جاڭا حابارلار

ەزىلىپ - قانالعاندار ءۇشىن جانىن قيعان ليۋ يۋان - ان

    كەلۋ قاينارى: شينجياڭ گازەتى    2018-06-30 17:40:21  

ۇلتتىڭ گۇلدەنۋى جولىندا −قاھارماندار شەجىرەسى

 

شينحۋا اگەنتتىگىنىڭ ءتىلشىسى لي حاۋ 6 - ايدىڭ 27 - كۇنى شي - اننان حابارلايدى. «مەن قازىر قۇربانداردىڭ قاندى ءىزىن باسىپ جان قيۋ الدىندا تۇرمىن. مۇمكىندىگىمشە قۇلشىنىپ، ءوز تابىما ۇلەسىمدى قوستىم، پارتيامىزعا ۇلەسىمدى قوستىم». مىنە بۇل توڭكەرىستىك قۇربان ليۋ يۋان - اننىڭ قولعا تۇسكەننەن كەيىن ايەلىنە جازعان وسيەتىندەگى ءبىر اۋىز ءسوزى.
  ليۋ يۋان - ان 1895 - جىلى تۋعان، لاقامى جيان يۇي، شانشي ولكەسىنىڭ شيانياڭ دەگەن جەرىنەن. ول 1908 - جىلى اكەسىنە ەرىپ نانچاڭعا قونىس اۋدارىپ، داتۇڭ ورتا مەكتەبىندە وقيدى. 1911 - جىلى شينحاي توڭكەرىسى تۋىلعاننان كەيىن وقۋدى تاستاپ نانجيڭگە بارىپ، سۇن جۇڭشاندى جاقتايدى. وقۋشىلار ارمياسىنا قاتىناسىپ، يۋان شىكايدى ايىپتايدى، كەيىن ءبىر مەزگىل سىچۋان ارمياسىندا قىزمەتتە بولادى. 1923 - جىلدىڭ باسىندا ول كوممۋنيست يۇن داييىڭ چىڭدۋدا ۇيىمداستىرعان «شۋەشيڭ ليجينحۇي قوعامىنا» قاتىناسىپ، «ليجين اپتالىق جۋرنالىن» شىعارىپ، توڭكەرىستىك يدەيانى ۇگىتتەدى. كەيىن تاعى دا «رۇڭشى قوعامىن» قۇرىپ، مۇشەلەرىن 20 ادامنان اسىردى، بۇل قوعامعا يۇن داييىڭ نەگىزگى جاۋاپتى، ليۋ يۋان - ان ناقتى جەتەكشى بولدى.
  1925 - جىلى شاڭحايدا ۋ - سا قاندى دەلوسى تۋىلعاننان كەيىن، ليۋ يۋان - ان ي - بيندە قۇرىلعان «شۇيجوۋ ۋ - سا قاندى دەلوسى كومەكتەسۋ قوعامىنا» جاۋاپتىلاردىڭ ءبىرى بولىپ، بۇقارانى باستاپ يمپەرياليزمگە قارسى تۇرىپ وتانشىلدىق كۇرەس جۇرگىزدى، كوپ وتپەي جۇڭگو كوممۋنيستىك پارتياسىنا قابىلداندى. وسى جىلى قىستا سىچۋانداعى ءبىر ءبولىم كوممۋنيستەر چۇڭچيڭدەگى جۇڭفا داشۋەسىندە قۇپيا ءماجىلىس اشىپ، ج ك پ چۇڭچيڭ جەرگىلىكتى اتقارۋ كوميتەتىن رەسمي قۇردى، ليۋ يۋان - ان اتقارۋ كوميتەتىنىڭ مۇشەسى، قوسىمشا چىڭدۋداعى ەرەكشە ياچەيكانىڭ شۋجيى بولدى. چىڭدۋدا ول گازەت شىعارۋداي قوعامدىق قىزمەتپەن اينالىستى، كەيىن سىچۋان ولكەلىك كەڭەستىڭ حاتشىسى بولىپ تاعايىندالدى.  1926 - جىلى قىستا ليۋ يۋان - ان سىچۋان ارمياسىندا سوعىستىق تاسىمال قىزمەتىن ورىستەتىپ، ليۋ بوچىڭ سياقتى باسشىلار جەتەكشىلىك ەتكەن لۋجوۋ شۇنچيڭ كوتەرىلىسىنە سايكەستى. ول چىن شۋنۇڭنىڭ قوسىنىندا شى ساياسي ءبولىمى ۇگىت ءبولىمىنىڭ جۇڭشياۋ دارەجەلى باستىعى مىندەتىن، قوسىمشا وفيتسەرلەر تاربيەلەۋ تۋانىنىڭ ساياسي تاربيەشىسى مىندەتىن اتقاردى.
  ۇلى توڭكەرىس ساتسىزدىككە ۇشىراعاننان كەيىن، ليۋ يۋان - ان چىڭدۋدا پارتيانىڭ قۇپيا ۇيىمىنا باسشىلىق ەتىپ گومينداڭ كەرتارتپاشىلارىمەن باتىل كۇرەس جۇرگىزدى. 1927 - جىلى 9 - ايدان باستاپ ىلگەرىندى - كەيىندى ج ك پ سىچۋان ولكەلىك ۋاقىتشا كوميتەتىنىڭ باس حاتشىسى جانە ولكەلىك كوميتەت ۇگىت ءبولىمىنىڭ مەڭگەرۋشىسى، ۇگىت قىزمەتى كوميتەتىنىڭ شۋجيى بولدى. 1928 - جىلى 4 - ايدا ج ك پ سىچۋان ولكەلىك ۋاقىتشا كوميتەتىنىڭ ۋاقىتشا شۋجيى مىندەتىن وتەدى. وسى جىلى 6 - ايدا ماسكەۋگە بارىپ پارتيانىڭ 6 - قۇرىلتايىنا قاتىناسىپ، ج ك پ 6 - كەزەكتى ورتالىق كوميتەتىنىڭ تولىقتىرىپ سايلانعان مۇشەسى بولدى. 6 - قۇرىلتايدان كەيىن، ليۋ يۋان - ان سىچۋان ولكەلىك كوميتەتتىڭ قايتا قۇرۋ قىزمەتىنە باسشىلىق ەتتى.
  1929 - جىلى 2 - ايدا چىڭدۋدا ۋاقىتشا ولكەلىك كوميتەتتىڭ كەڭەيتىلگەن ءماجىلىسى اشىلىپ، ليۋ يۋان - ان پارتيا 6 - قۇرىلتايىنىڭ رۋحىن جەتكىزدى، ءماجىلىس ليۋ يۋان - اندى ج ك پ سىچۋان ولكەلىك ۋاقىتشا كوميتەتىنىڭ شۋجيلىگىنە رەسمي سايلادى. 1929 - جىلى 4 - ايدا ول ۋانيۋان اۋدانىنىڭ گۋجۇنبا دەگەن جەرىندە كوتەرىلىس جاساۋعا باسشىلىق ەتىپ، سىچۋاننىڭ باتىس رايونىندا قارۋلى كۇرەستىڭ تۋىن تىكتى. وسى جىلى 6 - ايدا، كۋاڭ جيشۇن، لو شىۋىن قاتارلىلار قوزعاعان سىچۋان ارمياسى 28 - جۇنى 7 - قۇراما لۇيىنىڭ سۇينيڭ قالاسى فىڭشي اۋدانىنداعى كوتەرىلىسىنە باسشىلىق ەتىپ، ج ك پ سىچۋان جۇمىسشى - ديقان قىزىل ارمياسى 1 - باعىت باس قولباسشىلىق شتابىن قۇردى. ج ك پ سىچۋان ولكەلىك كوميتەتى رەسمي قۇرىلعاننان كەيىن، ليۋ يۋان - ان ولكەلىك كوميتەتتىڭ شۋجيلىگىنە تاعايىندالدى.
  1930 - جىلى 5 - ايدىڭ 5 - كۇنى ساتقىننىڭ وپاسىزدىق جاساۋىمەن ليۋ يۋان - ان چۇڭچيڭدە قولعا تۇسەدى. ميليتاريست ليۋ شياڭ ليۋ يۋان - اننىڭ دارىندىلىعى مەن ونىڭ پارتيامىزداعى ورنىن ابدەن بىلەتىندىكتەن، «يۋانجاڭ»، «تيڭجاڭ» سياقتى ۇلكەن ءمانساپ جانە ايىنا 200 تەڭگە ەڭبەكاقى بەرۋ شىرعاسىمەن ونى توڭكەرىستەن قول ءۇزىپ، كوممۋنيستىك پارتيادان شەگىنۋگە يلاندىرماقشى بولدى. ليۋ يۋان - ان كەرتارتپا ميليتاريستىك بيلىكتىڭ تىزە بۇگۋگە ۇندەپ، مۇددەمەن شىرعالاۋىن جانە ءولىم قاتەرىن كولدەنەڭ تارتقانىن باتىل تويتارىپ، كوممۋنيستەردىڭ وسكەلەڭ قاسيەتىن ساقتادى. ول كەرتارتپالاردىڭ تىزە بۇگۋگە ۇندەۋىنە قاراتا: «سەنىمىمىز ۇقساماسا، جولداس بولۋىمىز ەكىتالاي. كوممۋنيستىك پارتيانىڭ ىزدەگەنى اقيقات، كوممۋنيزم تاريحتىڭ تابيعي بەتالىسى. بۇل تۇيىق جول ەمەس، نۇرلى جول!»، - دەدى.
  5 - ايدىڭ 6 - كۇنى جاۋلاردىڭ اسكەري سوتىندا ليۋ يۋان - ان تۇك بولماعانداي سوتتى لەكسيا مىنبەسى ەتىپ، پارتيانىڭ دارىپتەمەسى مەن كوممۋنيزمنىڭ اقيقاتىن ۇگىتتەدى. جاۋدىڭ اسكەري سوتشىسى ونىڭ اتى - ءجونى مەن قىزمەتىن سۇراعان كەزدە، ليۋ يۋان - ان كوكىرەك كەرە، تايسالماستان: «بۇكىل دۇنيە ءجۇزى پرولەتارلارىنىڭ جاۋىنگەرى، جۇڭگو كوممۋنيستىك پارتياسىنىڭ مۇشەسى، سىچۋان ولكەلىك كوميتەتتىڭ شۋجيى ليۋ يۋان - انمىن»، - دەپ جاۋاپ بەرەدى. جاۋلاردىڭ تىزە بۇگۋگە ۇندەۋىن تويتارىپ جانە سوت ۇستىندە بەلدەسكەننەن كەيىن، ليۋ يۋان - ان جاۋلاردىڭ ءوزىن ءتىرى قويماسىنا كوز جەتكىزەدى. اتىلاردان ءبىر كۇن بۇرىن ول ايەلى مەن جەزدەسىنە وسيەت جازادى، اقتىق دەمىندە جان جارىن جىگەرلەندىرۋدى ۇمىتپاي، «قايعىرماي، قۇلشىنا قىزمەت ىستەگەيسىڭ، مەنىڭ ارۋاعىم ءار ۋاقىت جۇڭگو توڭكەرىسىنىڭ جەڭىسكە جەتۋىن ءتورت كوزبەن كۇتەدى، ال سەن وسى توڭكەرىسكە قۇلشىنا قىزمەت ەتەتىن جاۋىنگەردىڭ ءبىرىسىڭ!» دەپ جازادى.
  1930 - جىلى 5 - ايدىڭ 7 - كۇنى ليۋ يۋان - ان «جۇڭگو كوممۋنيستىك پارتياسى جاساسىن»، «كوممۋنيزم جاساسىن» دەپ اسقاق ۇران شاقىرىپ، ەرلىكپەن قۇربان بولادى، سول جىلى 35 جاستا ەدى.
  بۇگىنگى كۇندە ليۋ يۋان - اننىڭ جەزدەسىنە جازعان وسيەتى چۇڭچيڭدەگى سانشيا مۇراجايىندا ساقتاۋلى تۇر، بۇل وسيەت حاتتىڭ ۇزىندىعى 29 سانتيمەتر، ەنى 24 سانتيمەتر بولىپ، قىل قالاممەن جازىلىپتى، ول سان وزگەرىستى باستان كەشىرسەدە، ءالى دە باياعىسىنداي سەنىمنىڭ ساۋلەسىن شاشىپ تۇر. «ءوزىم ءۇشىن ومەشەگىم ۇزىلمەيدى، ەزىلىپ - قانالعاندار ءۇشىن جانىم قۇربان» دەگەن ليۋ يۋان - اننىڭ اۋەلگى ماقساتى مەن ارمانى تاريحتى ارتقا تاستاپ كەيىنگى ۇرپاقتاردى جىگەرلەندىرۋدە.


بەرىپ كەت ورامالىڭدى

دوستار

الىستاعى اق ەركە