جاڭا حابارلار

مەرەكەدە، وتانىمىزعا ىزگى تىلەك تىلەيمىز

    كەلۋ قاينارى: شينجياڭ گازەتى    2018-10-07 21:35:48  

 رەسپۋبليكامىزدىڭ 69 جاسقا تولعان تۋعان كۇنىن بۇكىل ەل بولىپ تويلادى، وسى ەرەكشە كۇندە، رايونىمىزداعى جۇپ قۇراپ، تۋىس بولعان بارشا كادرلار ءار ۇلت تۋىستارىمەن باس قوسىپ، بىرگە تاماقتانىپ، بىرگە تۇرىپ، سىرلاسىپ، اڭگىمەلەسىپ، ءان ايتىپ، ءبي بيلەپ، ۇلى وتانعا ىزگى تىلەكتەرىن بىرگە ءبىلدىردى.
  رەسپۋبليكانىڭ تۋعان كۇنىن بىرگە تويلادى
  «مەڭگەرۋشى شەشەم كەلدى! مەڭگەرۋشى شەشەم كەلدى!». 10 - ايدىڭ 1 - كۇنى ساعات 19دان 30 مينۋت وتكەندە، ءۇرىمجى قالاسى سايباق رايونى سەمەنت زاۆودى كوشەسى 4 - رايون 1 - بيناسىنداعى ميناۋار قادىردىڭ ۇيىندە، ەسىكتىڭ قاعىلعانىن ەستىگەن ۇلى ابدۇزايىر ابدۇقادىر شاتتانعاننان ەسىككە جۇگىرىپ جەتىپ باردى. ءۇرىمجى قالاسى سايباق رايونى لۋيۋان كوشەسى اۋماعىن باسقارۋ كوميتەتىنىڭ مەڭگەرۋشىسى جۋ شياۋپيڭ قوس قولىن جايىپ، ابدۇزايىردى قۇشاعىنا باستى.
  «اپەكە، تەز كىرىڭىز!». ميناۋار دا اس ۇيدەن جۇگىرىپ شىعىپ، جۋ شياۋپيڭدى قارسى الدى.
  اپەكەلى - ءسىڭلىلى ەكەۋىنىڭ بايلانىسىن 2017 - جىلدان باستاپ ايتۋ كەرەك. سول جىلى ميناۋار جۋ شياۋپيڭدى ءوزى ىزدەپ بارىپ، ونىمەن تۋىس بولۋدى تالاپ ەتەدى. سونىمەن ەكەۋى جۇپ قۇراپ، تۋىس بولادى. ميناۋاردىڭ قاشقاردان ۇرىمجىگە كەلگەندىگىن، جالعىز ءوزىنىڭ ەكى بالاسىمەن بىرگە تۇرمىس كەشىرەتىندىگىن بىلگەننەن كەيىن، جۋ شياۋپيڭ مەرەكە - مەيرامداردىڭ بارلىعىن ولارمەن بىرگە وتكىزەتىن بولدى. ميناۋاردىڭ بال باۋىرساق دۇكەنىن اشۋ ويى بار ەدى، جۋ شياۋپيڭ ونى جاسقانباي ىستەۋگە شابىتتاندىرىپ، ونى بال باۋىرساق دۇكەندەرىنە ەرتىپ بارىپ تاجىريبە توپتاتادى، شاعىن سومالى امانات قارىز اقشا ءوتىنىش ەتۋىنە، تيجارات كۋالىگىن اۋىستىرۋىنا كومەكتەسەدى... جۋ شياۋپيڭ مەن كوپتەگەن ىستىق ىقىلاستى جانداردىڭ كومەگىندە، «بادامزار بال باۋىرساق، نان ەرەن بازارى» اشىلادى.
  دۇكەن العاش اشىلعاندا، ميناۋاردىڭ جالعىز مۇرنىنا سۋ جەتپەي قاربالاس جۇرگەنىن كورگەن جۋ شياۋپيڭ ۇنەمى ونىڭ ۇيىنە بارىپ ەكى بالاسىنا قارايلاسادى، دۇكەنگە دە بارىپ كومەكتەسەدى. «جاقسى اپەكەم بولماسا، وتباسىمىزدىڭ بۇگىنگى كۇنى بولماس ەدى». وسىنى ايتقاندا ميناۋار كوزىنە جاس الادى.
  اس ۇيدەن پىسىپ تۇرعان پالاۋدىڭ حوش ءيىسى اڭقيدى، قوناق بولمەدە ابدۇزايىردىڭ سىقىلىقتاعان كۇلكىسى ەستىلەدى.
  «تاماققا كەلىڭدەر!». جۋ شياۋپيڭ جەڭىن تۇرە سالا اس ۇستەلىن جىلدام دايىنداپ ۇلگىردى. اشتى قۋىرىلعان بالىق، ارالاستىرمالى سالقىن تاماق، پالاۋ، مۇنىڭ ءبارى ميناۋاردىڭ ەڭ ءدامدى جاسايتىن تاعامدارى ەدى.
  «مەنىڭ بۇل ءسىڭلىم ەرەكشە پىسىق، تاماقتى دا ءدامدى جاسايدى. ءبىز دۋان - ۋ مەرەكەسىن، جۇڭچيۋ مەرەكەسىن، كوكتەم مەرەكەسىن... ءبارىن بىرگە وتكىزدىك، كاسىپتەستەرىم مەنىڭ اۋزىمنىڭ سالىمى بار دەپ تامسانادى!». جۋ شياۋپيڭنىڭ سوزىنە ۇيدەگىلەردىڭ ءبارى دۋ كۇلدى.
  ءسوز اراسىندا، ميناۋاردىڭ قول تەلەفونىنىڭ ەكرانى دامىلسىز جىلتىلداي بەردى. ول ءوزىنىڭ تاۋباۋ سايتىنداعى دۇكەنىنىڭ تاعى زاكاز قابىلداعاندىعىن تىلشىگە قۋانا ايتتى.
  ميناۋار بىلاي دەدى: مۇنىڭ ءبارى اپەكەمنىڭ ەڭبەگى! دۇكەنىم العاش اشىلعاندا، ساۋدا دەرلىك جوق ەدى، مەنىڭ نانىمدى ساتىسۋ ءۇشىن، اپەكەم اۆتوكولىكپەن ەرەن بازارلارعا ارناۋلى بارىپ ۇگىت جاساپ بەردى، مەنىڭ ونىمدەرىمدى كاسىپتەستەرىنە، دوستارىنا تانىستىردى، وسىلايشا ساۋدا جولىم اشىلا باستادى. قازىر اپەكەم مەنى ينتەرنەتتەن دۇكەن اشىپ، ءۇنحات ساۋداگەرى بولۋعا شابىتتاندىردى، كۇنىنە دەرلىك قىرۋار زاكاز قابىلدايمىن!
  «بۇل مەنىڭ ەڭبەگىم ەمەس، قايتا ءوز قۇلشىنىسىڭنىڭ ناتيجەسى»، - دەدى جۋ شياۋپيڭ كۇلە سويلەپ. ول تىلشىگە بىلاي دەدى: ميناۋار الەۋمەتتىك اۋماقتىڭ كاسىپتەن سىرتقى مادەنيەت مەكتەبىنە ىرىقتىلىقپەن قاتىناسىپ، مەملەكەتىمىزدە ورتاق قولدانىلاتىن ءتىل - جازۋدى جانە زاڭ - ەرەجەلەردى ۇيرەندى، ءوز قابىلەتى دە ەداۋىر جوعارىلادى، بۇل ونىڭ دۇكەنىنىڭ الداعى دامۋىنا بەرىك نەگىز قالادى.
  بۋى بۇرقىراعان تاعامدار اس ۇستەلىن تولتىردى، تەلەۆيزوردا شار تاراپتاعى ادامدار وتانىمىزدىڭ 69 جاسقا تولعان تۋعان كۇنىنە جاپا - تارماعاي تىلەكتەر ارناپ جاتتى، ميناۋار دا تەبىرەنە بىلاي دەدى: پارتيا مەن مەملەكەتتىڭ جاقسى ساياساتى مەنىڭ شارۋاشىلىق قۇرۋ جولىمدى بارعان سايىن كەڭەيتتى، جاقسى تۋىسىم وتباسىما جىلۋلىق جەتكىزدى، پارتياعا العىس ايتامىن، وتانىمىزدىڭ گۇلدەنىپ - كوركەيۋىن، قۇدىرەتتەنۋىن تىلەيمىن!
  مەملەكەت مەرەكەسىندە وتكىزىلگەن توي  
  10 - ايدىڭ 1 - كۇنى قىزىلسۋ قىرعىز اۆتونوميالى وبلىسى اتۇش قالاسى اعۋ اۋىلى توعراق قىستاعىنداعى ءىلياس قايار مەن گۇلزيرام ازاتجان ومىرلەرىندەگى قۋانىشتى كۇندەرىن قارسى الدى. اۆتونوميالى رايوندىق باس جۇمىسشى ۇيىمىنىڭ كادرلارى مەن جۇپ قۇراعان تۋىستارى جاڭا جۇڭگو قۇرىلعاندىعىنىڭ 69 جىلدىعىن بىرگە تويلاۋمەن بىرگە، ءبىر جۇپ جاستىڭ ۇيلەنۋ تويىنا كۋاگەر بولدى.

  7 - ايدىڭ باسىندا، اۆتونوميالى رايوندىق باس جۇمىسشى ۇيىمىنىڭ كادرى ۇسەن وسىمان تۋىسىنىڭ بالاسى ءىلياس قاياردىڭ بيىل ۇيلەنگىسى كەلەتىندىگىنەن حابار تاپقاننان كەيىن، ولارعا تويلارىن مەملەكەت مەرەكەسى دەمالىسى كەزىندە وتكىزۋ ۇسىنىسىن قويادى. سوڭىندا ءبىر ءۇيلى جان 10 - ايدىڭ 1 - كۇنى توي جاساۋعا كەلىسەدى. وسى تويعا قاتىناسۋ ءۇشىن، ۇسەن وسىمان مەكەمەگە 10 - ايدىڭ 1 - كۇنى كەزىندە تۋىسشىلاۋ جايلى ءوتىنىش تاپسىرادى.
  سول كۇنى تاڭەرتەڭ، اۆتونوميالى رايوندىق باس جۇمىسشى ۇيىمىنىڭ تۋىسشىلاۋعا كەلگەن بارلىق كادرلارى قىستاق تۇرعىندارىمەن بىرگە مەملەكەت تۋىن شىعارۋ سالتىنا قاتىناسقاننان كەيىن، «مەملەكەت تۋىمەن بىرگە سۋرەتكە ءتۇسۋ» قيمىلىنا قاتىناسىپ، وتانعا ىزگى تىلەكتەرىن ارنادى.
  ىلە - شالا ويناقى مۋزيكا قويىلىپ، ءبىر جۇپ جاس جۇباي مەملەكەت تۋى استىندا ۇيلەنۋ تويىن وتكىزەدى.
  كۇيەۋ بالا ءىلياس قايار مەن جاس كەلىن گۇلزيرام ازاتجان داشۋەدەگى ساباقتاستار. اۆتونوميالى رايوندىق باس جۇمىسشى ۇيىمى پارتيا باسشىلىق گرۋپپاسىنىڭ مۇشەسى، قارجى تەكسەرۋ كوميتەتىنىڭ مەڭگەرۋشىسى شۋە شينپيڭ جاس جۇبايلاردى ۇيرەنگەن بىلىمدەرىنەن جانە تەحنيكالىق قابىلەتتەرىنەن پايدالانىپ، قىستاقتاعى ءتىپتى دە كوپ جاستاردى ۇزبەي ۇيرەنىپ، قاجىرلىلىقپەن ەڭبەك ەتىپ، مەكەندەرىن اناعۇرلىم كورىكتى ەتىپ قۇرىپ شىعىپ، ءىس جۇزىندىك ارەكەتتەرى ارقىلى پارتيا مەن وتاننىڭ مەيىر - شاپاعاتىنىڭ قارىمجىسىن قايتارۋعا شابىتتاندىردى.
  «تويىمىزدى مەملەكەت مەرەكەسى كۇنى وتكىزۋدەگى ماقساتىمىز وتانىمىزدىڭ ءبىزدى تاربيەلەپ جەتىلدىرگەن مەيىر - شاپاعاتىن اقتاۋ. وتانىمىزدىڭ گۇلدەنىپ - كوركەيۋىن تىلەيمىن، ماحابباتىمىزدىڭ ماڭگىلىك بالداي ءتاتتى بولۋىن ءۇمىت ەتەمىن»، - دەدى ءىلياس قايار گۇلزيرام ازاتجاننىڭ قولىنان ۇستاپ تۇرىپ تەبىرەنگەن سەزىممەن.
  مەملەكەت مەرەكەسى دەمالىسىندا مەيىر - شاپاعات جەتكىزدى  
  10 - ايدىڭ 2 - كۇنى ساعات 8دە، لوپنۇر اۋداندىق پارتكوم ۇگىت ءبولىمىنىڭ كادرى ما شيۋليڭ ورنىنان تۇرىپ، قاسىندا ۇيىقتاپ جاتقان قىزىن وياتتى، جۋىنىپ - شايىنىپ بولعاننان كەيىن، ەكەۋى جولعا شىقتى. ما شيۋليڭ قىزىنا: بۇگىن ءبىز مۇسا اعايىڭنىڭ ۇيىنە بارامىز، قازىر مەرەكە كەزى، ول كىسىنىڭ دۇكەنى، ءسوز جوق، قاربالاس بولىپ جاتىر، ءبىز بارىپ كومەكتەسەيىك، باۋىر - سىڭلىلەرىڭە العان جاڭا كيىمىمىزدى دە اپارىپ بەرەيىك، - دەدى.
  مۇسا تۇرسىن ما شيۋليڭنىڭ جۇپ قۇراعان تۋىسى، مۇسا مەن ايەلى تاجىگۇل امەتتىڭ ەكەۋى دە زاعيىپ جاندار، 10 جاستاعى ۇلدارى ءادىل مۇسا باستاۋىشتىڭ 4 - جىلدىعىندا، 4 جاستاعى قىزى الميرا مۇسا قىستاقتاعى بالاباقشادا وقيدى. ەرلى - زايىپتى ەكەۋى پارتيانىڭ حالىققا ءتيىمدى ساياساتىنىڭ كومەگىندە دۇكەن اشادى، قازىر تۇرمىستارى دا ايتارلىقتاي جاقسى. «ءادىل، الميرا شەشەلەرىڭنىڭ سەندەرگە اكەلگەن تارتۋىن تەز كەلىپ كيىپ كورىڭدەر». مۇسانىڭ ۇيىنە كەلىسىمەن، ما شيۋليڭ ەندى عانا ورىندارىنان تۇرعان بالالاردى جاڭا كيىمدى كيىپ كورۋگە شاقىردى. ادەمى جاڭا كيىمدى كيىپ العان بالالار: ما شەشە، سەنى سۇيەمىز، - دەپ اۋلادا قۋانا اسىر سالىپ، ويناي كەتتى. مۇسا مەن ايەلى ما شيۋليڭدى كورىپ قاتتى قۋاندى، قولدارىمەن ىمداپ، ما شيۋليڭدى ۇيگە كىرىپ تاڭعى استى بىرگە ىشۋگە شاقىردى.
  ساعات 10دا، ما شيۋليڭ مۇسا جانە ايەلىمەن بىرگە شاعىن دۇكەنگە كەلدى، قاريدار كەلسە زات ساتىسىپ، قاريدار جوق كەزدە زات سورەسىنە زات تولىقتاپ، تەكشەنى ءسۇرتتى. شاعىن عانا دۇكەننەن ىستىق سۇيىسپەنشىلىكتىڭ لەبى ەستى.
  ساعات 14تە، وتباسىنداعىلار ۇستەلدى اينالا وتىرىپ تۇسكى تاماق جەدى، ءادىل ما شيۋليڭ مەن اكە - شەشەسىنىڭ «اۋدارماشىسى» بولدى، ول ما شيۋليڭنىڭ ايتقاندارى مەن اكە - شەشەسىنىڭ يشاراتىن قارسى جاعىنا جاتتىق اۋدارىپ بەرىپ وتىردى، 6 ادام وسىنداي «ەرەكشە» تاسىلمەن اڭگىمەلەسىپ، شۇيىركەلەسىپ جاتتى.
  تۇستەن كەيىن ما شيۋليڭ مەن قىزى مەكەمەگە قايتۋعا دايىندالدى، ەسىكتەن شىعا بەرگەندە، تاجىگۇل ما شيۋليڭنىڭ قولىنا ءبىر جاپىراق قاعاز ۇستاتتى، قاعازعا: مەملەكەت مەرەكەسى قۇتتى بولسىن، پارتياعا، وتانعا راقىمەت ايتامىز، ءبىز ماڭگى ءبىر وتباسىنىڭ ادامدارىمىز، - دەپ جازىلىپتى. ما شيۋليڭنىڭ تاڭىرقاعان الپەتىن كورگەن تاجىگۇل ەسىك الدىندا جەلبىرەپ تۇرعان مەملەكەت تۋىن نۇسقاپ، باسبارماعىن شىعاردى.
  ءادىل ما شيۋليڭنىڭ قولىنان ۇستاپ تۇرىپ: شەشەم ءار كۇنى قارىنداسىم ەكەۋىمىزدىڭ وقۋلىعىمىزدان مەملەكەتتە ءبىر تۇتاس قولدانىلاتىن ءتىل - جازۋدى ۇيرەنىپ جاتىر، قازىر كوپتەگەن جازۋلاردى جازا الاتىن بولدى، - دەدى.
  (تىلشىلەرىمىز جاۋ چۇنحۋا، ميھرگۇل ءناسىر، ەرىكتى تىلشىلەر بو شاۋبين، چاڭ شۋەحۇي)


بەرىپ كەت ورامالىڭدى

دوستار

الىستاعى اق ەركە