جاڭا حابارلار

«نەسيەنىڭ» استارىنداعى كورشىلەر سۇيىسپەنشىلىگى

    كەلۋ قاينارى: شينجياڭ گازەتى    2018-08-04 20:09:19  

كورلا كەشكى گازەتىنىڭ ءتىلشىسى چىن يانچياڭ
العان

نەسيەنى قايتارۋ − بۇلجىماس قاعيدا. الايدا، ەسكى - قۇسقى جيناۋشى جين بيڭ مەن ۋاڭ يۇيفاڭ ەرلى - زايىپتىلار نەسيەگە العان 2000 يۋاندى 18 جىل قايتارسا دا الىگە دەيىن قايتارىپ بولا المادى، بۇل ولاردىڭ 18 جىلدان بەرگى ۋايىمى. 

 7 - ايدىڭ 29 - كۇنى كورلا قالاسىنداعى پەنسيونەر وقىتۋشى حاتام نەسىپتىڭ ۇيىندە ۋاڭ يۇيفاڭ نەسيە قايتارۋدى تاعى ءبىر رەت ايتتى، ءبىراق حاتام كۇلە تۇرىپ باسىن شايقاپ: كۇيەۋىم كوزى تىرىسىندە بۇل اقشانى الۋىڭا بولمايدى دەگەن، سوندىقتان مەن بۇل اقشانى استە المايمىن، - دەدى.  حاتامنىڭ كۇيەۋى زياۋدۇن رىشيت كوزى تىرىسىندە كورلا قالالىق قوعام حاۋىپسىزدىگى مەكەمەسىنىڭ پەنسيونەر حالىق ساقشىسى بولاتىن. جين بيڭ مەن ۋاڭ يۇيفاڭ ەكەۋى گانسۋدىڭ لينتاۋ اۋدانىنىڭ ادامى، وتكەن عاسىردىڭ 90 - جىلدارىنان بەرى ەسكى - قۇسقى جيناۋمەن ءومىر كەشىپ كەلەدى.  نەسيە الۋ اڭگىمەسىن وسىدان 18 جىلدىڭ الدىنان باستاۋعا تۋرا كەلەدى. 2000 - جىلى جين بيڭ مەن ۋاڭ يۇيفاڭنىڭ كورلا قالاسى تەكەشى اۋىلى حالپيىرىعى قىستاعىنداعى جالعا العان ۇيىنە ءورت كەتىپ، 5000 يۋان اقشاسى مەن بارلىق مال - مۇلكىنەن ايرىلىپ، تۇرمىستارى مۇشكىل حالگە ءتۇسىپ، ءبىر ءۇيلى جاننىڭ ىشەر اس، تۇرار ءۇيى ماسەلەگە اينالادى. سول كەزدە زياۋدۇن مەن جين بيڭ كورشى وتىراتىن، جين بيڭ وتباسىنا تۇسكەن وقيات حالدى كورگەننەن كەيىن، زياۋدۇن مەن ايەلى ولاردىڭ قيىنشىلىقتان وتۋىنە اقشالاي كومەك كورسەتتى.

  «كۇيەۋىم ولار جاڭادان ءۇي جالداۋى، تۇرمىس بۇيىمدارىن ساتىپ الۋى كەرەك، سوندىقتان 2000 يۋان بەرەيىك دەدى، مەن ماقۇل بولدىم»، - دەدى حاتام ەسكە الىپ. 

 «ەلدىڭ اقشاسىن ءاي - ءشاي جوق قالاي الامىز؟ نەسيە دەپ بەرسە دە ۇلكەن قامقورلىق قوي»، - دەيدى ۋاڭ يۇيفاڭ. سونىمەن كۇيەۋى ەكەۋى اقشانى العاننان كەيىن: بۇل اقشانى ءبىز قالايدا قايتارامىز، - دەيدى.  جين بيڭ مەن ۋاڭ يۇيفاڭ اقشانى قايتارۋدى قايتا - قايتا ايتا بەرگەننەن سوڭ، زياۋدۇن ايەلىنە: ول ءۇيدىڭ ادامدارىنىڭ قيىنشىلىعى كوپ، سوندىقتان اقشانى المايىق! - دەپ ارنايى قاداعالايدى.  جين بيڭ مەن ۋاڭ يۇيفاڭ زياۋدۇن كومەككە بەرگەن اقشامەن باسقا جەردەن جاڭادان ءۇي جالعا الىپ، ەسكى - قۇسقى تەرىپ كۇنەلتۋدى جالعاستىرادى. وسىدان كەيىنگى بىرنەشە جىلدا بالالارىنىڭ وقۋعا تۇسۋىنە، ەكى جاقتىڭ قارتايعان اتا - اناسىن ەمدەتۋگە تۇگەلدەي اقشا قاجەت بولعاندىقتان، جين بيڭ مەن ۋاڭ يۇيفاڭنىڭ تۇرمىسى تارشىلىقتا وتەدى دە، الگى 2000 يۋان نەسيە اقشانى قايتارىپ بولا المايدى.  2005 - جىلى جين بيڭ مەن ۋاڭ يۇيفاڭ اۋىلىندا شۇعىل شارۋا شىعىپ اسىعىس گانسۋگە قايتادى. 2 جىلدان كەيىن كورلاعا قايتىپ كەلگەن ولار زياۋدۇن وتباسىنىڭ قىستاقتان كوشىپ كەتكەندىگىن بايقايدى. قامقورشىلارىنان كوز جازىپ قالعان جين بيڭ ەرلى - زايىپتىلار قاتتى ابىرجىپ، ەسكى - قۇسقى جيناۋ جۇمىستارىن جالعاستىرا ءجۇرىپ زياۋدۇن وتباسىن ىزدەستىرەدى. جين بيڭ مەن ۋاڭ يۇيفاڭ ساۋاتسىز بولاتىن، ەستەرىندە قامقورشىلارىنىڭ ساقشى ەكەندىگى عانا قالادى. ولاردىڭ ادام ىزدەۋ ءتاسىلى ەرەكشە، ساقشى كيىمىن كيگەن ادامدى كورسە بولدى: زياۋدۇن ەسىمدى ساقشىنى تانيسىڭ با؟ - دەپ سۇرايدى.  2012 - جىلى 7 - ايدىڭ ءبىر كۇنى، جين بيڭ مەن ۋاڭ يۇيفاڭ كوشەدەگى ساقشى كيىمىن كيگەن ەركىنجان ناجميدەننەن: سەن زياۋدۇن ەسىمدى ساقشىنى تانۋشى ما ەدىڭ؟ - دەپ سۇراستىرا باستايدى. ەركىنجان ولاردىڭ ءىستىڭ بارىسىن بايانداعانىن سابىرمەن تىڭداعاننان كەيىن: سەندەر مەنىڭ قايىن اتامدى ايتىپ تۇرعان سياقتىسىڭدار، - دەيدى. 

 ەركىنجان زياۋدۇننىڭ ەكىنشى قىزىنىڭ كۇيەۋى، كورلا قالالىق حالىق سوتى مەكەمەسىنىڭ ساقشىسى بولاتىن. 

 «كۇيەۋ بالامىز ەركىنجان تەلەفون سوعىپ، نەسيە قايتارۋ ءۇشىن اكەمدى ىزدەپ جۇرگەن 2 حانزۋ اعايىنعا جول - جونەكەي كەزدەسىپ قالعانىن ايتتى»، - دەيدى زياۋدۇننىڭ ۇلكەن قىزى باھارگۇل، ول دەرەۋ حاتامعا تەلەفون سوعىپ جاعدايدى ايتادى.  ەركىنجان جين بيڭ مەن ۋاڭ يۇيفاڭدى ەنەسى حاتامنىڭ ۇيىنە ەرتىپ كەلەدى، زياۋدۇننىڭ قايتىس بولعانىن ەستىپ، جين بيڭ مەن ۋاڭ يۇيفاڭ قاتتى جىلايدى.  جين بيڭ قالتاسىنان 2500 يۋان الىپ شىعىپ حاتامعا ۇسىنىپ: مىنا 2000 يۋان ءبىزدىڭ نەسيەمىز ەدى، 500 يۋان ءوسىمى، بۇل اقشانى قالايدا قايتارىپ الىڭىز، - دەيدى.  «بۇل اقشانى باستابىندا كومەك دەپ بەرگەنبىز، كومەككە بەرگەن اقشانى قالاي قايتارىپ الامىن!»، - دەيدى حاتام. بىرەۋى قايتارام دەپ، بىرەۋى المايمىن دەپ قاسارىسقان ەكەۋىنىڭ ورتاسىنا باھارگۇل ءتۇسىپ: نەسيە قايتارۋدى الدىمەن قويا تۇرىپ، كەيىن جاعدايلارىڭ جاقسارعاندا كورمەيسىڭدەرمە، - دەپ ارا اعايىندىق ەتەدى. 

 وسىدان كەيىن ەكى ءۇيدىڭ ادامدارى ءجيى بارىس - كەلىس جاساپ، انە - مىنە دەگەنشە 6 جىل وتە شىعادى. سول ارالىقتا جين بيڭ ەرلى - زايىپتىلار حاتامدى كورسە بولدى، نەسيە قايتارۋدى ايتا بەرەدى. «ولار اقشانى قايتارامىز دەۋمەن، شەشەم المايمىن دەۋمەن بولدى»، - دەيدى باھارگۇل. ەكى جاقتىڭ بۇل قاسارىسۋىن ول دا ابدەن تۇسىنەتىن. ونى قۋانتقانى بارىس - كەلىستىڭ جيىلەۋىمەن ەكى وتباسى ادامدارىنىڭ سۇيىسپەنشىلىگىنىڭ تەرەڭدەي تۇسكەندىگى بولدى. 

 تۇسكى تاماق سامسا، اسقان ەت... بۇل باھارگۇل مەن 3 ءسىڭلىسىنىڭ ەكى وتباسىنىڭ باس قوسۋىنا ىجداعاتپەن دايىنداعان تاماعى. ەكى وتباسىنىڭ 2012 - جىلى 7 - ايدا قايتا تابىسقانىن قۇتتىقتاۋ ءۇشىن ولار وسىدان كەيىن ءار جىلدىڭ 7 - ايىندا وسىنداي شاعىن كولەمدى باس قوسۋ وتكىزەتىن بولدى. 

 تاماقتان كەيىن حاتام جين بيڭ، ۋاڭ يۇيفاڭ ەكەۋىمەن ارقا - جارقا اڭگىمەلەستى. «ەكەۋىڭە ءبىر ۇسىنىس ايتايىن، بۇدان كەيىن نەسيە قايتارامىز دەگەندى ايتپاڭدار، ءبارىمىز ءبىر ءۇيلى جاندارمىز، ايتا بەرسەڭدەر جات كورگەن ەسەپتەلەسىڭدەر!»، - دەيدى حاتام.  جين بيڭنىڭ قۇلاعى اۋىرلاۋ ەدى، ۋاڭ يۇيفاڭ وعان جاقىنداپ: اپەكەمىز بىزگە نەسيە قايتارامىز دەگەندى ايتپاڭدار، جات بولىپ كەتەمىز دەيدى، - دەپ داۋىستاي سويلەدى.  «وندا قالاي بولادى، بۇل اقشانى قالايدا قايتارامىز!»، − دەپ جين بيڭ سەكىرىپ كەتتى. جين بيڭنىڭ شىنداپ قايتا باستاعانىن كورگەن ءبىر ءۇيلى جان كۇلكىگە باتتى.


بەرىپ كەت ورامالىڭدى

دوستار

الىستاعى اق ەركە