جاڭا حابارلار

  ءوز-وزىڭمەن سىرلاسۋ ــ ەڭ ۇزدىك تالعام

    كەلۋ قاينارى: شينجياڭ حالىق راديو ىستانسياسى    2018-10-10 18:14:00  

 جالعىز وتىرعان شاعىڭىزدا نە ىستەيسىز؟  كومپيۋتەردىڭ الدىنا جايعاساسىز با؟  تەلەفونعا نە بولماسا تەلەۆيزورعا  قارايسىز با؟ مۇمكىن قۇربىلارىڭىزبەن اڭگىمە-دۇكەن قۇراتىن شىعارسىز؟ جوعارىدا اتالعانداردىڭ قايسىسىن تالداساڭىزدا  ، ماقساتىڭىز بىرەۋ عانا.  ول - جالعىزسىراماۋ.
  ءسىرا، سىرلاسۋ سونداي قيىن بولعانى ما؟ سيندي تاياۋدا «سەزىمدى جەتىلدىرۋ» دەيتىن تاقىرىپتاعى ءبىر ساباققا قاتىستى.  جەتەكشى ۇلكەن ساباق زالىنداعى ءاربىر ادامنان وزىنە تيەسىلى ورىن تاۋىپ، ەش قيمىل، ءسوز-ارەكەتسىز 10 مينۋت ۋاقىتتى وتكىزۋدى تالاپ ەتتى. ءار ىسكە ەلگەزەك سيندي 30 سەكۋند تولار-تولماستان جان-جاعىنا قاراپ، كۋرسانتتاعى ساباقتاستارىنىڭ  نە ىستەگەنىن بايقاي باستادى. 3 مينۋت وتكەن سوڭ سيندي مازاسىزدانا قول تەلەفونىن شۇقىلاپ، وزىنە ەشكىمنىڭ حابارلاسپاعانىنا تاڭ قالدى. 5 مينۋت تولعاندا كەنەت الدە ءبىر قاريدارىنا  تەلەفون شالىپ، جارناما جوباسىن اقىلداسۋى كەرەكتىگى ەسىنە ءتۇستى.  جانىندا وتىرعاندار دا تىنىمسىز قوزعالىپ وتىرعان ەدى. ءبىرى - شاشىن جوندەسە، ەندى ءبىرى - كيىمىن تۇزەۋدە، ايتەۋىر ءبارى وزىمەن-ءوزى اۋرە.  8 مينۋت ءوتتى. سيندي شاراسىز بەينەدە جەتەكشىگە قاراپ قاباعىمەن بۇل ويىندى ەرتەرەك اياقتاتۋ جونىندە   يشارات جاسادى.  ۋاقىت تولدى.  سيندي ماڭايىنداعى جولداستارىنىڭ دا ءوزى سەكىلدى بۇعاۋدان بوساعانداي جەڭىلدەپ قالعانىن بايقادى.  كلاس ءىشى لەزدە قىزۋ تالقىعا ءتۇستى. بەينە ماناعى وتكەن 10 مينۋتتى قايتارىپ الۋعا قۇلشىنىپ جاتقانداي. وسى كەزدە جەتەكشى بۇل قيمىلدا ولاردىڭ ءوز-وزدەرىمەن سىرلاسا العان ۋاقىتتارىنىڭ قانشا بولعانىن سۇرادى. قويىلعان توسىن سۇراققا  سينديدىڭ جاۋابى جوق ەدى.  ول وزىنە-ءوزى تاڭ قالدى.
  مىنە قىزىق، شىندىعىندا ادامدار وزىمەن سىرلاسا الماعانى ما؟
  ماڭايىڭىزعا كوز سالساڭىز، سيندي سىندى ادامداردىڭ كوپ ەكەنىن بايقايسىز.
  ءار ىسكە قىزىعاتىن دجوي دوستارىنىڭ كوڭىلىندەگى ماڭگىلىك «قۋانىش گۇلى». ول ءتۇرلى توپتىق ورتادا بەلسەندى بولىپ وتىراتىن جانە بارعان جەرىنە قۋانىش سيلاپ، ءاركىمنىڭ كوڭىلىنەن شىعاتىن-دى.
  ونىڭ مۇنداي كوڭىلدىلىككە ءۇيىر بولاتىنى سونشالىق، جالعىز دۇكەن ارالاۋدان، جالعىز تاماقتانۋدان، جالعىز كينو كورۋدەن، ياعني جالعىزسىراۋدان قورقادى. ول ۇنەمى ۇيدە جالعىز وتىرسا، دۇنيەدەن قۇر الاقان قالعانداي كوڭىلى قۇلازىپ سالا بەرەدى. سوندىقتان ول ءار ءتۇرلى امالدار تاۋىپ ۋاقىتىن وتكىزەدى.
  ءبىز جالعىزسىراعان شاعىمىزدا باسقالاردىڭ ءوز قاسىمىزدا بولماۋى سالدارىنان قوعامداعى ءوز ورىنىمىزدىڭ ءمانىن جويامىز. مىسالى، اتا-انا بولماسا، بالا دەيتىن اتاۋدىڭ ءومىر ءسۇرۋىنىڭ دە ەشبىر قاجەتى قالماعانداي؛  قىزمەتكەر بولماعاندا «باستىق» دەگەن سالاۋاتتىڭ دا ءمانى قالماعانداي سەزىلەدى.
  تۇرمىستاعى كوپ سالاۋاتتان ءوزىمىزدى بوساتقاندا عانا، شىنايى ءوزىمىزدى تانىپ جەتە الامىز. دەگەنمەن ناعىز وزىمىزگە جولىققان ساتتەردە ءبىزدىڭ كوڭىل تۇكپىرىمىزدە «مەن كىممىن؟»، «مەن نە ءۇشىن كوڭىلسىز بولامىن؟»، «قالاي ىستەسەم دۇرىس بولار؟» دەگەن سان سۇراق تۋىلا باستايدى.
  شىنىن ايتقاندا، ىشكى پسيحولوگياسى تولىق جەتىلگەن ادام ءوز كوڭىل-كۇيىمەن سىرلاسا الادى. جالعىز قالعان شاعىڭىز - كوڭىل كۇيىڭىزبەن سىرلاسۋدىڭ ەڭ تاماشا شاعى.
  مەن قانداي اداممىن؟ مەن قالاي ءومىر وتكىزۋدەمىن؟ دەگەن سۇراقتارمەن ءوزىمىزدى تانىپ، جۇرەك تۇبىندەگى شىن سەزىمىمىزبەن ناعىز ءوزىمىزدى قابىلداپ، كوڭىل اسپانىمىزدى اشىق ۇستاپ، بۇكىل دۇنيەدەگى ادام مەن ءار الۋان ءىستى قۇشاعىمىزعا الا ءبىلۋ - ەڭ دۇرىس شەشىم. ادامداردىڭ وز-وزىمەن سىرلاسا ءبىلۋى - باقىتتى سەزىنە ءبىلۋدىڭ ەڭ تاماشا ءتاسىلى.
  ءار كۇنى 10دا 20 مينۋت ۋاقىتىڭىزدى قيىپ، ەشقانداي ىسپەن شۇعىلدانباي تەك تىپ-تىنىش عانا وزىڭىزبەن سىرلاسىڭىز. بۇلاي ىستەۋ بىزگە دۇرىس باعدار نۇسقايدى، وتە-موتە، كوڭىل داقتارىڭىزدى جۋىپ، كوڭىلىڭىزدى سەرپىلتە تۇسەدى.


بەرىپ كەت ورامالىڭدى

دوستار

الىستاعى اق ەركە