جاڭا حابارلار

جۇڭگو مەن رەسەيدىڭ مەملەكەت باسشىلارى ءوزارا تەلەگرامما جولداپ، جاڭا جىلدى قۇتتىقتادى

    كەلۋ قاينارى: شينجياڭ گازەتى    2018-01-02 19:33:06  
  شينحۋا اگەنتتىگىنىڭ 31 - جەلتوقساندا بەيجيڭنەن بەرگەن حابارى. 2017 - جىلى 31 - جەلتوقساندا مەملەكەت ءتوراعاسى شي جينپيڭ مەن رەسەيدىڭ زۇڭتۇڭى پۋتين ءوزارا تەلەگرامما جولداپ، جاڭا جىلدى قۇتتىقتادى.
  شي جينپيڭ قۇتتىقتاۋ تەلەگرامماسىندا جۇڭگو ۇكىمەتى مەن جۇڭگو حالقى اتىنان پۋتين زۇڭتۇڭعا جانە رەسەي حالقىنا شىن ىقىلاسپەن قۇتتى بولسىن ايتتى جانە ىزگى تىلەك ءبىلدىردى. شي جينپيڭ بىلاي دەدى: 2017 - جىلعا قايىرىلا قاراساق، جۇڭگو مەن رەسەيدىڭ جان - جاقتى ستراتەگيالىق سەلبەستىك سەرىكتەستىك قاتىناسى جوعارى دەڭگەيدە تىڭ ءارى ماڭىزدى تابىستارعا قول جەتكىزدى. ەكى جاق ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى باتىل قولداپ، «ءبىر بەلدەۋ، ءبىر جول» قۇرىلىسىن ەۆروپا - ازيا ەكونوميكالىق وداعىمەن ۇشتاستىرۋ ىنتىماقتاستىعىندا كۇنى بۇرىن ماڭىزدى تابىستارعا قول جەتكىزدى، ەكى ەلدىڭ ستراتەگيالىق ءىرى نىساندارداعى ىنتىماقتاستىعى ورنىقتىلىق بارىسىندا ىلگەرىلەدى، جاڭالىق اشۋ، اۋىل شارۋاشىلىعى، جەرگىلىكتى ىنتىماقتاستىقتار ۇزدىكسىز جاڭا قوزعاۋشى كۇش تۋىنداتىپ، مەديالار اۋىس - كۇيىسى جىلى تابىسپەن اياقتادى، گۋمانيتارلىق ىنتىماقتاستىق قارىشتاپ دامىپ، ەكى ەل دوستىعىنىڭ حالىق تىلەگى نەگىزى اناعۇرلىم بەكەمدەلدى، ەكى جاق حالىقارالىق جانە وڭىرلىك ىستەردە تىعىز دا ءونىمدى سايكەستىكتى ساقتاپ، دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋعا ماڭىزدى ۇلەستەر قوستى.
  شي جينپيڭ مىنالاردى اتاپ كورسەتتى: جاڭا جىلدا مەن سىزبەن ۇزدىكسىز تىزە قوسا قۇلشىنىپ، جۇڭگو مەن رەسەيدىڭ ساياسي جانە ستراتەگيالىق جاقتاعى ءوزارا سەنىمىن بەكەمدەپ، جۇڭگو مەن رەسەيدىڭ جان - جاقتى ناقتى ىنتىماقتاستىعىن كەڭەيتىپ، جۇڭگو مەن رەسەيدىڭ حالىقاراداعى ستراتەگيالىق سەلبەستىگىن ىلگەرىلەتىپ، ەكى ەل قاتىناسى دامۋىنىڭ تىڭ دا سۇبەلى تابىستارعا قول جەتكىزۋىنە بىرگە جەتەكشىلىك ەتۋدى قالايمىن. مەن 2018 - جىلى جانە 2019 - جىلى وتكىزىلەتىن جۇڭگو مەن رەسەيدىڭ جەرگىلىكتى ورىنداردىڭ ىنتىماقتاستىق، اۋىس - كۇيىس جىلى قيمىلىنىڭ ەكى ەلدىڭ جەرگىلىكتى ورىندارىنىڭ بارىس - كەلىسىن، ءسوزسىز، جان - جاقتى كەڭەيتىپ جانە تەرەڭدەتىپ، جۇڭگو مەن رەسەيدىڭ دوستىقتى ۇرپاقتان - ۇرپاققا جالعاۋ، تىزە قوسا گۇلدەنۋ ۇستانىمىن ادامدار جۇرەگىنە ونان ارى تەرەڭ ۇيالاتاتىندىعىنا سەنەمىن.
  پۋتين قۇتتىقتاۋ تەلەگرامماسىندا ءتوراعا شي جينپيڭنىڭ جاڭا جىلىن قۇتتىقتادى، بۇكىل جۇڭگو حالقىنا باقىت، ەسەن - اماندىق تىلەدى. پۋتين بىلاي دەدى: ءوتىپ بارا جاتقان ءبىر جىلدا رەسەي - جۇڭگو قاتىناسىنىڭ دامۋى تىڭ ناتيجەلەرگە قول جەتكىزدى. ەكى جاقتى ساۋدا سوماسى كورنەكتى ارتىپ، عىلىم - تەحنيكا، مادەنيەت، گۋمانيتارلىق سالالارداعى اۋىس - كۇيىس قارىشتاپ دامىدى، مەن بۇعان ءدان ريزامىن. رەسەي مەن جۇڭگو حالىقارالىق ىستەردە اسا ءونىمدى سەلبەستىكتەر ورىستەتىپ، حالىقارالىق تولعاقتى ماسەلەلەردى شەشۋگە ماڭىزدى ۇلەستەر قوستى. ەكى جاق جەرگىلىكتى ورىنداردىڭ بارىس - كەلىسىن بەلسەندىلىكپەن ورىستەتىپ، 2018 - جىلدان 2019 - جىلعا دەيىن رەسەي مەن جۇڭگونىڭ جەرگىلىكتى ورىندارىنىڭ ىنتىماقتاستىق، اۋىس - كۇيىس جىلى قيمىلىن وتكىزەتىن بولدى. رەسەي مەن جۇڭگونىڭ جان - جاقتى ستراتەگيالىق سەلبەستىك سەرىكتەستىك قاتىناسىن ۇزدىكسىز تەرەڭدەتىپ، دوستىعى جاراسقان ەكى ەل حالىقتارىن باقىتقا بولەۋ جولىندا ءبىز جۇڭگو جاقپەن بىرگە قۇلشىنامىز.

بەرىپ كەت ورامالىڭدى

دوستار

الىستاعى اق ەركە