جاڭا حابارلار

   كوزگە پايدالى ازىقتار

    كەلۋ قاينارى: شينجياڭ حالىق راديو ىستانسياسى    2018-09-11 19:41:53  

 
     قۇرامىندا ۆيتامين A مول ازىقتار
  ۆيتامين A ادام دەنەسىنىڭ قالىپتى زات الماسۋىن ساقتاۋداعى نەگىزگى قورەك زات، ول كوز ءمۇيىز قابىعىنىڭ قۇرعاۋى مەن السىرەۋىنىڭ الدىن الىپ، كورۋ قۋاتىن ارتتىرادى. ادام دەنەسىندە ۆيتامين A كەمشىل بولسا كوز ءمۇيىز قابىعىنىڭ قابىنۋى، كوز قۇرعاۋ، نۇردان قورعانۋ، كوزدەن جاس اعۋ سياقتى اۋرۋ بەلگىلەرى پايدا بولىپ، اسقىنا كەلە كوز دانەكەر قابىعىنىڭ قابىنۋى، كورۋ قۋاتى السىرەۋ، كورۋ قۋاتىنان ايرىلۋعا دەيىن اپارىپ سوعادى. سوندىقتان، قۇرامىندا ۆيتامين A مول ازىقتاردى كوپ تۇتىنعان ءجون. حايۋاناتتاردىڭ باۋىرى، جۇمىرتقا، ءسۇت، بالىق مايى، سارى ماي سياقتى ازىقتاردىڭ قۇرامىندا ۆيتامين A مول بولادى.
  قۇرامىندا ۆيتامين B2 مول ازىقتار
  ۆيتامين B2 كوز تور قابىعى مەن كوز ءمۇيىز قابىعىنىڭ قالىپتى زات الماسۋىن كەپىلدەندىرەدى، ادام دەنەسىندە ۆيتامين B2 كەمشىل بولسا كوز ءمۇيىز قابىعىنىڭ قابىنۋى، كوزدەن جاس اعۋ، كوز قىزارۋ، كوز قىشۋ، كوز ءتۇيىلۋ سياقتى كوز اۋرۋلارى پايدا بولادى.
  ۆيتامين B2 ەلىمىز تۇرعىندارىنداعى ەڭ وڭاي كەمشىل بولاتىن قورەكتىك زاتتاردىڭ ءبىرى. سوندىقتان، ازىقتانۋدا قۇرامىندا ۆيتامين B2 مول ازىقتاردى، اسىرەسە، حايۋاناتتاردىڭ باۋىرى، بۇيرەگى، جۇرەگى، جۇمىرتقا سارىسى، كىلەگەي، قۇرامىندا ۆيتامين B2 مول ءتۇستى كوكونىستەردى كوبىرەك تۇتىنعان ءجون.
  قۇرامىندا ۆيتامين B1 مەن نيكوتين قىشقىلى مول ازىقتار
  ادام دەنەسىنىڭ قۇرامىندا ۆيتامين B1 مەن نيكوتين قىشقىلى مول ازىقتاردى قابىلداۋ جەتكىلىكسىز بولسا، كوز الماسى جىپىلىقتاۋ، كورۋ قۋاتى ناشارلاۋ سياقتى اۋرۋ بەلگىلەرى پايدا بولادى، سوندىقتان، عىلمي ازىقتانۋعا كوڭىل ءبولىپ، كورۋ قۋاتىن جاقسارتۋ قاجەت.
  قۇرامىندا ۆيتامين C مول ازىقتار
  ۆيتامين C كوز الماسىنىڭ كريستالدىق كۇيىنىڭ نەگىزگى قۇرامى. ادام دەنەسىندە ۆيتامين C كەمشىل بولسا، كوزگە اق تۇسەدى، سوندىقتان، قۇرامىندا ۆيتامين C مول كوكونىستەر مەن جەمىس - جيدەكتەردى كوبىرەك تۇتىنعان ءجون.
  ۇزىن تىزبەكتى مولەكۋلاسى بار قانىقپاعان ماي قىشقىلى مول بالىق تۇرلەرى
  ۇزىن تىزبەكتى مولەكۋلاسى بار قانىقپاعان ماي قىشقىلى مول بالىق تۇرلەرىندەگى DHA مەن EPA كوز تور قابىعىن قورعاۋ رولى بولاتىندىقتان، اپتاسىنا 1 − 2 رەت تۇتىنعاندا كورۋ قۋاتىن ءونىمدى قورعايدى.
  كوزدى تىتىركەندىرەتىن ازىقتاردى از تۇتىنۋ
  كوزدى تىتىركەندىرەتىن ازىقتاردى از تۇتىنۋ نەمەسە تۇتىنباعان ءجون. ماسەلەن، قىزىل بۇرىش، ۋسارىمساق، قارابۇرىش سياقتى ازىقتاردى از تۇتىنۋ. اسىرەسە، اراق پەن تەمەكىنىڭ كورۋ قۋاتىن زاقىمداۋ قاتەرى كۇشتى بولادى، سوندىقتان، اراق پەن تەمەكىدەن تيىلعان ءجون.


بەرىپ كەت ورامالىڭدى

دوستار

الىستاعى اق ەركە