جاڭا حابارلار

قىزمەت اترەتىندەگىلەر كەدەي قيىنشىلىعى بار وقۋشىنىڭ ۋنيۆەرسيتەتتە وقۋ ارمانىن ورىنداۋىنا كومەكتەستى

    كەلۋ قاينارى: شينجياڭ حالىق راديو ىستانسياسى    2017-09-11 12:39:53  
ستانسيامىزدىڭ ءتىلشىسى ايبىنحازى راحمان ۇلى مەن ۇشتۇرپان اۋداندىق راديو ستانسياسىنىڭ تىلشىسى جاڭ حىنىڭ حابارىن تىڭداڭىزدار: ۇشتۇرپان اۋدانى وتباسى اۋىلى قۇمبۇلۇڭ قىستاعىنداعى تۇنيساقىز گايىت بيىل سانجى كاسىپتىك تەحنيكا ينستيتۋتىنا ەمتيحان بەرىپ قابىلدانعانىمەن، وتباسىندا قيىنشىلىق بولعاندىعى سەبەپتى وقي المايتىن جاعدايعا تاپ بولعاندا، اۆتونوميالى رايوندىق ورمان شارۋاشىلىعى مەڭگەرمەسىنىڭ قىستاقتا تۇراتىن «حالىق جاعدايىن ۇعىسۋ، حالىققا تيىمدىلىك جەتكىزۋ، حالىق تىلەگىن توعىستىرۋ» قىزمەت اترەتى جىلۋ جيناپ، ونىڭ جوعارىلاپ وقۋىنا مۇمكىندىك جاسادى.
بيىل جوعارى مەكتەپكە قابىلدانعان ستۋدەنتتەر مەكتەپ تابالدىرىعىن اتتاۋعا تاياعاندا، 19 جاستاعى تۇنيساقىز گايىت وقۋ قاراجاتىن تاپسىرا المايتىن بولعاندىقتان قايتەرىن بىلمەي باسى ابدەن قاتادى. ول تىلشىگە: وتباسىمىزدا قيىنشىلىق اۋىر، تۋىستارىمىزدا امال قاراستىرايىق دەگەنىمەن، وقۋ قاراجاتى مەن تۇرمىس قاراجاتىن تابا الماي قاتتى قينالدى،- دەدى.
تۇنيساقىز گايىت 10 جاسقا شىققان جىلى اكەسى قايتىس بولىپ، شەشەسى ەكەۋى 2 مۋ جەردەگى جاڭعاقتان جىلىنا كىرەتىن 3 مىڭ يۋان كىرىسكە سۇيەنىپ كۇنەلتىپ كەلگەن. اۆتونوميالى رايوندىق ورمان شارۋاشىلىعى مەڭگەرمەسىنىڭ قىستاقتا تۇراتىن «حالىق جاعدايىن ۇعىسۋ، حالىققا تيىمدىلىك جەتكىزۋ، حالىق تىلەگىن توعىستىرۋ» قىزمەت اترەتىنىڭ مۇشەسى چىن حاۋ بۇل ىستەن حابار تاپقان سوڭ، ۇنحات ارقىلى دوستار شەڭبەرىنە وسى وقۋشىنىڭ وقۋىنا كومەكتەسۋ تۋرالى ۇندەۋ شىعارادى، سول كۇننىڭ وزىندە رايونىمىزدىڭ جەر-جەرىندەگى جانە بەيجيڭ، شاڭحاي، حىنان سياقتى جەرلەردەگى جۇزگە جۋىق ادام 10 مىڭ يۋاننان استام جىلۋ اتايدى. چىن حاۋ: قىزمەت اترەتىندەگىلەر قيىنشىلىق سەبەبىنەن جوعارى مەكتەپكە قابىلدانعان وقۋشىنىڭ وقۋدان قالۋىنا بولمايدى دەپ قاراپ، وعان كومەكتەسىپ، جوعارىلاپ وقۋىنا جول اشۋ ويىنا كەلدىك. قىستاقتا تۇرعان ءبىر جىل ىشىندە قىستاق تۇرعىندارىنا كوبىرەك يگى ءىس ىستەپ بەرۋ ءبىزدىڭ ارمانىمىز ەدى،- دەدى.
قىزمەت اترەتىندەگىلەر مەن مەيىربان جانداردىڭ بەرگەن جىلۋ اقشاسىنا يە بولعان تۇنيساقىز 6- قىركۇيەك مەكتەبىنە اتتانادى. ول تىلشىگە بىلاي دەدى: قىزمەت اترەتىندەگىلەر جوعارىلاپ وقۋىما كومەك اقشا جيناپ بەردى، ولارعا العىسىم شەكسىز. مەكتەپكە بارعان سوڭ جاقسى وقىپ، كوبىرەك ءبىلىم ۇيرەنىپ، قوعامعا ۇلەس قوسامىن، ءارى ءوزىم سياقتى قيىنشىلىعى بار وقۋشىلارعا كومەكتەسەمىن.

بەرىپ كەت ورامالىڭدى

دوستار

الىستاعى اق ەركە