جاڭا حابارلار

سامالاداي سامسىعان شىراقتار وتانعا ماحابباتتى مازداتتى

    كەلۋ قاينارى: شينجياڭ گازەتى    2018-10-08 16:02:45  

10 - ايدىڭ 6 - كۇنى شىراق سالتاناتىن تاماشالاۋعا كەلگەن ءۇرىمجى قالاسىنىڭ تۇرعىندارى شيداچياۋدا توپتىق سۋرەتكە ءتۇسىپ، ەستەلىك قالدىردى.

سۋرەتتى ءتىلشىمىز حان لياڭ تۇسىرگەن

  10 - ايدىڭ 6 - كۇنى كەشتە «سۇيەم سەنى، جۇڭگو» تاقىرىبىنداعى شىراق سالتاناتى تۇنگى ءۇرىمجىنى ايرىقشا اسەم تۇسكە بولەدى. ءار ۇلت قالا تۇرعىندارى مەن شينجياڭعا كەلگەن كوپتەگەن ساياحاتشىلار شىراقتاردى تاماشالاپ، كورىنىستەن كوز ايدىن بولىپ، شاتتىق ءۇنى ىشىندە جۇڭحۋا حالىق رەسپۋبليكاسى قۇرىلعاندىعىنىڭ 69 جىلدىعىنا شىن جۇرەكتەن تىلەكتەرىن ءبىلدىردى. ساۋلەتتى شىراقتار تۇنگى اسپاندى جارقىراتىپ، شينجياڭنىڭ دامۋ وزگەرىسىن ايگىلەدى ءارى ءار ۇلت حالقىنىڭ باقىتى مەن شاتتىعىن بەينەلەپ، ەرەكشە مانگە يە اسەم كورىنىسكە اينالدى.
  بۇل وتاننىڭ گۇلدەنىپ - كوركەيگەنىن، شەكارانىڭ تىنىشتىعىن، ىنتىماعىن كورسەتەتىن اسەم كورىنىس. شىراق سالتاناتى باستالىسىمەن سان ساعىمدار مىڭ قۇبىلىپ، الۋان تۇسكە بويالدى، «سۇيەم سەنى، جۇڭگو» دەگەن الىپ جازۋ كوزگە شالىندى، كوشەلەردەن الۋان شىراقتار جارقىراپ، كوزدىڭ جاۋىن الدى. شىراقتار سامالاداي سامسىپ، ادامدار ءيىن تىرەستى. ادامدار لەگىنىڭ اراسىنداعى كوپتەگەن «ۇلتتار ىنتىماعىنىڭ بەرەكەلى شاڭىراعى» قيمىلى بارىسىنداعى جۇپ قۇراعان تۋىستاردىڭ ىستىق سۇيىسپەنشىلىگى مەرەكە كۇنىنە وزگەشە جىلۋلىق ۇستەدى. كوپشىلىك ءان ايتىپ، ءبي بيلەپ، وتاننىڭ تۋعان كۇنىن دۋمانداتا بىرگە تويلادى. بۇل ارا شينجياڭ، جىبەك جولى ەكونوميكالىق بەلدەۋىنىڭ وزەكتى رايونى، وتاننىڭ ىرىستى ولكەسى، ءار ۇلت حالقىنىڭ ءبىر - بىرىنە سۇيەنىپ، بىرگە ءومىر سۇرەتىن جەرى. قالانىڭ گۇلدەنۋى مەن تىرشىلىك تىنىسى، ءار ۇلت حالقىنىڭ ىنتىماعى مەن ءوزارا كومەگى بۇگىنگى ءتۇندى وسىنشاما سانگە بولەپ، ادامدى وزىنە ەلتتى. وتان بولماسا، وتباسى قايدان بولسىن، وتاننىڭ كوركەيىپ - گۇلدەنۋى بولماسا، جاراسىمدى دا كوركەم مەكەن قايدان بولسىن. بۇگىنگى شينجياڭدا قوعام ورنىقتى، جاراسىمدى، ادامدار شات - شادىمان ءومىر كەشۋدە. بۇل ۇلى وتاننىڭ گۇلدەنىپ - كوركەيگەندىگىنىڭ بەلگىسى، بۇل جۇڭگو كوممۋنيستىك پارتياسىنىڭ پارمەندى باسشىلىعىندا قولعا كەلگەن كەسەك تابىستار.
  بۇل ءار ۇلت حالقىنىڭ ۇلى وتانعا دەگەن تەرەڭ سۇيىسپەنشىلىكتەرىن ايگىلەيتىن كوركەم كورىنىس. «سۇيەم سەنى جۇڭگو، سۇيەمىن سەنى، جۇڭگو، مەن سەنىڭ تولقىن اتقان نانحايىڭدى سۇيەمىن، سۇلتۇستىگىڭدەگى اق قار، كوك مۇزىڭدى سۇيەمىن، شەكسىز ورمانىڭدى سۇيەمىن، اسقار تاۋلارىڭدى سۇيەمىن، ەستەن كەتپەس سىلدىراعان بۇلاقتارىڭدى سۇيەمىن...». ادامنىڭ جۇرەك قىلىن شەرتەتىن وسى اۋەن اۋەلەگەن سايىن، كوڭىلدىڭ كۇيى تولقىپ، ادامداردىڭ كوزىنە جاس كەلەدى. ءيا، سولاي، بۇگىنگى تىنىش زامانعا سانسىز قاھارمانداردىڭ ىستىق قانى مەن ءومىرىنىڭ ارقاسىندا قول جەتتى، سانسىز توڭكەرىسشىلەردىڭ الدىڭعىلارى مەرت بولسا، سوڭعىلارى ءىزىن باسقان جىر ەتەرلىك كۇرەسىنىڭ ارقاسىندا قول جەتتى، بۇكىل ەلىمىزدەگى ءار ۇلت حالقىنىڭ جۇڭگو كوممۋنيستىك پارتياسىنىڭ باسشىلىعىندا، قاجىرلىلىقپەن كۇرەس جاساپ، توسقاۋىلداردى تالقانداپ، ەرلىكپەن العا تارتۋىنىڭ ارقاسىندا قول جەتتى. سۇيىكتى جۇڭگو، جۇڭحۋا ۇلاندارى سەنى سۇيەدى، ساعان دەگەن سۇيىسپەنشىلىگى تەلەگەي تەرەڭ. «سۇيەم سەنى، جۇڭگو! مەن تاماشا جاستىق كوكتەمىمدى ساعان ارنايمىن، انام مەنىڭ، وتانىم مەنىڭ...». الۋان شىراقتار استىندا ادامدار مۋزيكاعا ىلەسىپ وسى ءاندى شىرقادى، كامەرا الدىندا سۇحبات بەرگەن ءار ۇلت بۇقاراسىنىڭ «سۇيەم سەنى، جۇڭگو»، «وتان انانىڭ تۋعان كۇنى قۇتتى بولسىن!»، «وتانىمىزدىڭ بارعان سايىن گۇلدەنۋىن تىلەيمىن!» سياقتى سوزدەرىنىڭ بارلىعى ۇلى وتانعا دەگەن تەرەڭ سۇيىسپەنشىلىكتەرىنىڭ ايعاعى، سۇيىكتى وتانعا دەگەن شىنايى سەزىمدەرىنىڭ ايعاعى.
  بۇل ۇلى ارماندى ىسكە اسىرۋ ءۇشىن زەيىن مەن كۇشتى شوعىرلاندىراتىن اسەم كورىنىس. «سۇيەم سەنى، جۇڭگو» تاقىرىبىنداعى شىراق سالتاناتى ەل - جۇرتتىڭ تىنىشتىعىن ايگىلەدى، وتانعا ماحابباتتى ايگىلەدى. وتانشىلدىق − جۇڭحۋا ۇلتىنىڭ تەرەڭ تاريحي سۇيىسپەنشىلىگى. «ورنىڭ تومەنشىك بولسا دا وتاننىڭ قامىن ويلاۋدى ۇمىتپا»! مىنە بۇل كونەلەردىڭ وتانعا دەگەن جاۋاپكەرشىلىگى؛ «مەن توڭكەرىس ءۇشىن تۋدىم، توڭكەرىس ءۇشىن جان بەرۋگە ريزامىن». مىنە بۇل جۇڭگو كوممۋنيستەرىنىڭ وتان ءۇشىن باسىن ءباي تىگەتىن سەنىمى. وتانعا ماحاببات ۇرپاقتان - ۇرپاققا جالعاسىپ، دارا تۇلعالى اسقاق ۇلت رۋحىنا اينالدى، ول جۇڭحۋا ۇلتىن تىعىز ىنتىماقتاستىردى. بۇگىن مىڭ ءبىر جاپانى باستان كەشىرگەن جۇڭحۋا ۇلتى ەڭسە كوتەرۋدەن، اۋقاتتانۋدان قۇدىرەتتەنۋگە قۇلاش سەرمەگەن ۇلى تاريحي سەكىرىستى جۇزەگە اسىردى، بۇكىل پارتيا، بۇكىل ارميا، بۇكىل ەلدەگى ءار ۇلت حالقى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ەلىمىزدى سوتسياليستىك وسىزاماندانعان قۇدىرەتتى ەل ەتىپ قۇرىپ شىعۋ جولىندا قۇلشىنا كۇرەسۋدە. «سۇيەم سەنى، جۇڭگو» شينجياڭداعى ءار ۇلت حالقىنىڭ ۇلى وتانعا دەگەن وسكەلەڭ مويىنداۋ سەزىمىن جانە تاۋەلدىلىك سەزىمىن، جاۋاپكەرشىلىك سەزىمىن جانە بورىشتىلىق سەزىمىن بەينەلەدى؛ شينجياڭ استانا بەيجيڭنەن شالعاي بولعانىمەن، اۆتونوميالى رايوندىق پارتكومنىڭ، تۇتاس رايونىمىزداعى ءار دارەجەلى پارتيا ۇيىمدارىنىڭ، قالىڭ پارتيا مۇشەلەرى مەن كادرلاردىڭ جانەءار ۇلت بۇقاراسىنىڭ تىلەگى قاشاندا شي جينپيڭ جولداستى ۇيتقى ەتكەن پارتيا ورتالىق كوميتەتىمەن بىتە قايناسقان، تىعىز توعىسقان تەرەڭ سۇيىسپەنشىلىگىن ايگىلەدى؛ شينجياڭداعى ءار ۇلت كادر - جۇرتشىلىعىنىڭ جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىنىڭ شينجياڭ تاراۋىن قۇلشىنا جازاتىن بەرىك سەنىمىن ايگىلەدى.
  سامالاداي سامسىعان شىراقتاردا «سۇيەم سەنى، جۇڭگو» دەگەن تەرەڭ سۇيىسپەنشىلىك قامتىلىپ جاتتى، وندا بەينەلەنگەن وتانعا ماحاببات جۇڭحۋا ۇلتىنىڭ تامىرى جانە رۋحاني مايەگى. ول، ءسوز جوق، شينجياڭداعى ءار ۇلت حالقىن العىس سەزىمىندە بولىپ، وتان ءۇشىن شىنايى ەڭبەك ەتىپ، «كوركەم شينجياڭ قۇرۋ، وتان ارمانىن بىرگە جۇزەگە اسىرۋ» سىندى ۇلى اماليات بارىسىندا ورنىقتى قاداممەن، ءبىر نيەت، ءبىر تىلەكپەن ۇدەرە العا تارتۋعا جىگەرلەندىرەدى.


بەرىپ كەت ورامالىڭدى

دوستار

الىستاعى اق ەركە