جاڭا حابارلار

تاس جول قۇرىلىسىن ىلگەرلەتىپ، ەسىك اشا دامۋدى جەبەيىك

    كەلۋ قاينارى: شينجياڭ حالىق راديو ىستانسياسى    2018-05-26 18:48:19  
ستانسيامىزدىڭ تىلشىلەرى جين لەي مەن ۋاڭ يىڭ جازعان اقپاراتتىق ارناۋلى حابار: رايونىمىز تاس جول نەگىزگى قۇرىلىعى قۇرىلىسىن تەزدەتىپ، ۇزدىكسىز كەمەلدەنىپ ساپالانعان قاتىناس جول تورابى بۇقارانىڭ سىرتقا شىعۋىنا قولايلىلىق جاساۋدان سىرت، رايونىمىزدىڭ ەكونوميكاسى مەن قوعامىنىڭ دامۋىن جەبەدى.
5-ايدىڭ 23-كۇنى، ءتىلشى ءۇرىمجى-كۇيتۇن جوعارى قارقىندى تاس جولىنىڭ 4 اۆتوموبيل جولىن 8 اۆتوموبيل جولىنا كەڭەيتۋ قۇرىلىس نىسانىنىڭ قۇتىبي بولەگىنەن، ءىرى تۇرپاتتى تيەۋ اۆتوموبيلدەرىنىڭ توپىراق ماتەريالدارىن ارلى-بەرلى تاسىپ، جول تاپتاۋىشتىڭ جولدىڭ نەگىزگى قاباتىن قايتا-قايتا تاپتاپ، قاربالاس قۇرىلىس جۇرگىزىپ جاتقانىن كوردى. ءۇرىمجى-كۇيتۇن جوعارى قارقىندى تاس جولىنىڭ كەڭەيتىپ وزگەرتىپ سالۋ ينجەنەرياسىنىڭ ءۇشىنشى توقتام بولەگىنىڭ جاۋاپتىسى ۋ فۋچاڭ: « قازىر قۇرىلىستى شۇعىل جۇرگىزىپ، بيىلعى وڭتۇستىك پەن سولتۇستىك ەكى جاقتاعى قاتىناس جولىن وزگەرتۋدىڭ بەرىك نەگىزىن قالايمىز. جوسپارداعى قۇرىلىس مەرزىمى ءۇش اي ىلگەرلەپ، 2019-جىلى 7-ايدىڭ 30-كۇنى قۇرىلىس تولىق اياقتايدى»،-دەدى.
جياڭ دۋچيڭ اتتى شوفەر: «مەن شىحىزىلىق شوفەرمىن، ۇنەمى شىحىزى مەن قۇتىبي اراسىندا قاتىنايمىن. ءۇرىمجى-كۇيتۇن جوعارى قارقىندى تاس جولىنىڭ 4 اۆتوموبيل جولىن 8 اۆتوموبيل جولىنا وزگەرتۋ قۇرىلىسى اياقتاعاننان كەيىن، شوفەرلەرگە قاتىناس قولايلىلىعىن جاراتادى»،-دەدى.
وتكەن التى جىلدا، رايونىمىزدا تىڭنان ارتقان جوعارى قارقىندى تاس جولدىڭ ۇزىندىعى 3 مىڭ 119 كيلومەترگە جەتىپ، 14 ايماق-وبلىس-قالا جوعارى قارقىندى تاس جولدى تۇتاستىرۋدى نەگىزىنەن جۇزەگە اسىردى. اقسۋدان قاشقارعا، ميڭشۇيدەن قۇمىلعا دەيىنگى تاس جول سياقتى 17 جوعارى قارقىندى تاس جولدا ىركەس-تىركەس اۆتوموبيل قاتىناۋىنا بايلانىستى، جىبەك جولى ەكونوميكالىق بەلدەۋىنىڭ سولتۇستىك، ورتا، وڭتۇستىك سىندى ءۇش ۇلكەن ارناسى بىرتىندەپ قالىپتاسۋدا. مۇنان تىس، شينجياڭ شەكارا وتكەل تاس جول قۇرىلىسىنىڭ قارقىنى دا تەزدەپ، سانتاڭحۋدان تەمىرتام شەكارا وتكەلىنە دەيىنگى تاس جول، جەمەنەي شەكارا وتكەلى تاس جولى، قورعاس شەكارا وتكەلى تاس جولى سياقتى نىساندار ىركەس-تىركەس اياقتاپ، شينجياڭنىڭ جاپپاي اشىق جاڭا جۇلگە قالىپتاستىرۋىن ىلگەرلەتۋگە شارت-جاعداي ازىرلەدى. وتكەن جىلى «ەۆروپانىڭ باتىس بولەگى-جۇڭگونىڭ باتىس بولەگى تاس جولىنىڭ» جۇڭگو مەن قازاقستان ەكى ەلىندەگى تاس جول بولەگىندە اۆتوموبيل قاتىناپ، حالىقارالىق زات تاسىمالىنىڭ ۋاقىتى مەن وزىندىك قۇنى بارىنشا تومەندەدى. قورعاس جين-ي حالىقارالىق ساۋدا شەكتى سەرىكتەستىگىنىڭ باس جوراسى يۇي چىڭجۇڭ: «ەۆروپانىڭ باتىس بولەگى-جۇڭگونىڭ باتىس بولەگى تاس جولى اشىلعاننان كەيىن جەمىس-جيدەك، كوكونىس قورعاستان كەدەننەن ءوتىپ،قازاقستانعا جەتۋى ءتورت جارىم ساعاتقا قىسقاردى، بۇرىن سەگىز جارىم ساعاتتاي ۋاقىت جۇمسالۋشى ەدى، بۇل ءبىزدىڭ ەكسپورت كاسىپورىندارىمىزعا اسا زور قولايلىلىقتار اكەلدى»،-دەدى.
باس شۋجي شي جينپيڭ اۋىل-قىستاق تاس جول قۇرىلىسىنا وسكەلەڭ ءمان بەرىپ، كوپ رەت ماڭىزدى نۇسقاۋ كورسەتىپ، اۋىل-قىستاق تاس جولىن ويداعىداي سالۋدى، باسقارۋدى، قورعاۋدى جانە اينالىمعا سالۋدى تالاپ ەتتى. قازىرگە دەيىن رايونىمىزدىڭ اۋىل-قىستاق تاس جولىنىڭ جالپى ۇزىندىعى 122 مىڭ 800 كيلومەترگە، ءبىر مىڭ 24 اۋىل-قالاشىققا تاس جولدىڭ جەتۋ مولشەرى %100 كە جەتىپ، 9 مىڭ 999 قۇرىلىمدىق قىستاققا تاس جولدىڭ جەتكىزىلۋ مولشەرى %99.41 بولىپ، اۋىل-قىستاق تاس جولى ەگىنشى-مالشىلاردىڭ اۋقاتتانۋ جولىنا، باقىت جولىنا اينالۋدا. جۋىردا، شايار اۋدانى جاڭا ءمالى قالاشىعىنان يانتاقشار اۋىلىنا دەيىنگى تاس جولدى وزگەرتىپ سالۋ ينجەنەريا قۇرىلىسى جۇرىلۋدە، يانتاقشار اۋىلى پورتوعىراق قىستاعىنىڭ تۇرعىنى الاۋىش قۇربان بوس كەزىندە ۇنەمى وسى اراعا كەلىپ ينجەنەريانىڭ قارقىنىن كورەدى. ول: «بۇرىن بۇل جول ويلى-شۇڭعىر، ءجۇرۋ قيىن ەدى، كوپ ۇزاماي اسفاليت جول جاتقىزىلاتىنىن كورگەن كوپشىلىك وتە قۋاندى، بۇدان كەيىن سىرتقا شىعۋىمىز قولايلى بولا تۇسەدى، مۇنىڭ ءبىزدىڭ وندىرىسىمىزگە سەپتىگى زور، پارتيا مەن ۇكىمەتكە شەكسىز العىس ايتامىز»،-دەدى.
كوپتەگەن جوعارى قارقىندى تاس جول مەن مەملەكەتتىك، ولكەلىك نەگىزگى تاس جولداردىڭ سالىنىپ اۆتوموبيل قاتىناۋى ءار ۇلت بۇقاراسىنىڭ سىرتقا شىعۋىنا قولايلىق اكەلۋدەن سىرت، تاعى دا زات اينالىمى، ساياحات سياقتى كاسىپتەردىڭ دامۋىن جەبەدى. قۇمىل قالالىق قاتىناس-تاسىمال مەكەمەسى پارتگرۋپپاسىنىڭ شۋجيى باي جيانگو تىلشىگە، 2017-جىلدىڭ وزىندە قۇمىل قالاسىنداعى قاتىناس نىساندارىنا قوسىلعان قارجىنىڭ 15 ميلليارد 980 ميلليون يۋانعا جەتىپ، رەفورما جاساپ، ەسىك اشقان 40 جىلعا تاياۋ ۋاقىتتان بەرگى تاس جول قاتىناس قۇرىلىسىنا قوسىلعان قارجىنىڭ جيىنتىعىنا تۋرا كەلگەنىن، وتە-موتە، شينجياڭنىڭ شىعىستاعى ىشكى ولكەلەرمەن تۇتاسقان جوعارى قارقىندى تاس جول ءىرى ارناسى-مەملەكەتتىك تاس جول 7-لەنياسى بەيجيڭ-شينجياڭ جوعارى قارقىندى تاس جولىنىڭ تولىق وندىرىسكە قوسىلىپ، شينجياڭنان بەيجيڭگە دەيىنگى ارالىقتىڭ ءبىر مىڭ 300 كيلومەتر قىسقارعانىن، قۇمىل قالاسىنىڭ وڭىرلىك ابزالدىلىعى مەن توراپتىق رولىنىڭ بۇرىنعىدان دا كورنەكتىلەنگەنىن ايتا كەلىپ: «زات اينالىم وزىندىك قۇنى جاعىندا ءبىر توننالىق زاتتىڭ ءار كيلومەترىنە باعاسى 390 يۋان ارزانداپ، ءبىر مىڭ 300 كيلومەتر جەرگە ونداعان توننا جۇكتى تاسىعاندا ارزاندايتىن اقىسى ەرەكشە كوپ بولادى، بۇنىڭ ادامداردىڭ سىرت جەرلەرگە شىعۋى مەن زات اينالىمىن ىلگەرلەتەتىندىگى جانە جەبەيتىندىگى داۋسىز»،-دەدى.

بەرىپ كەت ورامالىڭدى

دوستار

الىستاعى اق ەركە