جاڭا حابارلار

جارىم عاسىردان ارتىق جالعاسقان سۇيىسپەنشىلىك

    كەلۋ قاينارى: شينجياڭ حالىق راديو ىستانسياسى    2018-07-11 18:37:19  
قۇمىل راديو ستانسياسىنىڭ ءتىلشىسى ما جيڭجيڭ مەن جياڭ حۇڭشيانىڭ حابارى: تاياۋدا، قۇمىلداعى 74 جاستاعى زەينەتكەر جۇمىسشى ابەيدۋ اكەسىنە قول ۇشىن بەرگەن قامقورشى ۋاڭ شياڭلياندى 53 جىل ىزدەپ، اقىرى تاپتى، ءسويتىپ، جارتى عاسىر اتتاعان وسى ءبىر ۇلتتار ىنتىماعى سۇيىسپەنشىلىگى قايتا جالعاندى.
«باۋىرى اپەكەسىن تاپتى، اپەكەسى دە باۋىرىنا كەزدەستى، 50 نەشە جىل ۇزىلگەن سۇيىسپەنشىلىك قايتا جالعاندى».
7-ايدىڭ 8-كۇنى كەشكى ساعات 8 دە، ابەيدۋ مەن قىزىنىڭ وتباسىنداعىلار تەلەۆيزوردى قورالاي وتىرىپ، ورتالىق تەلەۆيزيانىڭ «كۇت مەنى» اتىنداعى جاناشىر-جاقىندارىن ىزدەۋگە ارنالعان كولەمدى باعدارلاماسىن كوردى. شاشى بۋرىل تارتقان ۋاڭ شياڭليان ۇلكەن ەسىكتى ايقارا اشىپ، باعدارلاما ۇستىنە كىرگەن كەزى مەن ابەيدۋ ەكەۋىنىڭ ءبىرىن-ءبىرى قاپسىرا قۇشاقتاعان كەسكىنى شىققاندا، وتباسىنداعىلار تۇگەل كوزىنە ىستىق جاس الدى.
1965-جىلى 1-ايدا، ابەيدۋ كوپ ورىندا بولاتىن ەت وسپە ناۋقاسىنا شالدىققان اكەسىن قۇمىل شيپاحاناسىنان شىعارىپ، پويەزگە وتىرىپ دۇربەجىن ەگىس الاڭىنا قايتىپ بارا جاتقاندا، شينجياڭعا تۋىسشىلاي كەلگەن شي-انداعى ءبىر اسكەري مەديتسينا مەكتەبىنىڭ وقۋشىسى ۋاڭ شياڭليانعا كەزىگەدى. ابەيدۋ بىلاي دەدى: « ۇستىنە اسكەري كيىم كيگەن ءبىر بويجەتكەن كەلىپ، بىزدەن قايدا باراتىنىمىزدى، اكەمنىڭ نەگە سۇلىق جاتقانىن سۇرادى، مەن اكەمنىڭ ورنىنان تۇرا المايتىنىن، ناۋقاس كورسەتۋگە كەلگەن ءجايىمىزدى، ايتتىم، سوندا ول: بۇل ناۋقاستى ەمدەتۋدىڭ ۋاقىتىن سوزۋعا بولمايدى، ءسوز جوق، جاقسى ەمدەتىڭدەر»، ــ دەدى، ول ءبىزدىڭ مەكەن-جايىمىزدى سۇراپ: «ەگەر ۇرىمجىدەگى مەدەتسينا ينيستيتۋتىنا بارساڭدار، الدىن الا حابارلاسىڭدار، ۋاقىت كۇتىپ تۇرمايدى»، ــ دەدى.
دۇربەجىن ەگىس الاڭىنا قايتىپ بارىپ كوپ وتپەي، ابەيدۋدىڭ اكەسى ويلاماعان جەردەن ۋاڭ شياڭلياننىڭ جازعان العاشقى حاتىن تاپسىرىپ الادى. حاتتا ول شينجياڭ مەدەتسينا ينيستيتۋتىمەن بايلانىس جاساپ قويعانىن ايتىپتى، ونىڭ ۇستىنە حاتتىڭ اراسىنا قىسىپ 20 يۋان اقشا دا سالىپ جىبەرىپتى. ءسويتىپ، ابەيدۋ اكەسىن ەرتىپ ءۇرىمجى قالاسىنا كەلەدى. ۋاڭ شياڭلياننىڭ كومەگىندە، ونىڭ شينجياڭ مەديتسينا ينيستيتۋتىندا ناۋقاس كورسەتۋى وتە ءساتتى بولادى. الايدا شيپاحانانىڭ شارت-جاعدايى شەكتى بولعاندىقتان، اكەسىنىڭ ىشكى ولكەگە بارىپ جالعاستى ەمدەلۋىنە تۋرا كەلەدى. ۋاڭ شياڭليان تاعى ولارعا شي-انداعى ءبىر شيپاحاناعا بايلانىس جاساپ بەرەدى، ءارى مامانداردى قايتالاي تەكسەرۋگە ۇسىنىس ەتەدى، تاعى ابەيدۋدىڭ اكەسىنىڭ ناۋقاسى بۇكىلدەي جازىلعانعا دەيىن ەمدەۋ قاراجاتىن كەشىرىم ەتەدى. ءدال وسى كەزدە ۋاڭ شياڭليان اسكەري بولىمگە ىلەسىپ، شىعىس سولتۇستىككە كەتەدى، سول كەزدەردە، ول اكەلى-بالالى ابەيدۋمەن حات ارقىلى حابارلاسىپ تۇرادى، ءار جولى حات جازعاندا، ۋاڭ شياڭليان حاتتىڭ اراسىنا اقشا قىستىرىپ جىبەرەدى. 4 ايدا، ۋاڭ شياڭليان ولارعا جيىنى 15 پارشا حات جازىپ، حاتپەن قوسىپ 140 يۋان اقشا جىبەرەدى.
1966-جىلدان كەيىن، ۋاڭ شياڭليان مەن اكەلى-بالالى ابەيدۋ اراسىنداعى حات-حابارى ۇزىلەدى، سودان باستاپ حابارسىز كەتەدى. 1981-جىلى، ابەيدۋدىڭ اكەسى كوز جۇماردا ۇلىنا قامقورشىسى ۋاڭ شياڭلياندى،ءسوز جوق، تابۋدى تاپسىرادى. ابەيدۋ بىلاي دەدى : «1981-جىل اكەم دۇنيەدەن وتەر شاعىندا تىلگە ارەڭ كەلىپ: «ۇلىم، ۋاڭ شياڭليان بىزگە قامقورلىق جاسادى، بىزگە بەرگەن اقشاسىن دا قايتارعان جوقپىز، كەزدەسىپ العىس تا ايتا المادىق»، ـــ دەدى، مەن: «اكە الاڭسىز بولىڭىز، مۇنى ماعان تاپسىرىڭىز، مەن، ءسوز جوق، ۋاڭ شياڭليانمەن كەزدەسىپ، العىسىمدى بىلدىرەمىن دەدىم».
اكەسى دۇنيەدەن وتكەننەن كەيىن، ابەيدۋ اكەسىنىڭ كوز جۇماردان بۇرىنعى وسيەتىن ەسىنە ساقتاپ، اقپارات قۇرالدارىنان تالاي رەت كومەك سۇرايدى، سوڭىندا ورتالىق تەلەۆيزياعا ىزدەپ باردى. بيىل 3-ايدا، ورتالىق تەلەۆيزيانىڭ «كۇت مەنى» اتىنداعى باعدارلاماسى تەلەفون بەرىپ، ۋاڭ شياڭلياندى ىزدەۋگە كومەكتەسەتىنىن ايتادى. 4-ايدىڭ باسىندا، ابەيدۋ باعدارلامانى كەسكىنگە الۋ ورنىندا، ەسىك اشىلعان ساتتە، تۇتقيىل كەلگەن قۋانىشقا كۋا بولادى، ابەيدۋ مەن ۋاڭ شياڭليان ەكەۋى ءبىرىن-ءبىرى قاتتى قۇشاقتادى. ۋاڭ شياڭليان بىلاي دەدى: «ەرەكشە راحمەت ايتقىم كەلەدى، قاتتى قۋانىپ تۇرمىن، مەنىڭ ىستەگەن ماردىمسىز ىسىمە بولا ونىڭ وتباسى مەنى تۋپ-تۋرا 53 جىل ىزدەپتى. مەن 80 گە كەلدىم، بالامدى ەرتىپ ولارعا امانداسىپ بارايىن دەپ تۇرمىن، ولار باردا، مەنىڭ شينجياڭدا دا ءبىر ءۇيىم بار بولدى».

بەرىپ كەت ورامالىڭدى

دوستار

الىستاعى اق ەركە