جاڭا حابارلار

شي جينپيڭ ا ق ش − تىڭ زۇڭتۇڭى ترامپپەن ءديدارلاستى

    كەلۋ قاينارى: شينجياڭ گازەتى    2018-12-05 17:18:48  

شينحۋا اگەنتتىگىنىڭ 12 - ايدىڭ 1 - كۇنى بۋەنوس - ايرەستەن بەرگەن حابارى (تىلشىلەر حو شياۋگۋاڭ، لو جۇن، حۋاڭيىن جيازى). جەرگىلىكتى ۋاقىت 12 - ايدىڭ 1 - كۇنى كەشتە مەملەكەت ءتوراعاسى شي جينپيڭ ۇسىنىس بويىنشا ا ق ش زۇڭتۇڭى ترامپپەن بۋەنوس - ايرەستە كەشكى استا بىرگە بولدى ءارى ءديدارلاستى. ەكى ەلدىڭ مەملەكەت باسشىسى بۇكپەسىز، دوستىق رايدا جۇڭگو - ا ق ش قارىم - قاتىناسى جانە بىرگە كوڭىل بولەتىن حالىقارالىق ماسەلەلەر جونىندە تەرەڭدەي پىكىر اۋىسىپ، ماڭىزدى ورتاق تانىمعا كەلدى. ەكى جاق ءوزارا تيىمدىلىك جاساۋ، ءوزارا پايدا جەتكىزۋ نەگىزىندە سەلبەستىكتى كەڭەيتىپ، ءوزارا قۇرمەت ەتۋ نەگىزىندە الاۋىزدىقتى تەجەپ، سايكەستىكتى، سەلبەستىكتى، ورنىقتىلىقتى نەگىزگى ارنا ەتكەن جۇڭگو - ا ق ش قارىم - قاتىناسىن بىرگە ىلگەرىلەتۋدى قۇپتادى.   شي جينپيڭ مىنالاردى اتاپ كورسەتتى: جۇڭگو مەن ا ق ش دۇنيە ءجۇزىنىڭ بەيبىتشىلىگى مەن گۇلدەنۋىن جەبەۋ جاعىندا ماڭىزدى جاۋاپكەرشىلىكتى بىرگە ارقالاپ وتىر. جۇڭگو مەن ا ق ش اراسىنداعى تاماشا قارىم - قاتىناس ەكى ەل حالقىنىڭ ءتۇبىرلى مۇددەسىنە ۇيلەسەدى ءارى حالىقارالىق قوعامنىڭ جالپى بەتتىك ءۇمىتى. سەلبەستىك − جۇڭگونىڭ دا، ا ق ش - تىڭ دا ەڭ جاقسى تالعامى. تاراپتار جۇڭگو - ا ق ش قارىم - قاتىناسى دامۋىنىڭ زور بەتالىسىن ويداعىداي يگەرىپ، ەكى ەل قارىم - قاتىناسىنىڭ ۇزاق مەزگىل اقاۋسىز، ورنىقتى دامۋىن ىلگەرىلەتىپ، ەكى ەل حالقىنا جانە دۇنيە جۇزىندەگى ەلدەر حالىقتارىنا اناعۇرلىم كوبىرەك، اناعۇرلىم ويداعىداي باقىت جاراتۋى كەرەك.   ترامپ شي جينپيڭنىڭ ەكى ەلدىڭ قارىم - قاتىناسى جونىندەگى باعاسىن قۇپتادى. ترامپ مىنالاردى ءبىلدىردى: ا ق ش - جۇڭگو قارىم - قاتىناسى وتە ەرەكشە، ماڭىزدى، ءبىزدىڭ ەكى ەل دۇنيە جۇزىندە ىقپالعا يە ماڭىزدى مەملەكەتتەر، ەكى جاقتىڭ تاماشا سەلبەستىك قارىم - قاتىناستى ساقتاۋى ەكى ەلگە جانە دۇنيە جۇزىنە پايدالى. ا ق ش جاق جۇڭگو جاقپەن كەڭەسۋ ارقىلى ەكى ەلدىڭ سەلبەستىگىن نىعايتۋدى ءارى ەكى جاقتا ورىن تەپكەن ماسەلەلەر جونىندە ەكى جاققا بىردەي ءتيىمدى شەشۋ ءادىسىن بەلسەنە قاراستىرۋدى قالايدى.   ەكى ەلدىڭ مەملەكەت باسشىسى ءتۇرلى تاسىلدەر ارقىلى تىعىز بارىس - كەلىستى ۇزدىكسىز ساقتاپ، جۇڭگو - ا ق ش قارىم - قاتىناسىنىڭ دامۋ بەتالىسىنا بىرگە جەتەكشىلىك ەتۋدى قۇپ كوردى. تاراپتار ۇيلەسىمدى مەزگىلدە ءوزارا ساپاردا بولاتىن بولدى. تاراپتار ءتۇرلى سالاداعى كەڭەس پەن سەلبەستىكتى كۇشەيتىپ، وقۋ - اعارتۋ، گۋمانيتارلىق سالاداعى اۋىس - كۇيىستى نىعايتۋدى قۇپتادى. ترامپ مىنالاردى ءبىلدىردى: ا ق ش جاق جۇڭگولىق وقۋشىلاردىڭ ا ق ش - قا كەلىپ وقۋىن قارسى الادى. تاراپتار بەلسەندى ءىس - ارەكەت قولدانىپ، زاڭ اتقارۋ، ەسىرتكىگە تيىم سالۋ سياقتى سەلبەستىكتەردى كۇشەيتۋدى قۇپتادى، بۇل فەنتانيل تەكتەس زاتتاردى تىزگىندەۋدى دە قامتيدى. جۇڭگونىڭ قازىرگە دەيىن قولدانعان شارالارى ا ق ش - تى ءوز ىشىنە العان حالىقارالىق قوعامنىڭ تولىق قۇپتاۋىنا يە بولدى. جۇڭگو جاق فەنتانيل تەكتى زاتتاردى تۇرلەرگە رەتتەپ، ءتۇيىندى باسقارۋعا ەنگىزۋدى ءارى قاتىستى زاڭ - ەرەجەلەردى رەتتەۋ قىزمەتىن باستاۋدى ۇيعاردى.   ەكونوميكا - ساۋدا ماسەلەسى جونىندە شي جينپيڭ مىنالاردى باسا دارىپتەدى: جۇڭگو مەن ا ق ش دۇنيە جۇزىندەگى ەڭ ۇلكەن ەكى ەكونوميكالىق تۇلعا رەتىندە، ەكونوميكا - ساۋدا بايلانىستارى وتە تىعىز، ءبىرىن - ءبىرى سۇيەنىش ەتەدى. ەكى جاق اراسىندا ەكونوميكا - ساۋدا سالاسىندا ءىشىنارا الاۋىزدىقتاردىڭ بولۋى بۇكىلدەي قالىپتى، باستىسى، ءوزارا قۇرمەت ەتۋ، تەڭ تۇرعىدا ءوزارا پايدا جەتكىزۋ رۋحىمەن ۇيلەسىمدى تەجەۋ ءارى ەكى جاق تا قابىلداي الاتىن شەشۋ ءادىسىن قاراستىرۋ قاجەت. ەكى ەلدىڭ مەملەكەت باسشىسى جۇڭگو مەن ا ق ش اراسىنداعى ەكونوميكا - ساۋدا ماسەلەلەرى جونىندە بەلسەندى، ناتيجەلى تالقى ورىستەتتى. ەكى ەلدىڭ مەملەكەت باسشىسى جاڭا كەدەندىك باجى ۇستەۋدى توقتاتۋ تۋرالى ورتاق تانىمعا كەلدى ءارى ەكى ەلدىڭ ەكونوميكالىق ۇجىمدارىنا كەڭەستى جەدەلدەتىپ، بارلىق ۇستەمەلەنگەن كەدەن باجىلارىن تۇگەلدەي كۇشىنەن قالدىرۋ بەتالىسىن بويلاپ، ءوزارا پايدالى، ەكى جاققا بىردەي ءتيىمدى ناقتى كەلىسىمگە كەلۋ جونىندە نۇسقاۋ بەردى. جۇڭگو جاق مىنانى ءبىلدىردى: جۇڭگونىڭ جاڭا كەزەكتى رەفورما جاساۋ، ەسىك اشۋ ۇدەرىسىنە جانە ەل ءىشى بازارى مەن حالىقتىڭ قاجەتىنە نەگىزدەلىپ، بازاردى اشىپ، يمپورتتى كەڭەيتىپ، جۇڭگو مەن ا ق ش - تىڭ ەكونوميكا - ساۋدا سالاسىنداعى قاتىستى ماسەلەلەردىڭ باسەڭدەۋىن ىلگەرىلەتۋدى قالايمىز. ەكى جاق كەلىسكەن ءوزارا پايدالى، ەكى جاققا بىردەي ءتيىمدى ناقتى كەلىسىم − جۇڭگو جاقتىڭ ا ق ش جاق جونىندە قاتىستى بەلسەندى ارەكەتتەر قولدانۋىنىڭ نەگىزى جانە العى شارتى. ەكى جاق بىردەي قۇلشىنىس جاساپ، ەكى جاقتى ەكونوميكا - ساۋدا قارىم - قاتىناسىنىڭ تەز ارادا قالىپتى ارناعا ورالۋىن ىلگەرىلەتىپ، سەلبەسە تەڭ يگىلىكتەنۋدى ىسكە اسىرۋى قاجەت.   شي جينپيڭ جۇڭگو ۇكىمەتىنىڭ تايۋان ماسەلەسى جونىندەگى پرينسيپتىك تۇرعىسىن بايىمدادى. ا ق ش جاق ا ق ش ۇكىمەتىنىڭ ءبىر جۇڭگو ساياساتىن ۇزدىكسىز اتقاراتىندىعىن ءبىلدىردى.   ەكى ەلدىڭ مەملەكەت باسشىسى چاۋشيان تۇبەگى سياقتى ەلەۋلى حالىقارالىق، وڭىرلىك ماسەلەلەر جونىندە پىكىر اۋىستىردى. جۇڭگو جاق ا ق ش - چاۋشيان باسشىلارىنىڭ تاعى دا كەزدەسۋىن قولدايتىندىعىن ءبىلدىرىپ، ا ق ش - چاۋشيان تاراپتارىنىڭ ورتاق ماقساتتى كوزدەپ، ءبىر - ءبىرىنىڭ ۇيلەسىمدى قاداعالاپ وتىرعان تۇستارىنا نازار اۋدارۋىن ءارى تۇبەكتىڭ بۇكىلدەي يادروسىزدانۋى مەن تۇبەكتىڭ بەيبىتشىلىك مەحانيزمىنىڭ ورناۋىن ىلگەرىلەتۋىن ءۇمىت ەتتى. ا ق ش جاق جۇڭگو جاقتىڭ اتقارعان بەلسەندى رولىن القادى، جۇڭگو جاقپەن وسى جونىندە بايلانىس پەن سايكەستىكتى ساقتاۋدى ءۇمىت ەتتى.   ەكى ەلدىڭ مەملەكەت باسشىسى ءبىر اۋىزدان وسى رەتكى كەڭەس وتە تابىستى بولدى دەپ قارادى. ەكى جاق تىعىز بايلانىستى ۇزدىكسىز ساقتاۋعا قوسىلدى.   ديڭ شۋەشياڭ، ليۋ حى، ياڭ جيەچى، ۋاڭ ي، حى ليفىڭ، سونداي - اق ا ق ش - تىڭ مەملەكەت ىستەرى حاتشىسى پومپەو، قازىنا مينيسترى منۋچين سياقتى ا ق ش ۇكىمەتىنىڭ كوپتەگەن جوعارى لاۋازىمدى ءمانساپتىلارى قاتىناستى.


بەرىپ كەت ورامالىڭدى

دوستار

الىستاعى اق ەركە