جاڭا حابارلار

 بالانىڭ ءوسىپ - جەتىلۋ بارىسىندا اۋىز قۋىسىنىڭ اقاۋسىزدحى

    كەلۋ قاينارى: شينجياڭ حالىق راديو ىستانسياسى    2018-11-19 20:05:02  

   كۇندەلىكتى تۇرمىستا كەيبىر جاڭساق تانىمداردان اۋلاق بولا المايمىز، ماسەلەن 6 جاسار بالانىڭ ءتىسىن قۇرت جەسە ەشتەمە ەتپەيدى، ءسۇت ءتىسى ايتەۋ ءبىر كۇنى تۇسپەي مە، ەرتەلى - كەش ءتىس شوتكىلەپ جۇرسە بالانىڭ اۋىز قۋىسىندا نە ماسەلە تۋىلا قويار دەيسىڭ، بالانىڭ تىستەرى رەتسىز بولسا دا قالىپتى تۇرمىسىنا ىقپال جاساي قويمايدى،- دەگەن سياقتى قاتە تانىمداردىڭ سەبەبىنەن از بولماعان اتا - انالار بالاسىنىڭ تىستەرىنىڭ  اق مارجانداي  جەتىلۋىنە ءمان بەرمەي قالادى.    بالانىڭ ءوسىپ - جەتىلۋ بارىسىندا اۋىز قۋىسىنىڭ اقاۋسىزدىعىنىڭ 4 ماڭىزدى مەزگىلى بار، وسى بىرنەشە مەزگىلدى مىقتى مەڭگەرگەندە بالالاردىڭ اق ءمارمار تىستەرىن قورعاي الاسىز.  1 -  سابيلەر تىسەگەن مەزگىل. جايشىلىقتا بوبەكتەر 6 ايعا تولعاننان كەيىن ءسۇت تىستەرى شىعىپ ءتىس جارا باستايدى. كوپتەگەن بوبەكتەردە ءدال وسى تۇستا ءتىسى ءىسۋ، سىزداۋ سياقتى جايىتتەر بايقالادى، وسى بارىستا  اتا - انالار بوبەكتەردىڭ اۋىز قۋىسىن تازالاسا جايسىزدانعانى باسىلادى. ونىڭ ۇستىنە قانداي جولمەن ەمىزسەڭىز دە ەمىزۋدىڭ الدى - ارتىندا بوبەكتىڭ اۋىز قۋىسىن شايقاپ، تازالاپ جۋۋىڭىز كەرەك.   2 -  ەمىزدىكپەن ءسۇت ىشەتىن جانە بارماعىن سوراتىن مەزگىل.   قاتىستى مالىمەتتەردە كورسەتىلۋىنشە، قازىر ەلىمىزدەگى 5 جاستارداعى بالالاردىڭ ءسۇت تىسىنە قان قۇرت ءتۇسۋ سالىستىرماسى %66 كە جەتكەن، قانقۇرت دۇنيە جۇزىلىك دەنساۋلىق ساقتاۋ ۇيىمى ءتۇيىندى ساقتانىپ، ەمدەيتىن 3 ءىرى جۇعىمدالمايتىن اۋرۋدىڭ ءبىرى، بالالار ءتىس اۋرۋىنىڭ ىشىندەگى جۇرت نازارىنداعى اۋرۋ، اسىرەسە بالالاردىڭ تىسەيتىن مەزگىلىنىڭ الدى - ارتىندا اۋىز قۋىسىندا جيى پايدا بولادى، اۋەلى جاڭادان ءتىس جارعان كەزدەگى ءسۇت ءتىستىڭ وزىنە قانقۇرت ءتۇسىپ كەتەدى.   بالالاردىڭ ءسۇت تىسىنە قانقۇرتتىڭ ءتۇسۋى ءسۇت تىسكە ىقپال جاساپ قانا قويماي كەيىن شىعاتىن ءتىستىڭ جەتىلۋىنە دە ىقپال جاسايدى، بالالار ەرجەتكەننەن سوڭ تىستەرى رەتسىز ءوسىپ، ءتىستى شىت جاڭا جوندەتۋگە تۋرا كەلەدى. قانقۇرت جەگەن ءتىستى ۋاعىندا ەمدەتپەسە، بالانىڭ قورەك قابىلداۋى مەن ءتىستىڭ ادەمى جەتىلۋىنە ىقپال جاسايدى. بالالاردىڭ تىسىنە قانقۇرت ءتۇسۋدىڭ باستى سەبەبى كوپتەگەن بالالاردىڭ كۇندەلىكتى ءتىس شوتكىلەۋگە ويداعىداي ءمان بەرمەگەندىگىندە.    جۇيەلى ءتىس شوتكىلەگەندە ءتىستىڭ ءىشى مەن سىرتىن جانە ءبۇيىرىن دە شوتكىلەۋ كەرەك، ونىڭ ۇستىنە ءتىس شوتكىلەۋ ۋاقىتى دا 3 مينۋتقا تولۋى كەرەك، ويتپەگەندە ازىق قالدىقتارى تولىق تازالانبايدى.     3 -  تىسەۋ مەزگىلى.     تىسەۋ مەزگىلىندە مىناداي ەكى جاعداي وڭاي تۋىلادى، ءبىرى تۇراقتى ءتىس وسسە دە ءسۇت ءتىس تۇسپەيدى، مۇندايدا اتا - انالار بالاسىن ەرتەرەك شيپاحاناعا اپارىپ ءتىسىن جۇلدىرۋى كەرەك، بۇل تۇراقتى ءتىستىڭ ورنىعۋىنا ءتيىمدى.  ەكىنشى، ءسۇت ءتىسى ەرتەرەك ءتۇسىپ قالسا دا تۇراقتى ءتىس وسپەسە، ۇزاق ۋاقىت كەم تىستىلىكتەن ءتىس اراسى جاقىنداپ، تۇراقتى ءتىس ءوز ورنىنا شىقپاي قالاتىن، قيسىق شىعاتىن جايىتتەر تۋىلادى، مۇندايدا دەر كەزىندە ءبىر جاقتىلى ەتكەنى، قاجەت بولعاندا ءتىس ارالىعىن ساقتايتىن جابدىق سالعانى، نەمەسە ءتىس شيپاگەرىنىڭ كومەگىندە تۇراقتى ءتىستىڭ جەتىلۋ جاعىن قاراستىرعانى ءجون.   4 -  ءتىستىڭ قالىپتاساتىن جانە اقىل ءتىستىڭ شىعاتىن مەزگىلى.   بالالاردىڭ تىسەيتىن مەزگىلىندە ەگەر ەرنىن، ءتىلىن تىستەيتىن، قارىنداش كەمىرەتىن، اۋىزىمەن تىنىس الاتىن ناشار ادەتتەرى بولسا ءتىسى ايقۇش - ۇيقىش شىعۋ سياقتى ماسەلەلەر تۋىلادى. 12 جاستان سوڭ بالالاردىڭ ءتىسىنىڭ ورنى نەگىزىنەن تۇراقتانىپ قالادى، ەگەر سول كەزدەردە دە ءتىسى رەتسىز وسسە، شيپاحانانىڭ اۋىز قۋىسى بولىمىنە بارىپ تىستەرىن جوندەتۋ، ەمدەتۋى كەرەك.
 


بەرىپ كەت ورامالىڭدى

دوستار

الىستاعى اق ەركە