جاڭا حابارلار

سۇيەم سەنى، جۇڭگو

    كەلۋ قاينارى: شينجياڭ گازەتى    2018-10-08 16:16:47  

سامالاداي سامسىعان شىراقتار ءۇرىمجىنىڭ تۇنگى اسپانىن جارقىراتتى، تيانشان ۇلاندارى تەرەڭ سەزىممەن اق تىلەكتەرىن ءبىلدىردى−

10 - ايدىڭ 6 - كۇنى «سۇيەم سەنى، جۇڭگو» تاقىرىبىنداعى ءۇرىمجى شىراق سالتاناتىنداعى كوركى كوز سۇرىندىرەتىن كەشكى كورىنىس.
سۋرەتتى ءتىلشىمىز تاڭ يۇڭ تۇسىرگەن

 ءتىلشىمىز لي چۇنشيا 10 - ايدىڭ 6 - كۇنى ۇرىمجىدەن حابارلايدى. مەملەكەت مەرەكەسىن شات - شادىمان وتكىزىپ، نۇر - شۇعىلاعا شومعان جۇڭحۋاعا كوز سالايىق. 10 - ايدىڭ 6 - كۇنى ساعات 20دا اسەم لازەر نۇرى ءۇرىمجىنىڭ كەشكى اسپانىن قاق ءتىلىپ، ءۇرىمجى قالاسىنىڭ بوگەنايلىق قۇرىلىسى − شيداچياۋ كوپىرىنەن حۇڭشان باقشاسىنا ءتۇسىپ، «سۇيەم سەنى، جۇڭگو» دەگەن ايشىقتى جازۋدى كەسكىندەپ، ۇلى وتانعا ەڭ تەرەڭ سەزىممەن اق تىلەك ارنادى.
  اسپاندى ەكران، قالانى كورىنىس ەتكەن كوزدىڭ جاۋىن الاتىن شىراق نۇرلارى ءزاۋلىم عيماراتتارعا جازۋ ورنەكتەپ، ءۇرىمجى سىندى وسىزاماندانعان قالانىڭ تارتىمدىلىعى مەن كوركىن ايگىلەدى. وسى كۇنى «سۇيەم سەنى، جۇڭگو» تاقىرىبىنداعى شىراق سالتاناتى ءۇرىمجى قالا رايونىنىڭ بارلىق جەرىندە وتكىزىلدى. ءۇرىمجى قالالىق قالا باسقارۋ كوميتەتى پارتيا باسشىلىق گرۋپپاسىنىڭ مۇشەسى، ورىنباسار تەكسەرىپ - زەرتتەۋشى ليۋ چيڭنىڭ تانىستىرۋىنشا، وسى رەتكى شىراق سالتاناتى شينجياڭ حالىقارالىق ۇلكەن بازارى، شيداچياۋ كوپىرى جانە حۇڭشان، ءماجىلىس كورمە اۋماعى سياقتى 3 نەگىزگى اۋماققا ورنالاستىرىلعان، 14 بۋىنداعى قۇرىلىستاردا ءبىر ۋاقىتتا شىراق جاعىلىپ، لازەر نۇرىمەن ءتۇسىرۋ، سۋ ەكران جانە سيفرلى LED شىراق سياقتى كوپ ءتۇرلى تەحنيكالار ارقىلى «سۇيەم سەنى، جۇڭگو» دەگەندى وزەكتى فاكتور، بەس جۇلدىزدى قىزىل تۋدى، ۇلكەن قىزىل قوراپتى شام سياقتى جۇڭحۋا ۇلتى مەن جۇڭگو رۋحىنا سيمۆول بولاتىن سۋرەتتەردى قوسىمشا ەتىپ، قالىڭ قالا تۇرعىندارى مەن ساياحاتشىلارعا كورىنىستىك سالتانات سيلاپ، شينجياڭداعى ءار ۇلت حالقىنىڭ وتاننىڭ تۋعان كۇنىنە دەگەن تاماشا تىلەكتەرىن بەينەلەپ، شات - شادىمان دا بەرەكەلى، ىنتىماقتى دا تالپىنعىش مەرەكەلىك ورتا جاراتتى.
  كوركى كوز تارتقان شىراق سالتاناتى سان - ساناقسىز ءۇرىمجى قالا تۇرعىندارى مەن بۇكىل ەلدىڭ جەر - جەرىنەن كەلگەن ساياحاتشىلاردى وزىنە باۋرادى، جۇپتارى جاراسقان عاشىقتار «سۇيەم سەنى، جۇڭگو» دەگەن جازۋدى ارتقى كورىنىس ەتىپ توي سۋرەتىنە تۇسسە، ءار ۇلتتان تابىسقان «تۋىستار» سەرىكتەسىپ شىعىپ، كەشكى كورىنىستى تاماشالادى، ىشكى ولكەدەن كەلگەن ساياحاتشىلار شينجياڭ حالىقارالىق ۇلكەن بازارىندا شينجياڭ حالقىنىڭ قوناعۋارلىعى مەن ىستىق ىقىلاسىن سەزىندى... جۇرت قول تەلەفوندارىن، فوتو اپپاراتتارىن جاپا - تارماعاي الىپ شىعىپ، وسى ءبىر تاماشا ءساتتى سۋرەتكە ءتۇسىرىپ، ءۇرىمجىنىڭ كۇن سايىن جاڭارىپ، اي سايىن تۇلەجىگەن دامۋىنا كۋا بولىپ، جۇڭحۋا ۇلتى ۇلى شاڭىراعىنىڭ شاتتىعىن ورتاقتاسىپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ قامقورلىعىنا العىس ايتتى.
  ۇعىسۋعا قاراعاندا، وسى رەتكى شىراق سالتاناتى ءار كۇنى ساعات 20دان 24كە دەيىن وتكىزىلىپ، 10 - ايدىڭ 8 - كۇنىنە دەيىن جالعاسادى ەكەن. نەگىزگى اۋماقتان سىرت، ءۇرىمجى قالاسىنىڭ ءارقايسى رايون، اۋداندارى بەلسەندىلىكپەن ات سالىسىپ، ياڭزىجياڭ جولى، نيانزىگوۋدىڭ توڭىرەگى، گاۋتيە (جوعارى قارقىندى تاس جول) اۋماعى سياقتى ورىنداردا دا شىراق سالتاناتى قيمىلىن ورىستەتىپ، ءبىر تۇتاس بىرگە ارەكەتتەنگەن، شالعايدان ءبىر - بىرىمەن ۇندەسكەن، شەكسىز قۇبىلعان كورىنىس قالىپتاستىردى.
  وسى كۇنى ساعات 20دا ورتالىق تەلەۆيزيا حابار ارناسىنىڭ «شىعىس ۋاقىت - كەڭىستىگى» باعدارلاماسى «سۇيەم سەنى، جۇڭگو» تاقىرىبىنداعى شىراق سالتاناتىنىڭ ءۇرىمجى بولىمىندە وسى رەتكى شىراق سالتاناتى قيمىلى جونىندە 9 مينۋتقا تاياۋ تىكە حابار بەردى، بۇل ورتالىق تەلەۆيزيانىڭ ءۇرىمجىنىڭ كەشكى كورىنىسىن تۇڭعىش رەت زور كولەمدە اۋەدەن ءتۇسىرىپ تىكە تاراتۋى سانالادى.
  سامالاداي سامسىعان شىراقتار مەملەكەت مەرەكەسىندەگى تۇنگى اسپاندى جارقىراتىپ جىبەردى، ونان دا ماڭىزدىسى، ءار ۇلت حالقىنىڭ وتانشىلدىق سۇيىسپەنشىلىگىن قاۋلاتىپ، تيانشان ۇلاندارىنىڭ تاماشا تۇرمىسقا دەگەن تالپىنىسىن، وتاننىڭ جاقسى بولۋىنا دەگەن ورتاق تىلەگىن ايگىلەدى.


بەرىپ كەت ورامالىڭدى

دوستار

الىستاعى اق ەركە