جاڭا حابارلار

شي جينپيڭ جاپونيانىڭ باس ءۋازىرى انبەي جينسانمەن كەزدەستى

    كەلۋ قاينارى: شينجياڭ گازەتى    2018-10-28 19:24:54  
شينحۋا اگەنتتىگىنىڭ 10 - ايدىڭ 26 - كۇنى بەيجيڭنەن بەرگەن حابارى (ءتىلشى لي جۇڭفا). مەملەكەت ءتوراعاسى شي جينپيڭ 10 - ايدىڭ 26 - كۇنى دياۋيۇيتايداعى مەملەكەت قوناق ۇيىندە جۇڭگوعا رەسمي ساپارمەن كەلگەن جاپونيانىڭ باس ءۋازىرى انبەي جينسانمەن كەزدەستى.
  شي جينپيڭ انبەي جينساننىڭ جۇڭگوعا رەسمي ساپارمەن كەلگەنىن قارسى الىپ، انبەي جينساننىڭ سوڭعى جىلدارى جۇڭگو مەن جاپونيانىڭ قارىم - قاتىناسىن جاقسارتۋ جانە دامىتۋ جونىندە كوپ مارتە بەلسەندى پەيىل بىلدىرگەندىگىن القادى. شي جينپيڭ مىنالاردى اتاپ كورسەتتى: جۇڭگو مەن جاپونيا − جاقىن كورشى، ەكى مەملەكەتتىڭ مۇددەسى جوعارى دەڭگەيدە توعىسىپ جاتىر. الەمدەگى نەگىزگى ەكونوميكالىق تۇلعا جانە ماڭىزدى ىقپالعا يە مەملەكەتتەر رەتىندە، جۇڭگو مەن جاپونيا قارىم - قاتىناسىنىڭ ۇزاق مەزگىل اقاۋسىز، ورنىقتى دامۋى ەكى ەل حالقىنىڭ ءتۇبىرلى مۇددەسىنە ۇيلەسەدى ءارى بۇل وسى ءوڭىردىڭ جانە حالىقارالىق قوعامنىڭ جالپى ءۇمىتى. بيىل جۇڭگو - جاپونيا بەيبىتشىلىك جانە دوستىق شارتىنىڭ جاسالعانىنا 40 جىل تولدى. 1978 - جىلى ەكى ەلدىڭ اعا بۋىن باسشىلارى بەيبىتشىلىك جانە دوستىق شارتىن جاساپ، ەكى مەملەكەتتىڭ ۇزاققا جالعاساتىن بەيبىتشىلىگى مەن دوستىعىنىڭ ۇلكەن بەتالىسىن زاڭ جۇزىندە تۇراقتاندىرىپ، ەكى جاقتىڭ ءوزارا پايدالى سەلبەستىك جاساۋىنا، بىرگە دامۋدى كوزدەۋىنە جانە تاريح، تايۋان سياقتى سەزىمتال ماسەلەلەردى ۇيلەسىمدى شەشۋىنە بەرىك تياناق پەن كەپىلدىك ازىرلەدى. ەكى جاقتىڭ جۇمىلا قۇلشىنۋى ارقاسىندا، قازىر جۇڭگو مەن جاپونيانىڭ قارىم - قاتىناسى قالىپتى ارناعا ورالىپ، قايتادان وڭ بەتالىس بايقاتتى. بۇل ەكى جاقتىڭ بىردەي قادىرلەۋىنە تاتيدى. ەكى جاق جۇڭگو - جاپونيا ءتورت ساياسي حۇجاتىندا تۇراقتاندىرىلعان ءتۇرلى پرينسيپتەرگە بويسۇنىپ، بەيبىتشىلىك پەن دوستىقتىڭ ۇلكەن بەتالىسىنان اۋىتقىماي، ءوزارا پايدالى سەلبەستىكتى ۇزدىكسىز تەرەڭدەتىپ، جۇڭگو مەن جاپونيا قارىم - قاتىناسىنىڭ دۇرىس ارناعا ورالۋى نەگىزىندە جاڭا دامۋشىلىقتارعا قول جەتكىزۋىن ىلگەرىلەتۋى كەرەك. 
  شي جينپيڭ مىنالاردى باسا دارىپتەدى: جاڭا جاعدايدا، جۇڭگو مەن جاپونيانىڭ ەكى جاقتى سالادا ءبىر - بىرىنە سۇيەنۋى بارعان سايىن تەرەڭدەپ كەلەدى، كوپ جاقتى دەڭگەيدە دە اناعۇرلىم كەڭ، كوپ نەگىزدى ورتاق مۇددەلەرى جانە ورتاق ءجىتى قاداعالاپ وتىرعان ىستەرى بار. ەكى جاق اناعۇرلىم تەرەڭ ستراتەگيالىق بايلانىستى ورىستەتىپ، ەكى ەلدىڭ كوپ ساتىلى، كوپ ارنالى كەڭەس مەحانيزمىنىڭ رولىن ويداعىداي ساۋلەلەندىرىپ، قارسى جاقتىڭ دامۋ جانە ستراتەگيا ماقساتتارىن دۇرىس يگەرىپ، «ءبىرىن - ءبىرى سەلبەستىك سەرىكتەسى ساناۋ، ءوزارا قاتەر توندىرمەۋ» سىندى ساياسي ورتاق تانىمدى شىنايى دايەكتىلەندىرىپ جانە امالياتتا ايگىلەپ، ۇنامدى ءوزارا ارەكەتتەستىكتى كۇشەيتىپ، ساياسي ءوزارا سەنىمدى نىعايتۋ كەرەك. ءتىپتى جوعارى دەڭگەيلى ناقتى ىستەر سەلبەستىگىن ورىستەتىپ، سەلبەستىكتىڭ كومەسكى مۇمكىندىكتەرىن تولىق اشىققا شىعارۋ كەرەك. جۇڭگونىڭ رەفورماسى قازىر ۇزبەي تەرەڭدەپ كەلەدى، اشىلعان ەسىك ونان ارى اشىلا تۇسەدى. بۇل جۇڭگونىڭ جاپونيانى قامتىعان دۇنيە جۇزىندەگى ەلدەرمەن سەلبەستىكتى كەڭەيتۋىنە اناعۇرلىم كوپ وراي ازىرلەيدى. «ءبىر بەلدەۋ، ءبىر جولدى» بىرگە قۇرۋ جۇڭگو مەن جاپونيانىڭ ءوزارا ءتيىمدى سەلبەستىكتى تەرەڭدەتۋىنە جاڭا تۇعىر جانە سىناق مۇمكىندىكتەرىن ازىرلەدى. جۇڭگو جاق ەكى ەلدىڭ اناعۇرلىم جوعارى دەڭگەيدە ءوزارا پايدا جەتكىزۋى مەن تەڭ يگىلىكتەنۋىن ىسكە اسىرۋ ءۇشىن، جاپونيا جاقتىڭ جاڭا داۋىردەگى جۇڭگونىڭ دامۋ ۇدەرىسىنە اناعۇرلىم بەلسەندى تۇردە ات سالىسۋىن قارسى الادى. اناعۇرلىم كەڭ كولەمدە گۋمانيتارلىق اۋىس - كۇيىستى ورىستەتىپ، ءوزارا تۇسىنىستىكتى تەرەڭدەتۋ، ەكى ەلدىڭ ءارقايسى سالاسىن، اسىرەسە، جاستاردى جۇڭگو مەن جاپونيانىڭ دوستىق ىستەرىنە جابال ات سالىسۋعا ىنتالاندىرۋ كەرەك. حاۋىپسىزدىك سالاسىندا اناعۇرلىم بەلسەندى ءوزارا ارەكەتتەستىكتى قانات جايدىرىپ، سىندارلى ەكى جاقتى حاۋىپسىزدىك قارىم - قاتىناسىن ورناتىپ، بەيبىت دامۋ جولىمەن قاتار ءجۇرىپ، ءوڭىردىڭ بەيبىتشىلىگى مەن ورنىقتىلىعىن قورعاۋ كەرەك. اناعۇرلىم تىعىز حالىقارالىق سەلبەستىكتى قانات جايدىرىپ، ورتاق مۇددەنى كەڭەيتىپ، وڭىرلىك ەكونوميكانىڭ ءبىر تۇلعالانۋىن ىلگەرىلەتىپ، عالامدىق سايىستارعا بىرگە توتەپ بەرىپ، كوپ جاقتىلىقتى قورعاپ، ەركىن ساۋداعا تاباندى بولىپ، اشىق الەمدىك ەكونوميكانىڭ قۇرىلۋىن ىلگەرىلەتۋ كەرەك. سەنىمدىلىككە ءمان بەرىپ، ۋادەدە تۇرىپ، جۇڭگو - جاپونيا ءتورت ساياسي حۇجاتى مەن ەكى جاق كەلىسكەن ورتاق تانىمدارعا ساي ىستەپ، قايشىلىق پەن الاۋىزدىقتى سىندارلى تۇردە شەشىپ، جۇڭگو مەن جاپونيا قارىم - قاتىناسىنىڭ اقاۋسىز دامۋىنىڭ ساياسي نەگىزىن ويداعىداي قورعاۋ كەرەك.
  انبەي جينسان مىنالاردى ءبىلدىردى: جاپونيا - جۇڭگو بەيبىتشىلىك جانە دوستىق شارتىنىڭ جاسالعانىنا 40 جىل تولعان وسى ءبىر كەلەلى ساتتە، جۇڭگودا رەسمي ساپاردا بولعانىما وتە قۋانىشتىمىن. وسى ساپار ارقىلى ەكى جاقتىڭ جاپونيا - جۇڭگو قارىم - قاتىناسىندا باسەكە سايكەستىككە اينالعان جاڭا ءداۋىر اشۋعا مۇمكىندىك الۋىن ءۇمىت ەتەمىن. جاپونيا مەن جۇڭگو — ءوزارا كورشى. ءوزارا پايدالى سەلبەستىك جاساۋ، ءوزارا قاتەر توندىرمەۋ رۋحى بويىنشا، ەكى ەل اراسىنداعى ءتورت ساياسي حۇجاتتا تۇراقتاندىرىلعان ورتاق تانىمعا سايكەس، ەكى جاقتى قارىم - قاتىناستاردى ىلگەرىلەتۋ ءارى حالىقارالىق جانە وڭىرلىك بەيبىتشىلىك پەن ەركىن ساۋدانى قورعاۋ ءۇشىن ۇلەس قوسۋ ءتيىس. بۇل حالىقارالىق قوعامنىڭ جانە وسى وڭىردەگى ەلدەردىڭ جالپى ءۇمىتى. جاپونيا جاق جۇڭگونىڭ سىرتقا ايقارا ەسىك اشۋىن قارسى الادى جانە قولدايدى ءارى جۇڭگونىڭ دامۋ ۇدەرىسىنە ۇزبەي بەلسەندى ات سالىسۋدى قالايدى. جاپونيا جاق جۇڭگو جاقپەن بىرگە جوعارى دەڭگەيلى جانە ءار دەڭگەيلى اۋىس - كۇيىستى نىعايتىپ، ەكى ەل دوستىعىنىڭ حالىق رايى نەگىزىن ۇزدىكسىز جاقسارتىپ، ەكى جاقتى الاۋىزدىقتاردى ۇيلەسىمدى تۇردە ويداعىداي تىزگىندەپ، جاپونيا مەن جۇڭگونىڭ ستراتەگيالىق ءوزارا ءتيىمدى قارىم - قاتىناسىنىڭ ىشكەرىلەي دامۋىن ىلگەرىلەتىپ، ءوڭىردىڭ ورنىقتىلىعى مەن گۇلدەنۋىنە جۇمىلا كۇش سالۋدى قالايدى. «ءبىر بەلدەۋ، ءبىر جول» − كومەسكى قۋاتقا يە وي - تولعام، جاپونيا جاق جۇڭگو جاقپەن كەڭ كولەمدى سالادا سەلبەستىكتى نىعايتۋدى، ونىڭ ىشىندە ءۇشىنشى جاقتىڭ بازارىن بىرگە اشۋدى قالايدى.
  ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.

بەرىپ كەت ورامالىڭدى

دوستار

الىستاعى اق ەركە