جاڭا حابارلار

«راقىمەت سىزدەرگە، تۋىسىمنىڭ بولعانى قانداي جاقسى

    كەلۋ قاينارى: شينجياڭ گازەتى    2018-04-28 16:37:11  

گۇما اۋدانىندا 4 جاستاعى اۋرۋ ۇل بالاعا  تۋىسى وپەراتسيا جاساپ ساقايتتى


 ءتىلشىمىز چاۋ جين
  4 - ايدىڭ 11 - كۇنى، ەندى عانا گۇما اۋدانى حالىق شيپاحاناسىنىڭ وپەراتسيا بولىمىنەن شىققان كىشكەنتاي ءالي ەسىك الدىندا سارىلا كۇتىپ تۇرعان اكەسىن كورگەندە، كىشكەنتاي الاقانىمەن اكەسىنىڭ كوز جاسىن ءسۇرتىپ، ءسابي داۋىسىمەن: اكە، جىلاماڭىز، شيپاگەر اعاي مەنى جازىلدىڭ دەيدى! - دەدى.
  بۇل 4 جاستاعى اليگە ءوز ومىرىندە 2 - رەت وپەراتسيا جاسالۋى ەدى. اۆتونوميالى رايون ۇلتتار ىنتىماعىنىڭ بەرەكەلى شاڭىراعى «تۋىستاسۋ اپتالىعى» قيمىلىن ورىستەتۋ بارىسىندا اۆتونوميالى رايوندىق حالىق شيپاحاناسى بالالار اۋرۋلارى ءبولىمىنىڭ ورىنباسار مەڭگەرۋشىسى حى جۇن مەن وسى شيپاحانانىڭ جانسىزداندىرۋ ءبولىمىنىڭ باس دارىگەرى ءادىلجان ابدوللا كىشكەنتاي ءاليدى تاۋىپ، 20 مينۋتتا عانا كىشكەنتاي ءاليدى 3 جىل 3 اي مازالاعان اۋرۋ ازابىنان ايىقتىرادى.
  كىشكەنتاي ءاليدىڭ اكەسى ابىليميت ساۋىر نە دەپ العىس ايتارىن بىلمەي، ەكى ماماننىڭ قولىن ۇستاپ تۇرىپ: بۇرىن ءبىز ۇرىمجىدەگى ۇلكەن شيپاحانالارعا بارىپ ەمدەلۋشى ەدىك، قازىر ۇلكەن شيپاحانانىڭ ماماندارى گۇما اۋدانىنا كەلىپ بالامدى اۋرۋدان ايىقتىردى. قانە، ءبىزدىڭ ۇيگە جۇرىڭىزدەر، ات سويىپ سىزدەردى قوناق قىلايىن! - دەدى. ابىليميتتىڭ ۇسىنىسىنا قايتا - قايتا راقىمەت ايىتقان حى جۇن: راسىندا قاجەتى جوق، ىنىشەك، بالا ساۋىقسا ءبىزدىڭ دە قۋانىشىمىز، - دەيدى.
  كىشكەنتاي ءاليدىڭ وتباسى گۇما اۋدانى قوستاۋ قالاشىعى قوستاۋ قىستاعىندا تۇرادى، اكە - شەشەسى تۇگەلدەي ديقان. ءبىر اپتانىڭ الدىندا ول ەندى عانا 4 جاسقا كەلگەن - دى. تاياۋدا شەشەسى تاعى جۇكتى بولىپ، بۇل وتباسى قۋانىش پەن جۇبانىشقا شومعان - دى. ءبىراق كىشكەنتاي ءاليدىڭ شابىنا جۇدىرىقتاي بولىپ تومپاق شىققانىن كورىپ، ونىڭ ۇنەمى وسى تومپاقتىڭ كەسىرىنەن ءجۇرىپ - تۇرۋى قيىنداعانىن ويلاعاندا، اكە - شەشەسى ۋايىمعا باتاتىن.
  قارنىنىڭ بۇلشىق ەتتەرى تۋادا جەتىلمەگەندىكتەن، كىشكەنتاي ءالي 9 ايلىق كەزىندە ەڭبەكتەپ جۇرگەندە قارنىنان ءبىر تومپاق شىعىپ، ەسەيگەن سايىن بۇل تومپاق ۇلعايىپ جۇدىرىقتاي بولىپ كەتكەن - دى.
  ابىليميت كىشكەنتاي ءاليدى كوتەرىپ الىپ، جەرگىلىكتى ورىنداعى شيپاحانالارعا تۇگەل اپارادى، سوڭىندا بالالار جارىق اۋرۋى دەگەن دياگنوز شىعارادى، بالانىڭ قارىن بۇلشىق ەتى جەتىلمەگەندىكتەن، كىشكەنە جارىق پايدا بولادى دا، بالا ەڭبەكتەسە، تۇرەگەلسە نەمەسە كۇشەنسە، جارىقتىڭ ماڭايىنداعى ىشەك وسى جارىقتان سىرتىنا شىعىپ الىپ، قولايسىزدىق تۋدىراتىن نەمەسە اۋىراتىن.
  ابىليميت: شيپاگەر بىزگە بالا 7 جاسقا كەلگەننەن كەيىن وپەراتسيا جاساۋعا بولادى دەدى، - دەيدى. كىشكەنتاي ءاليدىڭ اكە - شەشەسى ونى كوتەرىپ الىپ ۇيىنە قايتادى، كۇن سايىن ۇلكەيىپ بارا جاتقان جارىقتى كورىپ، نە ىستەرىن بىلمەي داعدارادى.
  كىشكەنتاي ءالي 2 جاسقا كەلگەندە، بارعان سايىن ۇلعايعان تومپاق ونىڭ قيمىل - قوزعالىسىنا ىقپال ەتىپ قانا قالماستان، ءسال تالپىنسا نەمەسە دەنەسى دۇرىس بولماي قالسا بولعانى شىرقىراپ جىلايتىن.
  كورشىلەرىنىڭ تانىستىرۋىمەن، كىشكەنتاي ءاليدىڭ اكە - شەشەسى ونى ءبىر حالىق باسقارۋىنداعى شيپاحاناعا اپارىپ وپەراتسيا جاساتىپ، قارنىنان 6 ميللي مەتر جەردى كەسىپ تاستايدى. وپەراتسيا ناتيجەسى ويداعىداي بولمايدى، وپەراتسيا جاساپ 15 كۇننەن كەيىن، كىشكەنتاي ءاليدىڭ قارنىنان تاعى تومپاق پايدا بولادى ءارى بارعان سايىن ۇلعايا تۇسەدى.  سونىمەن، كىشكەنتاي ءالي بالا باقشاعا باراتىن جاسقا كەلسەدە، ابىليميت ونى ۇيدەن شىعارماي، ونىڭ جىعىلىپ جارالانىپ قالۋىنان الاڭدايدى.  ءسويتىپ، ءبىر وتباسى شاراسىز قالعان كەزدە، ولارعا «ۇلتتار ىنتىماعىنىڭ بەرەكەلى شاڭىراعى» قيمىلى بارىسىندا اۆتونوميالى رايوندىق كوكىرەك قۋىسى شيپاحاناسىنداعى جۇپ قۇراعان تۋىسى ۇيىنە كەلىپ، كىشكەنتاي ءاليدىڭ جاعدايىن ۇعىسادى، تۋىسى قايتارىندا: قايتىپ بارعان سوڭ، مەن، ءسوز جوق، بالانى ەمدەيتىن مامان قاراستىرامىن! - دەپ كەتەدى.  ابىليميتتىڭ تۋىسى ۇرىمجىگە قايتىپ كەلگەن سوڭ، كىشكەنتاي ءاليدىڭ جاعدايى اۆتونوميالى رايوندىق حالىق شيپاحاناسى بالالار اۋرۋلارى ءبولىمىنىڭ ورىنباسار مەڭگەرۋشىسى حى جۇننىڭ قۇلاعىنا جەتەدى، «بالا دا قوستاۋ قالاشىعىندا ما؟ مەنىڭ تۋىسىم دا سوندا، مەن بارعان سوڭ ولارمەن حابارلاسايىن» دەپ، حى جۇن بۇل مىندەتتى وزدىگىنەن ۇستىنە الادى ءارى سۇراستىرىپ ءجۇرىپ كىشكەنتاي ءاليدىڭ اكە - شەشەسىنىڭ بايلانىس جاساۋ ءنومىرىن تابادى.
  ابىليميت قۋانىشتىڭ اياق استىنان بولارىن ويلاپ تا كورمەگەن - دى. 4 - ايدىڭ 9 - كۇنى ءوزىنىڭ تۋىسى ۇرىمجىگە قايتىپ بارىپ ءبىر اپتادان كەيىن، ول كەنەت ءبىر بەيتانىس تەلەفوندى الادى، تەلەفون بەرگەن حى جۇن ەدى. حى جۇن گۇما اۋدانى قوستاۋ قالاشىعى ازعانالدى قىستاعىنا تۋىسشىلاپ كەلە سالىسىمەن دەرەۋ ابىليميتپەن حابارلاسادى.  ءتىلماش ارقىلى بالانىڭ جاعدايىن نەگىزىنەن ۇققاننان كەيىن، حى جۇن گۇما اۋداندىق حالىق شيپاحاناسىمەن بايلانىس جاساپ، بۇل شيپاحانانىڭ وپەراتسيا جاساۋعا شارت - جاعدايى كەلەتىندىگىن تۇراقتاندىرادى. حى جۇن ابىليميتكە دەرەۋ كىشكەنتاي ءاليدى گۇما اۋداندىق حالىق شيپاحاناسىنا اكەلدىرەدى. حى جۇننىڭ: «وپەراتسيا كىشكەنە، الاڭسىز بولىڭىز» دەگەن ءسوزىن ەستىگەن ابىليميتتىڭ كوڭىلى ورنىعا تۇسەدى.
  4 - ايدىڭ 11 - كۇنى ساعات 13تە، كىشكەنتاي ءاليدى وپەراتسياعا الىپ كىردى، بالاعا جاسالاتىن وپەراتسيا جەڭىل بولۋ ءۇشىن، حى جۇن اۋىرتپايتىن قۇرساق قۋىسىنا اينامەن وپەراتسيا جاساۋ بەكىمىنە كەلەدى. جەرگىلىكتى شيپاحانانىڭ بۇرىن بالاعا بۇل تۇردەگى وپەراتسيانى جاساپ كورمەگەندىگىن ەسكەرە وتىرىپ، حى جۇن ارناۋلى ۇلتتار ىنتىماعىنىڭ بەرەكەلى شاڭىراعى «تۋىستاسۋ اپتالىعى» قيمىلىندا وزىمەن بىرگە كەلگەن قىزمەتتەسى ءادىلجان ابدوللانى شاقىرىپ الىپ، وپەراتسيا كەزىندەگى بالانىڭ ءتۇرلى ناۋقاس بەلگىلەرىنىڭ تۇراقتىلىعىنا كەپىلدىك ەتەدى.
  وپەراتسيا باستالدى. وپەراتسيا ايناسىن قارىن قۋىسىنا سالعاندا، حى جۇن بالانىڭ وڭ جاق شابىنداعى جارىقتى جاماۋدان سىرت، بالا قۇرساعىنىڭ سول جاعىندا تاعى ءبىر جاسىرىن جارىقتىڭ بارلىعىن بايقايدى. حى جۇن ەكىلەنبەستەن وپەراتسيا بارىسىندا بۇل جارىقتى دا تىگىپ تاستايدى. حى جۇن: بالاعا كومەسكى قاتەر قالدىرۋعا بولمايدى، - دەيدى.  ەكى جاقتاعى جارىقتى جاماۋعا نەبارى 20 مينۋت عانا ۋاقىت كەتتى، بالانىڭ قارنىندا ءبىر ميللي مەترلىك تەسىك پەن ەكى ينەنىڭ ورنى عانا قالدى. حى جۇن: بۇل ارادا وپەراتسيا جابدىقتارى تاپشى، ەگەر ءبىزدىڭ شيپاحانادا جاساسا، مىناداي تەسىك قالماس ەدى، - دەدى ءبىراز وكىنگەندەي.
  بالاسىنىڭ وپەراتسيادان امان - ەسەن شىققانىن بىلگەن سوڭ، 29 جاستاعى ابىليميتتىڭ كوز جاسى مولتەڭدەپ، حى جۇندى قاپسىرا قۇشاقتاي الىپ، اسەرلەنگەنىنەن: راقىمەت سىزدەرگە، تۋىسىمنىڭ بولعانى قانداي جاقسى! - دەدى.
  وپەراتسيا جاساپ بولعاننان كەيىن، حى جۇن مەن ءادىلجان اسىعىس - ۇسىگىس قىستاققا قايتىپ، ءوز تۋىستارىنا امانداسۋعا كەتتى.


بەرىپ كەت ورامالىڭدى

دوستار

الىستاعى اق ەركە