جاڭا حابارلار

شينحاي توڭكەرىسىنىڭ ارداگەرى ــ حۋاڭ شيڭ

    كەلۋ قاينارى: شينجياڭ حالىق راديو ىستانسياسى    2018-04-13 18:15:26  
-ايدىڭ 12-كۇنى شينحاي توڭكەرىسىنىڭ ارداگەرى ــ حۋاڭ شيڭمەن تانىساسىزدار:
حۋاڭ شيڭنىڭ بۇرىنعى اتى حۋاڭ جىن، 1874- جىلى 10- ايدىڭ 25- كۇنى، حۋناننىڭ شانحۋا اۋدانى لۇڭشي اۋىلى لياڭتاڭ قىستاعىندا تۋعان (قازىرگى چاڭشا اۋدانىنىڭ حۋاڭشيڭ قالاشىعى).
1902-جىلى، حۋاڭ شيڭدى حۋبەي-حۋناننىڭ ۋاكىل اكىمى جاڭ جىدۇڭ جاپونياعا وقۋعا جىبەرەدى. 1903- جىلى، شار روسسيا ەلىمىزدىڭ شىعىس سولتۇستىگىن باسىپ العاندا، حۋاڭ شيڭ مەن جاپونيادا وقىپ جاتقان وقۋشىلار «رەسەيگە قارسى تۇرۋ ەرىكتىلەر قوسىنىن» ۇيىمداستىرىپ، شىعىس سولتۇستىككە بارىپ، شار روسسياعا قارسىلىق كورسەتپەكشى بولعاندا، چيڭ ۇكىمەتىنىڭ باتىل بوگەۋىنە ۇشىرايدى.
وسى كەزدە حۋاڭ شيڭ: «يمپەرياعا قارسى تۇرۋ ءۇشىن چيڭ ۇكىمەتىنە قارسى تۇرۋ كەرەكتىگىن سەزەدى دە، شەتەلدە وقۋدان باتىل ءباز كەشىپ، ەلگە قايتىپ، چيڭ ۇكىمەتىنە قارسى توڭكەرىس قوزعايدى».
1904- جىلى 2- ايدىڭ 15- كۇنى، حۋاڭ شيڭ چاڭشادا توڭكەرىستىك توپ ــ جۇڭحۋانى كوركەيتۋ قوعامىن قۇرادى ءارى وسى قوعامنىڭ باستىعى مىندەتىن ۇستىنە الادى. 1905- جىلى 7-ايدا، حۋاڭ شيڭ جاپونيادا سۇن جۇڭشانمەن تانىسادى. وسىدان كەيىن ەكەۋى توڭكەرىستىك توپ پەن چيڭ ۇكىمەتى ماسەلەسى جونىندە ءبىر اۋىزدىلىققا كەلەدى. سول جىلى 8- ايدىڭ 20- كۇنى وداق ۇيىمى جاپونيانىڭ توكيو قالاسىندا قۇرىلادى، حۋاڭ شيڭ اتقارۋ ءبولىمىنىڭ شارۋاشىلىق ىستەرى باس القاسى مىندەتىن ۇستىنە الادى.
1908- جىلى حۋاڭ شيڭ جۇڭحۋا ۇلتتىق ارمياسىنىڭ وڭتۇستىك ارمياسىنداعى 200 دەن ارتىق ادامدى باستاپ گۋاڭشيدىڭ چينجوۋ، ليانجوۋ، شاڭسى وڭىرىندە 20 مىڭنان ارتىق چيڭ ۇكىمەتى ارمياسىمەن 40 نەشە كۇن سايىسىپ، از كۇشپەن كوپ اسكەردى جەڭىپ، ارت-ارتىنان 7 رەتكى سوعىستا جەڭىسكە جەتىپ، اتاعى جەر جارادى.
1911- جىلى 4- ايدىڭ 27- كۇنى، حۋاڭحۋاگاڭ كوتەرىلىسى تۋىلادى. حۋاڭ شيڭ اتويلاپ الدا ءجۇرىپ، جاۋ جۇرەكتەر قوسىنىنداعى 100 دەن ارتىق ادامدى باستاپ، چيڭ پاتشالىعىنىڭ گۋاڭدۇڭ-گۋاڭشي ۋاكىك اكىم سارايىنا شابۋىلداپ، سوڭىندا جاۋ كۇشىنىڭ سانى كوپ بولۋ سەبەبىنەن، كوتەرىلىس جەڭىلىسكە ۇشىرايدى.
1911- جىلى 10- ايدىڭ 10- كۇنى، ۋچاڭ كوتەرىلىسى باستالادى. حۋاڭ شيڭ 10- ايدىڭ 28- كۇنى، ۋچاڭعا بارادى، 11- ايدىڭ 3- كۇنى جۇڭحۋا مينگو اسكەري ۇكىمەتىنىڭ سوعىس كەزىندەگى باس سىليىڭى بولادى. حۋاڭ شيڭنىڭ قولباسشىلىعىندا كوتەرىلىسشى قوسىن حانكۋ مەن حانياڭدا چيڭ ۇكىمەتى ارمياسىمەن قاندى شايقاس جاساپ، ءبىر ايدان ارتىق ۋاقىت تىرەسىپ، ولكەلەردىڭ ۋچاڭ كوتەرىلىسىنە ءۇن قوسىپ، دەربەستىك جاريالاۋىنا ۋاقىت ۇتادى.
1911- جىلى 12- ايدىڭ ورتا شەنىندە، حۋاڭ شيڭ ولكەلەر ۋاكىلدەر ماجىلىسىندە اعا مارشالدىققا كورسەتىلەدى. الايدا حۋاڭ شيڭ سۇن جۇڭشاندى اعا مارشالدىققا تاعايىنداۋ كەرەك دەگەنگە تاباندى بولادى. توڭكەرىس بارىسىندا، حۋاڭ شيڭ قاشاندا سۇن جۇڭشاننىڭ باسشىلىق ورنىنا تاباندى بولىپ، قوسالقى رولدى ماقۇل كورىپ جۇرەدى. 1912- جىلى 1- ايدا، نانجيڭ ۋاقىتتىق ۇكىمەتى قۇرىلعاننان كەيىن، حۋاڭ شيڭ قۇرلىق ارمياسىنىڭ باستىقتىعىنا، قوسىمشا باس سانموۋجاڭدىعىنا تاعايىندالادى. 4- ايدا، حۋاڭ شيڭ نانجيڭدى قورعاۋعا قالادى، 6-ايدا، نانجيڭدى قورعاۋ مىندەتىنەن شەگىنەدى.
1913- جىلى 7- ايدىڭ 29- كۇنى، نانجيڭنىڭ يۋان شىكايدى جازالاۋ سوعىسى جەڭىلىسكە ۇشىراپ، حۋاڭ شيڭ شاڭحايدان شياڭگاڭعا كەتەدى، كەيىن جاپونياعا بارادى. پارتيا ءىشىنىڭ ىنتىماعىن نىعايتىپ، يۋان شىكايدى جازالاۋ ءۇشىن، حۋاڭ شيڭ 1914- جىلى 6- ايدىڭ سوڭىندا، ا ق ش سياقتى جەرلەرگە بارادى. وسى مەزگىلدە حۋاڭ شيڭ توڭكەرىسشىلەرگە تالاي رەت حات جازىپ، اسكەر باستاپ يۋان شىكايدى جازالاۋدى قۋزايدى.
1916- جىلى 7- ايدىڭ 8- كۇنى، ەلىمىزدەگى ءار سالانىڭ ۇسىنىسىمەن حۋاڭ شيڭ ەلگە ورالىپ، شاڭحايعا جەتەدى. الايدا، ول ۇزاق ۋاقىت قاتتى قالجىراعاندىقتان، 10- ايدىڭ 31- كۇنى ناۋقاس سەبەبىنەن شاڭحايدا 42 جاسىندا قازا بولادى، 1917- جىلى 4- ايدىڭ 15- كۇنى چاڭشاداعى يۋەلۋشان تاۋىندا مەملەكەتتىك جەرلەۋ وتكىزىلىپ، جەرلەنەدى.

بەرىپ كەت ورامالىڭدى

دوستار

الىستاعى اق ەركە