جاڭا حابارلار

شي جينپيڭ ارگەنتينانىڭ زۇڭتۇڭى ماكريمەن كەڭەس وتكىزدى

    كەلۋ قاينارى: شينجياڭ گازەتى    2018-12-06 23:55:06  

 شينحۋا اگەنتتىگىنىڭ 12 - ايدىڭ 2 - كۇنى بۋەنوس - ايرەستەن بەرگەن حابارى (تىلشىلەر چىن جى، حو شياۋگۋاڭ، ۋاڭ حايچيڭ). جەرگىلىكتى ۋاقىت 12 - ايدىڭ 2 - كۇنى مەملەكەت ءتوراعاسى شي جينپيڭ ارگەنتينانىڭ زۇڭتۇڭى ماكريمەن بۋەنوس - ايرەستە كەڭەس وتكىزدى. ەكى ەلدىڭ مەملەكەت باسشىسى ەكى ەلدىڭ قارىم - قاتىناسىن دامىتۋ جوباسىن اناعۇرلىم كەڭ ايادا جوبالاپ، جۇڭگو مەن ارگەنتينانىڭ جاپپاي ستراتەگيالىق سەرىكتەستىك قاتىناسىنىڭ تىڭ ءداۋىرىن قول ۇستاسا اشۋعا ءبىر اۋىزدان كەلىستى. 

 شي جينپيڭ مىنالاردى اتاپ كورسەتتى: 2 جىلدان استام ۋاقىتتان بەرى، زۇڭتۇڭ مىرزا ەكەۋىمىز 5 مارتە كەزدەسىپ، جۇڭگو - ارگەنتينا قارىم - قاتىناسىنىڭ تاريحىندا جاڭا رەكورد جاراتتىق. جۇڭگو - ارگەنتينا سەلبەستىگىنىڭ كەڭدىگى مەن تەرەڭدىگى بۇرىن بولماعان دەڭگەيگە جەتتى. قازىر حالىقارالىق جاعداي كۇردەلى دە اۋمالى - توكپەلى. جاڭا جاعدايعا، جاڭا سايىسقا مەڭزەس، تاراپتار ءوزارا قۇرمەت ەتۋ، تەڭ تۇرعىدا ءوزارا پايدا جەتكىزۋ، سەلبەسە تەڭ يگىلىكتەنۋ نەگىزىندە، ەكى جاقتى قارىم - قاتىناستى اناعۇرلىم كەڭ ايادان جوبالاپ، ءتۇرلى سالاداعى سەلبەستىكتى تەرەڭدەتىپ جانە ناقتىلاندىرىپ، جۇڭگو - ارگەنتينا جاپپاي ستراتەگيالىق سەرىكتەستىك قاتىناسىنىڭ جاڭا ءداۋىرىن اشىپ، ەكى ەل مەن دۇنيە ءجۇزىنىڭ بەيبىتشىلىگىنە، ورنىقتىلىعىنا جانە گۇلدەنۋىنە تىڭ ۇلەس قوسۋى كەرەك.

  شي جينپيڭ مىنالاردى اتاپ كورسەتتى: تاراپتار ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىر - ءبىرىن ۇزدىكسىز قولداپ، قارسى جاقتىڭ دەربەس تاڭداعان دامۋ جولىنا مىزعىماستان قولداۋ كورسەتۋى كەرەك. بيىل جىل باسىنان بەرى، ارگەنتينانىڭ ەكونوميكا - فينانس جاعدايىندا تولقۋ جارىققا شىقتى. جۇڭگو جاق ناقتى ارەكەت قولدانىپ، ارگەنتينا جاقتىڭ ءوز ەلىنىڭ فينانس ورنىقتىلىعىن ساقتاۋ قۇلشىنىسىنا قولداۋ كورسەتتى، ارگەنتينانىڭ دامۋ بولاشاعىنا كامىل سەنىمدە بولدى، جۇڭگو - ارگەنتينا سەلبەستىگىنە ۇمىتپەن قارادى. تاراپتار الداعى 5 جىلداعى ەكى ەل ۇكىمەتىنىڭ ورتاق ارەكەت جوسپارىن تۇعىرناما ەتىپ، «ءبىر بەلدەۋ، ءبىر جولدى» بىرگە قۇرۋ اياسىندا بايلانىس پەن سەلبەستىكتى كۇشەيتىپ، ەكى ەلدىڭ دامۋ جوبالارىن ءتۇيىستىرىپ، ءار دەڭگەيدەگى سان - سالالى اۋىس - ءتۇيىس پەن سەلبەستىكتى ءبىر تۇتاس ىلگەرىلەتۋى كەرەك. جۇڭگو جاق ارگەنتينادان ساپالى ءونىم مەن قىزمەت وتەۋدى ەكسپورت ەتۋدى كەڭەيتىپ، تاراپتار اراسىنداعى ساۋدانى قولايلىلاندىرۋدى قالايدى. جۇڭگو جاق ارگەنتينا جاقتىڭ ەنەرگيا كوزدەرىن كوپ نەگىزدەندىرۋ ستراتەگياسىن قولدايدى، ارگەنتينا جاقپەن بىرگە ەنەرگيا سالاسىنداعى «كوشباسشى» نىسانداردى ويداعىداي اتقارۋدى قالايدى. جۇڭگو جاق ارگەنتينا جاقتىڭ نەگىزدىك قۇرىلعى قۇرىلىسى مەن حالىق تۇرمىسى سياقتى نىساندارىنا بەلسەندى تۇردە ات سالىسىپ، ارگەنتينا مەن وڭتۇستىك امەريكا ءوڭىرىنىڭ ۇلاسۋىن - تۇتاسۋىن جەبەۋدى قالايدى. قارجى سالۋ - قۇراۋ جانە ءوز ەلىنىڭ اقشاسىن ايىرباستاۋ سەلبەستىگىن تەرەڭدەتىپ، حالىقارالىق اقشا جۇيەسىن رەفورمالاۋدى جانە كەمەلدەندىرۋدى قولداپ، بازارى جاڭادان گۇلدەنگەن ەكونوميكالىق تۇلعالار مەن وركەندەپ كەلە جاتقان ەلدەردىڭ حالىقارالىق ەكونوميكا - فينانس قۇرىلىمدارىنداعى ءسوز ۇقىعى مەن ۋاكىلدىك سيپاتىن بىرگە كوتەرۋ كەرەك. جاستاردىڭ اۋىس - كۇيىسىن ىلگەرىلەتىپ، مادەنيەت، وقۋ - اعارتۋ، ساياحات، سپورت سياقتى سالالارداعى سەلبەستىكتى ىلگەرىلەتىپ، ەكى ەلدەگى حالىقتاردىڭ ءوزارا تۇسىنىستىگى مەن دوستىق سۇيىسپەنشىلىگىن نىعايتۋ قاجەت.  

 شي جينپيڭ مىنالاردى اتاپ كورسەتتى: جۇڭگو دا، ارگەنتينا دا ماڭىزدى ىقپالعا يە وركەندەپ كەلە جاتقان ەل جانە بازارى جاڭادان گۇلدەنگەن ەل، كوپ جاقتىلىق پەن اشىق، سيىسىمدى دۇنيە ءجۇزى ەكونوميكاسىنا بىرگە قولداۋ كورسەتۋى ءتيىس. جۇڭگو جاق ارگەنتينا جاقپەن بىرگە كوپ جاقتى مەحانيزم اياسىنداعى ۇيلەستىك پەن سايكەستىكتى كۇشەيتىپ، تۇستىك ەلدەر سەلبەستىگىن تەرەڭدەتىپ، ەكونوميكانىڭ جاھاندانۋىنىڭ جەتىستىكتەرىمەن، ءتىپتى، كوپ وركەندەپ كەلە جاتقان ەلدەردى يگىلىكتەندىرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.  

 شي جينپيڭ مىنالاردى باسا دارىپتەدى: قازىر سىرتقى ورتاداعى سەبەپتەردىڭ ىقپالىنا ۇشىراعاندىقتان، لاتىن امەريكاسى ءوڭىرىنىڭ جاعدايىندا تەرەڭ دە كۇردەلى وزگەرىستەر جارىققا شىعىپ، سايىس كوبەيدى. لاتىن امەريكاسىنداعى حالىقتاردىڭ شىنايى دوسى جانە سەرىگى رەتىندە، جۇڭگو جاق لاتىن امەريكاسى ەلدەرىنىڭ ءوز قۇلشىنىستارى ارقىلى بەيبىتشىلىك پەن ورنىقتىلىقتى جانە دامۋ مەن وركەندەۋدى ىسكە اسىرۋعا پاراساتى، قابىلەتى جەتەتىنىنە سەنەدى. ءبىز لاتىن امەريكاسىنىڭ دامۋ بولاشاعىنا نىق سەنىممەن قارايمىز، تەڭ قاراۋ، ءوزارا پايدا جەتكىزىپ، تەڭ يگىلىكتەنۋ پرينسيبىنە تاباندى بولىپ، ارگەنتينانى قامتىعان لاتىن امەريكالىق دوستارمەن بىرگە جاڭا داۋىردەگى تەڭ تۇرعىلى، ءوزارا ءتيىمدى، جاڭاشىل، اشىق، حالىققا ءتيىمدى جۇڭگو - لاتىن امەريكاسى قارىم - قاتىناسىن ورناتىپ، جۇڭگو - لاتىن امەريكاسى تالقى مىنبەرىنىڭ قۇرىلىسى مەن «ءبىر بەلدەۋ، ءبىر جول» سەلبەستىگىنە بەلسەنە ات سالىسىپ، جۇڭگو - لاتىن امەريكاسى تاعدىرلاس ورتاق تۇلعاسىنىڭ قۇرىلۋىن بىرگە ىلگەرىلەتەمىز.  شي جينپيڭ ەندى عانا جابىلعان 20 ەل توبى باسشىلارى باس قوسۋىنىڭ بەلسەندى جەتىستىكتەرگە قول جەتكىزىپ ءارى باسشىلار جارناماسىن ماقۇلداپ، دۇنيە جۇزىنە دۇرىس، بەلسەندى، جۇرت كوڭىلىن ورنىقتىراتىن ينفورماتسيا تاراتقانىن قۇتتىقتادى، ارگەنتينا جاقتىڭ ماڭىزدى سايكەستىرۋ رولىن اتقارعانىن القادى. شي جينپيڭ مىنالاردى اتاپ كورسەتتى: وسى رەتكى ءماجىلىس توتەنشە كۇردەلى حالىقارالىق جاعدايدا اشىلىپ، حالىقارالىق قوعامنىڭ جاپپاي نازارىن اۋداردى. نەگىزگى ءىرى ەلدەردىڭ باسشىلارى باس قوسىپ، كەلەلى حالىقارالىق ماسەلەلەر جونىندە ورتاق تانىمعا كەلىپ، باسشىلار جارناماسىن ماقۇلداۋى ماڭىزدى مانگە يە. وسى رەتكى ءماجىلىستىڭ تابىسى كوپ جاقتىلىققا تاباندى بولۋدىڭ جەڭىسى، كوپ جاقتى ساۋدا ءتۇزىلىسىن قورعاۋعا، اشىق دۇنيە ءجۇزى ەكونوميكاسىن قۇرۋعا پايدالى، حالىقارالىق بازارعا سەنىم مەن ومىرشەڭدىك كۇش ۇستەۋگە دە پايدالى.   ماكري مىنالاردى ءبىلدىردى: ءتوراعا شي جينپيڭنىڭ ارگەنتيناعا ساپارلاي كەلگەندىگىن قىزۋ قارسى الامىن، جۇڭگونىڭ ۇزاقتان بەرى كورسەتكەن كومەگى مەن قولداۋىنا العىس ايتامىن. جۇڭگونىڭ رەفورما جاساپ، ەسىك اشقاندىعىنىڭ 40 جىلدىعى قارساڭىندا، ارگەنتينا جۇڭگونىڭ ەكونوميكالىق، قوعامدىق دامۋ جانە كەدەيلىكتى ازايتۋ سياقتى جاقتاردا قول جەتكىزگەن ەلەۋلى جەتىستىكتەرىن قۇتتىقتايدى. جۇڭگو دۇنيە ءجۇزى ەكونوميكاسىنىڭ باستى قوزعالتقىشىنا اينالدى، جۇڭگونىڭ دامۋى جانە جۇڭگو ارمانىنىڭ ورىندالۋى ارگەنتينا مەن لاتىن امەريكاسىنىڭ دامۋىنا ەلەۋلى ىقپال جاسايدى، دۇنيە ءجۇزىنىڭ بەيبىتشىلىگى، ورنىقتىلىعى جانە گۇلدەنۋى ءۇشىن تەرەڭ مانگە يە. ارگەنتينا جۇڭگومەن جاپپاي ستراتەگيالىق سەرىكتەستىك قارىم - قاتىناستى تەرەڭدەتۋگە تاباندى تۇردە كۇش سالىپ، «ءبىر بەلدەۋ، ءبىر جول» اياسىنداعى سەلبەستىكتى كۇشەيتەدى. تاياۋ جىلداردان بەرى، ارگەنتينا مەن جۇڭگونىڭ ءوزارا سەنىمى نىعايىپ، ءار سالاداعى بارىس - كەلىسى جيىلەپ، ەكى ەلدىڭ سەلبەستىگى ءوزارا تيىمدىلىك جاساپ، تەڭ يگىلىكتەنۋدىڭ جاڭا كەزەڭىنە ءوتتى. ارگەنتينا جۇڭگونىڭ تۇڭعىش كەزەكتى حالىقارالىق يمپورت كورمەسىنە تابىسپەن قاتىناستى، جۇڭگو بازارىن ونان ارى اشۋدى قالايدى. ارگەنتينا وسى رەت الداعى 5 جىلداعى ورتاق ارەكەت جوسپارىنا ەكى جاقتىڭ قول قويىسۋىن وراي ەتىپ، اۋىل شارۋاشىلىعى، فينانس، اۆياتسيا، نەگىزدىك قۇرىلعى قۇرىلىسى سياقتى سەلبەستىكتەردى كەڭەيتۋدى، ساياحات، سپورت سياقتى گۋمانيتارلىق سالالارداعى اۋىس - كۇيىستى ارتتىرۋدى ءۇمىت ەتەدى. ارگەنتينا جۇڭگو كاسىپورىندارىنىڭ ارگەنتيناعا قارجى قوسۋدى كەڭەيتۋىن قارسى الادى.   ماكري بىلاي دەدى: مەن ءتوراعا شي جينپيڭنىڭ جاڭا عانا اياقتاعان 20 ەل توبى باسشىلارىنىڭ باس قوسۋىنا پارمەندى قولداۋ كورسەتكەنىن ايرىقشا القايمىن، بۇل وسى رەتكى باسشىلار باس قوسۋىنىڭ تابىسقا جەتۋىندە ايرىقشا ماڭىز الادى. ارگەنتينا جۇڭگومەن كوپ جاقتى ىستەردە سايكەسۋ مەن سەلبەسۋدى ونان ارى جيىلەتۋدى قالايدى.

  ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى ۇكىمەتى مەن ارگەنتينا رەسپۋبليكاسى ۇكىمەتىنىڭ ورتاق ارەكەت جوسپارىنا (2019 − 2023)» جانە كوپتەگەن ەكى جاقتى سەلبەستىك حۇجاتتارىنا قول قويىسۋعا بىرگە كۋا بولدى.   ەكى جاق «جۇڭحۋا حالىق رەسپۋبليكاسى مەن ارگەنتينا رەسپۋبليكاسىنىڭ بىرلەسكەن مالىمدەمەسىن» جاريالادى.  

 كەڭەستەن بۇرىن، ماكري زۇڭتۇڭ سارايىنىڭ قۇرمەت الاڭىندا شي جينپيڭگە ارناپ سالتاناتتى قارسى الۋ سالتىن وتكىزدى.   كوكتەمگى بۋەنوس - ايرەس مامىراجاي شۋاققا شومىلىپ، لانيىڭ گۇلى شەشەك اتىپ، شي جينپيڭنىڭ كەلگەنىن قارسى الىپ تۇردى.

  شي جينپيڭ مەن حانىمى پىڭ لييۋان اتتىلار اترەتىنىڭ قورعاۋىندا زۇڭتۇڭ سارايىنا جول الدى، قۇرمەت قاراۋىلدارى سايالى داڭعىلدىڭ ەكى جاعىندا قاتار تۇزەپ، كوزدەن كەشىرۋدى قابىلدادى. قۇرمەت الاڭىنا جەتكەن كەزدە، اسكەري وركەستر ويناقى مارش مۋزيكاسىن ورىندادى. ماكري مەن حانىمى اۆادا الدىعا كەلىپ ىستىق ىقىلاسپەن قارسى الدى. ەكى ەلدىڭ مەملەكەت باسشىلارى مەن حانىمدارى كوزدەن كەشىرۋ تۇعىرىنا شىقتى. اسكەري وركەستر جۇڭگو، ارگەنتينا ەكى ەلدىڭ مەملەكەت ءانىن ورىندادى.   شي جينپيڭ ماكريدىڭ سەرىك بولۋىندا سان - مارتين مۇسىنىنە گۇل شەڭبەرىن قويدى.  

 قارسى الۋ سالتى اياقتاعان سوڭ، شي جينپيڭ مەن ماكري زۇڭتۇڭ سارايىنىڭ جۇمىس عيماراتىنىڭ سىرتىنداعى كوگالعا كەلدى. ەكى ەلدىڭ مەملەكەت باسشىلارى كوڭىلدى كەڭەسىپ، ماكري شي جينپيڭگە ات دوپ سپورتىن تانىستىردى، سونداي - اق جۇڭگونىڭ مەملەكەت تۋى ورنەگى تۇسىرىلگەن ات دوپ باس كيىمىن جانە ات دوپ تاياقشاسىن سيلادى. شي جينپيڭ دوپ تاياقشاسىن ۇستاپ، دوپ قاقتى، ماكري كۇلىمسىرەي ماقتاۋ ايتتى. شي جينپيڭ ماكريگە جۇڭگونىڭ كەستە تۋىندىسى «تاڭ ايەلدەرىنىڭ ات دوپ ويناۋ سۋرەتىن» سيلادى. ەكى ەلدىڭ مەملەكەت باسشىلارى سپورت اۋىس - كۇيىسىن ورىستەتۋ، حالىقتار دوستىعىن تەرەڭدەتۋ جونىندە پىكىر اۋىستىردى.  

 ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.


بەرىپ كەت ورامالىڭدى

دوستار

الىستاعى اق ەركە