جاڭا حابارلار

6. التاي تاۋىنداعى ەكى وزەننىڭ باستالعان جەرىنىڭ ەكولوگيالىق ورتاسىن وڭاۋدىڭ ونىمدىلىگى كورىلدى

    كەلۋ قاينارى: شينجياڭ حالىق راديو ىستانسياسى    2017-08-28 19:48:44  
التاي راديو ستانسياسىنىڭ تىلشىنى ياڭ شۋسايدىڭ حابارىن تىڭداڭىزدار: تاياۋدا، التاي تاۋىنداعى ەرتىس وزەنى مەن ۇلىڭگىر وزەنىنىڭ باستالاتىن جەرىندەگى جاراتىلىستىق قورىققا ورناتىلعان ينفرا قىزىل ساۋلەلىك فوتو اپاراتتىڭ كوزىنە مەملەكەت جاعىنان قورعالاتىن باعالى جابايى حايۋانات بارىس پەن سىلەۋسىن جانە بۇركىت، قاسقىر، بۇعى سياقتى حايۋاناتتاردىڭ كورىنىسى ءتۇستى. التاي تاۋىنداعى وسى ەكى وزەننىڭ باستالعان جەرىنىڭ ەكولوگيالىق ورتاسىن وڭاۋدىڭ ونىمدىلىگى كورىلدى.
التاي تاۋىنداعى ەكى وزەننىڭ باستالعان جەرىندەگى جاراتىلىستىق قورىق كوكتوعاي، شىڭگىل سىندى ەكى اۋدانىنىڭ تاۋلى وڭىرىندەگى تابيعي ورماندى قامتيدى، مۇنداعى ورمان-توعايدىڭ جالپى جەر اۋدانى ميلليون گەكتاردان اسادى. 23-تامىزدا، ءتىلشى التاي تاۋىنداعى وسى ەكى وزەننىڭ باستالعان جەرىندەگى جاراتىلىستىق قورىقتى باسقارۋ مەكەمەسىنە قاراستى قۇرىمتى باسقارۋ-قورعاۋ ورنىنىڭ قورعاۋ قىزمەتكەرى اقىتقانعا ىلەسىپ، اۆتوموبيلمەن قۇرىمتى وڭىرىندەگى دانانگوۋعا بارىپ، ينفرا قىزىل ساۋلەلىك فوتو اپاراتتان جابايى حايۋاناتتاردىڭ تىرشىلىك ورتاسىن كوردى. فوتو اپاراتقا تۇسىرىلگەن ماتەريالدا كورسەتىلۋىنشە، كەزەكتە قورىق رايونىندا بۇعى، تاۋەشكى نەداۋىر كوپ، قۇنى قوڭىر ايۋ سياقتى سيرەك كەزدەسەتىن حايۋاناتتار دا اندا-ساندا كوزگە شالىنىپ قالادى ەكەن. اقىتىقان تىلشىگە: ءبىز اپپاراتتى اعاش باسىنا دا، تاسقا دا بايلاپ كوردىك. 2011-جىلدان قازىرگە دەيىن، كوپتەگەن حايۋاناتتاردى اپپارات كوزىنە تۇسىردىك، بيىلعىسى كوبىرەك، بيىل بارىس، تاۋەشكى، قۇنى، قوڭىر ايۋ، سىلەۋسىن سياقتىلار بار،-دەدى.
قۇرىمتى قورىق رايونى كەزىندە زاڭسىز التىن قازاتىن جەر بولعاندىقتان، وزەن ارناسى مەن وزەن جاعاسىنداعى وڭىرلەردىڭ ورمان جامىلعىلارى اۋىر دارەجەدە بۇلىنگەن. زاڭسىز التىن قازۋ ارەكەتىنە تيىم سالۋ ءۇشىن، 2011-جىلى التاي تاۋىنداعى وسى ەكى وزەننىڭ باستالعان جەرىندەگى جاراتىلىستىق قورىقتى باسقارۋ مەكەمەسى وسى ورىندى باسقارۋ ۇقىعىن وتكىزىپ العان سوڭ، تازالاۋ ارەكەتىن ورىستەتىپ، بارلىق التىن قازۋ جابدىعىن اداقتاعاننان كەيىن، كونە كەن رايونىن قالپىنا كەلتىرۋ ينجەنەرياسىن باستاعان. ۇزاق جىلداردان بەرى وسى ارانى مەكەندەپ كەلە جاتقان مالشى باقىتبەك: العاشىندا كەن قازۋشىلار بۇل اراداعى اڭداردى ۇركىتىپ جىبەردى. قورىقتاعى قىزمەتكەرلەر كەلگەن سوڭ، قورشاعان ورتا ويداعىداي قورعالدى. مەن قازىر مال جايىپ ءجۇرىپ تاۋەشكى، ايۋ، سۋىر، تۇلكى سياقتى حايۋاناتتاردى ءجيى كورىپ قالاتىن بولدىم،-دەدى.
بۇگىنگى تاڭدا، التاي تاۋىنداعى وسى ەكى وزەننىڭ باستالعان جەرىندەگى جاراتىلىستىق قورىق بيولوگيالىق الۋان تۇرلىلىكتىڭ گەن قويماسىنا اينالدى. قازىر قورىقتا 967 ءتۇرلى وسىمدىك، قىنا، مۇك تەكتەستەردىڭ 200 نەشە ءتۇرى، حايۋاناتتاردىڭ 54 ءتۇرى، قۇستاردىڭ 222 تۇرى، بالىقتىڭ 8 ءتۇرى بار. كوپتەگەن حايۋاناتتار مەن وسىمدىكتەر ءتۇرى مەملەكەتتە نەمەسە شينجياڭدا عانا بار تۇرگە جاتادى.

بەرىپ كەت ورامالىڭدى

دوستار

الىستاعى اق ەركە