپ، پارتيانىڭ جاڭا داۋىردەگى ارميانى قۇدىرەتتەندىرۋ يدەياسىن ۇزبەي بايىتىپ جانە دامىتىپ، ارميانى قۇدىرەتتەندىرۋ ۇلى امالياتى بارىسىندا ماركسيزمدىك اسكەري ىستەر نازارياسىنىڭ شۇلەن اقيقات شۇعىلاسىن شاشتىرۋىمىز كەرەك.
 − ارميانى قۇدىرەتتەندىرۋ ىستەرىن ىلگەرىلەتۋدە نازاردى، ءسوز جوق، باستان - اياق سوعىسقا دايىندالۋعا، سوعىس جۇرگىزۋگە اۋدارىپ، جەدەل سايلاناتىن، سايلانسا، سوعىسا الاتىن، سوعىسسا، ءسوزسىز، جەڭەتىن سايلاۋىت قوسىن، جاۋىنگەر جاساق دايىنداۋ كەرەك. تىنىشتىق كەزدە قاتەردىڭ بولاتىندىعىن، جونگە سالۋدا بىلىقپالىق تۋىلاتىندىعىن ۇمىتۋعا بولمايدى. ءبىزدىڭ بەيبىتشىلىكتى، حاۋىپسىزدىكتى قورعاۋ، سوعىستى شاۋجايلاۋ ءتاسىلىمىز بەن تاڭداۋىمىز كوپ ءتۇرلى بولعانىمەن، اسكەري ءتاسىل باستان - اياق ەڭ تومەنگى شەكتى ساقتاۋ ءتاسىلى بولىپ وتىر. حالىق ارمياسى ماڭگى جاۋىنگەر قوسىن، حالىق ارمياسىنىڭ ومىرشەڭدىك كۇشى جاۋىنگەرلىك قۋاتىندا. سوندىقتان تاۋقىمەت تانىمىن، ءسوز جوق، كۇشەيتىپ، ەڭ تومەنگى شەكتە ويلاۋعا تاباندى بولىپ، زەيىن - زەردەنى سوعىس جۇرگىزۋگە شوعىرلاندىرىپ، ءتۇرلى قىزمەتتەردە سوعىس جۇرگىزۋگە كۇش سالىپ، پارتيا مەن حالىق قاجەت ەتكەن كەزدە اتويلاپ العا شىعۋعا، سوعىستا جەڭىسكە جەتۋگە كەپىلدىك ەتۋ كەرەك. بۇكىل ارميا جاڭا جاعدايداعى اسكەري ستراتەگيالىق باعىتتى دايەكتىلەندىرىپ، اسكەري ىستەردى، سوعىستى، سوعىس جۇرگىزۋدى دەن قويا زەرتتەپ، وسى زامانعى سوعىس زاڭدىلىعى مەن سوعىسقا جەتەكشىلىك ەتۋ زاڭدىلىعىن يگەرىپ، اسكەري سوعىسقا دايىندالۋدىڭ ءتۇرلى قىزمەتتەرىن تىڭعىلىقتى ىستەۋ كەرەك. شايقاسقا قاراي اسكەر جاتتىقتىرۋعا، شايقاس قاجەتىنە قاراي جاپالى جاتتىعۋ جۇرگىزۋگە، قاي ماسەلە كورنەكتى بولسا، سول ماسەلەنى شەشۋگە تاباندى بولىپ، اسكەري جاتتىعۋدىڭ ناقتى سوعىستىق دەڭگەيىن جاپپاي ءوسىرۋ قاجەت. جۇڭگو حالقى بەيبىتشىلىكتى قاستەرلەيدى، ءبىز استە شاپقىنشىلىق جاساپ، ىرگە كەڭەيتپەيمىز، ءبىراق شاپقىنشىلىق اتاۋلىنى جەڭۋگە سەنىمىمىز بار. ءارقانداي ادامنىڭ، ءارقانداي ۇيىمنىڭ، ءارقانداي ساياسي پارتيانىڭ ءارقانداي كەزدە، ءارقانداي فورمامەن جۇڭگو تەرريتورياسىنىڭ ءارقانداي ءبىر بولەگىن جۇڭگودان ءبولىپ اكەتۋىنە استە جول بەرمەيمىز. ءبىزدى ەلىمىزدىڭ يەلىك ۇقىعىنا، حاۋىپسىزدىگىنە، دامۋ مۇددەسىنە زيان سالاتىن اشتى جەمىستىڭ ءدامىن تاتادى دەپ ەشكىم دە دامەلەنبەسىن. حالىق ارمياسى جۇڭگو كوممۋنيستىك پارتياسىنىڭ باسشىلىعى مەن ەلىمىزدىڭ سوتسياليستىك ءتۇزىمىن باتىل قورعاۋ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعاۋ، ءوڭىردىڭ جانە دۇنيە ءجۇزىنىڭ بەيبىتشىلىگىن باتىل قورعاۋ قاجەت.
  − ارميانى قۇدىرەتتەندىرۋ ىستەرىن ىلگەرىلەتۋدە ساياسيدى باسشىلىققا الىپ ارميا قۇرۋعا، رەفورما ارقىلى ارميانى قۇدىرەتتەندىرۋگە، عىلىم - تەحنيكا ارقىلى ارميانى گۇلدەندىرۋگە، ارميانى زاڭمەن جونگە سالۋعا، ءسوز جوق، تاباندى بولىپ، مەملەكەت قورعانىسى مەن ارميانىڭ وسىزاماندانۋ دەڭگەيىن جاپپاي جوعارىلاتۋ كەرەك. گۋتياندا اشىلعان بۇكىل ارميانىڭ ساياسي قىزمەتى ءماجىلىسىنىڭ رۋحىن ىشكەرىلەي دايەكتىلەندىرىپ، ساياسي قىزمەتتىڭ جان تامىرلىق رولىن ساۋلەلەندىرىپ، رۋحتى، قابىلەتتى، جان كەشتى، ءمورالدى جاڭا ءداۋىردىڭ توڭكەرىستىك اسكەريلەرىن تاربيەلەپ، بولاتتاي بەرىك سەنىمى، بولاتتاي بەرىك ۇستانىمى، بولاتتاي بەرىك ءتارتىبى، بولاتتاي بەرىك جاۋاپكەرشىلىگى بار قۇرىشتاي قوسىن سومداپ، حالىق ارمياسىنىڭ سيپاتىن، ءتۇپ ماقساتىن، قاسيەتىن ماڭگى ساقتاۋ كەرەك. بۇكىل ارميا مەملەكەت قورعانىسى مەن ارميا رەفورماسىن بۇلجىماي تەرەڭدەتىپ، مەملەكەت قورعانىسى مەن ارميا قۇرىلىسىن تەجەپ وتىرعان تۇزىلىستىك كەدەرگىلەردى، قۇرىلىمدىق قايشىلىقتاردى، ساياساتتىق ماسەلەلەردى ىشكەرىلەي شەشىپ، جۇڭگوشا سوتسياليستىك اسكەري ىستەر ءتۇزىمىن كەمەلدەندىرىپ جانە ونى دامىتىپ، ينفورماتسيالانعان سوعىستا جەڭىسكە جەتەتىن، بورىش پەن مىندەتتى ءونىمدى اتقاراتىن جۇڭگوشا وسى زامانعى اسكەري كۇشتەر جۇيەسىن جەدەل ورناتۋ كەرەك. عىلىم - تەحنيكا ارقىلى ارميانى گۇلدەندىرۋ ستراتەگياسىن جاپپاي اتقارىپ، دەربەس جاڭالىق اشۋدىڭ ستراتەگيالىق تۇيىنىنە تاباندى بولىپ، دۇنيە ءجۇزى اسكەري عىلىم - تەحنيكاسىنىڭ الدىڭعى لەگىن كوزدەپ، كورەگەندىكپەن جوبا جاساۋدى كۇشەيتىپ، ستراتەگيالىق، الدىڭعى لەكتىك، جويىمپاز تەحنيكانى جەدەل دامىتىپ، عىلىم - تەحنيكادا جاڭالىق اشۋدىڭ حالىق ارمياسى قۇرىلىسى مەن جاۋىنگەرلىك قۋاتتى دامىتۋعا قوساتىن ۇلەس شاماسىن ۇزدىكسىز جوعارىلاتۋ كەرەك. بۇكىل ارميانىڭ زاڭمەن جونگە سالۋ تانىمىن كۇشەيتىپ، اسكەري ىستەردى جۇڭگوشا زاڭمەن جونگە سالۋ جۇيەسىن جەدەل ورناتىپ، ارميانى جونگە سالۋ تاسىلىندە ءتۇبىرلى بۇرىلىس جاساۋدى جەدەلدەتۋ كەرەك.
  − ارميانى قۇدىرەتتەندىرۋ ىستەرىن ىلگەرىلەتۋدە ارميا مەن حالىقتىڭ توعىسپالى دامۋىن، ءسوز جوق، ىشكەرىلەي جەبەپ، ارميا مەن حالىق ءبىر تۇلعالانعان مەملەكەتتىك ستراتەگيالىق جۇيە مەن قۋاتتى ازىرلەۋ كەرەك. ارميا مەن حالىقتىڭ توعىسپالى دامۋىن مەملەكەت ستراتەگياسىنا كوتەرۋ − پارتيامىزدىڭ ەكونوميكالىق قۇرىلىس پەن مەملەكەت قورعانىسى قۇرىلىسىنىڭ سايكەستى دامۋ زاڭدىلىعىنا ۇزاق ۋاقىت ىزدەنىس جاساۋداعى كەلەلى جەتىستىك، مەملەكەتتىڭ دامۋى مەن حاۋىپسىزدىك جالپى جاعدايىن ءتۇيىن ەتكەن كەلەلى شارا، كۇردەلى حاۋىپسىزدىك قاتەرىنە توتەپ بەرۋدەگى، مەملەكەت ستراتەگياسىنىڭ باسىمدىعىنا قول جەتكىزۋدەگى كەلەلى شارا. جوعارى دەڭگەيدە جوبا جاساۋدى كۇشەيتىپ، قاجەتپەن ۇشتاستىرۋدى كۇشەيتىپ، ارتۋ مەن ساقتالۋ مولشەرىن ءبىر تۇتاس جوسپارلاپ، تۇزىلىستىك جانە مەحانيزمدىك رەفورمانى، جۇيە مەن فاكتوردىڭ توعىسۋىن، ءتۇزىم مەن ولشەم قۇرىلىسىن تەڭ قادامدا ىلگەرىلەتىپ، ارميا مەن حالىقتىڭ تەرەڭدەي توعىسا دامۋىنىڭ جالپى فاكتورلى، كوپ سالالى، جوعارى ءونىمدى ارناسىن جەدەل قالىپتاستىرىپ، ەكونوميكالىق قۇرىلىس پەن مەملەكەت قورعانىسى قۇرىلىسىنىڭ سايكەستى دامۋ، تەڭ دامۋ، قاتار دامۋ جاڭا جاعدايىن قۇلشىنا اشۋ كەرەك. ءبىزدىڭ مەملەكەت قورعانىسىمىز جالپى حالىقتىڭ مەملەكەت قورعانىسى، مەملەكەت قورعانىسى مەن ارميانىڭ وسىزاماندانۋىن ىلگەرىلەتۋ بۇكىل پارتيانىڭ، بۇكىل ەل حالقىنىڭ ورتاق ءىسى. ورتالىق پەن مەملەكەت ورگاندارى، جەرگىلىكتى ءار دارەجەلى پارتكومدار مەن ۇكىمەتتەر مەملەكەت قورعانىسى تانىمىن كۇشەيتىپ، مەملەكەت قورعانىسى مەن ارميا قۇرىلىسى رەفورماسىن اسقاق ىنتامەن قولداپ، ارميانى قۇدىرەتتەندىرۋگە تاماشا شارت - جاعداي جاراتىپ، پارمەندى تىرەك ازىرلەۋ كەرەك.
  − ارميانى قۇدىرەتتەندىرۋ ىستەرىن ىلگەرىلەتۋدە، ءسوز جوق، بۇكىل ىنتا - پەيىلىمەن حالىق ءۇشىن قىزمەت ىستەۋدەي تۇپكى ماقساتقا، ءسوز جوق، تاباندى بولىپ، قاي - قاشان دا حالىق سەنەتىن، حالىق قولدايتىن، حالىق سۇيەتىن پەرزەنت اسكەر بولۋ كەرەك. ارميانىڭ جەڭىستى سوعىس جۇرگىزۋدەگى سۇيەنىشى − حالىق. حالىق ارمياسىنىڭ كۇرە تامىرى حالىقتىڭ بايتاق دالاسىنا تەرەڭ بويلاعان؛ حالىقتىق سوعىستىڭ ۇلى كۇشى حالىقتىڭ ۇلى كۇشىنەن باستاۋ العان. بۇكىل ارميا حالىقتى كوڭىلگە تەرەڭ ۇيالاتىپ، حالىق ءۇشىن قارۋ اسىنىپ، حالىق ءۇشىن سوعىس جۇرگىزۋدەي قاسيەتتى بورىشتى ەستە بەرىك ساقتاپ، حالىقتىڭ بەيبىت ەڭبەگىن جانە تۇرمىسىن باتىل قورعاۋ كەرەك. بۇقارامەن تىعىز بايلانىس جاسايتىن تاڭداۋلى ءداستۇردى ساۋلەلەندىرىپ، حالىق بۇقاراسىمەن ەتەنە بولۋ، جاپا - ماشاقاتتى بىرگە وتكەرۋ قاتىناسىن ساقتاپ، ماڭگى حالىق مۇددەسىنىڭ قورعاۋشىسى بولۋ كەرەك. جەرگىلىكتى ورىنداردىڭ ەكونوميكالىق، قوعامدىق قۇرىلىسىنا بەلسەنە ات سالىسىپ جانە كومەكتەسىپ، شۇعىل، قيىن، حاۋىپتى، اۋىر مىندەتتەردى باتىلدىقپەن ارقالاپ، حالىققا امالياتتىق ارەكەت ارقىلى باقىت جاراتۋ، يگىلىك جەتكىزۋ كەرەك. ارميا مەن ۇكىمەت، ارميا مەن حالىق ىنتىماعى پارتيامىزدىڭ، ارميامىزدىڭ ەرەكشە ساياسي باسىمدىعى. بۇكىل پارتيا، بۇكىل ارميا، بۇكىل ەلىمىزدەگى ءار ۇلت حالقى ارميا حالىقتى سۇيەتىن، حالىق ارميانى قولدايتىن داڭقتى ءداستۇردى بارىنشا ساۋلەلەندىرىپ، ارميا مەن ۇكىمەتتىڭ، ارميا مەن حالىقتىڭ مىزعىماس قاتىناسىن ۇزدىكسىز دامىتۋى كەرەك.
  جولداستار، دوستار!
  جۇڭگو قاي - قاشان دا دۇنيە ءجۇزىنىڭ بەيبىتشىلىگىن ورناتۋشى، الەمنىڭ دامۋىنا ۇلەس قوسۋشى، حالىقارالىق ءتارتىپتى قورعاۋشى بولا بەرەدى، جۇڭگو ارمياسى قاي - قاشان دا دۇنيە ءجۇزىنىڭ بەيبىتشىلىگىن قورعايتىن مىزعىماس كۇش. جۇڭگو ارمياسى الداعى جەردە حالىقارالىق اسكەري ىستەر اۋىس - كۇيىسىن، سەلبەستىگىن بۇرىنعىداي ورىستەتىپ، الەمدىك حاۋىپسىزدىك سىن - سايىستارىنا بىرگە توتەپ بەرىپ، جۇڭگونىڭ حالىقارالىق ورنىمەن سايكەس كەلەتىن جاۋاپكەرشىلىگىن جانە بورىشىن بەلسەنە اتقارىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جولىندا بەلسەنە كۇش قوسادى.

  جولداستار، دوستار!
  90 جىل جاپالى ىزدەنىس جاسادىق، 90 جىل قاجىماي - تالماي كۇرەس جۇرگىزدىك، ءبىزدىڭ ءىسىمىز ۇلى، ءبىزدىڭ مىندەتىمىز ماشاقاتتى، ءبىزدىڭ دامۋ بولاشاعىمىز ەرەكشە جارقىن. بۇكىل پارتيا، بۇكىل ارميا، بۇكىل ەلدەگى ءار ۇلت حالقى، ءسوز جوق، جۇدىرىقتاي جۇمىلىپ العا باسىپ، جۇڭگوشا سوتسياليزم ۇلى امالياتىندا مەملەكەتتى، ارميانى قۇدىرەتتەندىرۋدىڭ ءتىپتى دە شۇعىلالى تاراۋىن ۇزدىكسىز جازۋى، تاريح پەن داۋىرگە سايما - ساي كەلەتىن جاڭا شۇعىلالى ناتيجەلەردى ۇزدىكسىز جاراتۋى كەرەك!
  (شينحۋا اگەنتتىگىنىڭ 1 - تامىزدا بەيجيڭنەن بەرگەن حابارى)

ءان الەمى

جول توسىلىپ قالدى

تۇلپارىم