جاڭا حابارلار

تالدى قالاشعى تاماشا توراڭعى كورىنىسىن «تابىس كوزىنە» اينالدىرى

    كەلۋ قاينارى: شينجياڭ حالىق راديو ىستانسياسى    2018-12-09 09:57:32  
ستانسيامىزدىڭ تىلشىلەرى ءلان تيان مەن جاۋ لينانىڭ حابارى: شيحۋ قالاسى تالدى قالاشىعىنىڭ تاۋلى رايونداعى ساحارا، جازىقتاعى كول، مىڭ جىلدىق توراڭعى ورمانى، ءشول جازيرا سياقتى جاراتىلىستىق كورىنىستەرى بار، كەزىندە 3 رەت «جۇڭگوداعى ەڭ كوركەم قىستاق-قالاشىق» بولىپ باعالانعان. سوڭعى جىلداردان بەرى، تالدى قالاشىعى ساياحات كاسىبىن بەلسەنە دامىتىپ، تاماشا كورىنىستى «تابىس كوزىنە» اينالدىرىپ، جەرگىلىكتى ورىنداعى ەگىنشى-مالشىلارىڭ كىرىسىن ارتتىرىپ، باي-باقىتتى تۇرمىس كەشىرۋگە باستادى.
تۇستە تالدى قالاشىعىنداعى «فۋلاي» ديحاندار تاعامجايىنىڭ اس ءۇيى اسا قاربالاستىققا ءتۇستى. ونداعىلار ماتەريال دايىنداپ، قازاندى قىزدىرىپ، ماي قۇيىپ، قۋىرماش قۋىردى، تۇتاس اۋلادا تاماقتىڭ ءيىسى اڭقيدى. حاريدار فۋ زىلي بىلاي دەدى: «دوس-جاراندارىمىز كەلگەن، بۇگىن ارنايى وسى جەرگە تاماقتاندىرعالى اكەلدىك، ولاردىڭ تاماقتارى وتە ءدامدى، التىن اپتالىق كەزىندە ەكى، ءۇش كۇن بۇرىن بۇيىرتىپ قويامىز، كۇنبە-كۇن بۇيىرتسا تاماق جوق، تاۋسىلىپ كەتەدى».
ديحاندار تاعامجايىنىڭ يەسى زالەلبەك بايدوللا ۇلى تىلشىگە: «بۇرىن مال باعۋعا سۇيەنىپ كۇنەلتەتىندىگىن، كىرىسىنىڭ دە ماردىمسىز ەكەنىن ايتتى». 2007-جىلى، تالدى قالاشىعى ساياحات كاسىبىن دامىتا باستاعاندا، ول اۋلاسىنان ديحاندار تاعامجايىن اشادى. ول بۇگىنگى كۇندە كىرىسى 70 مىڭ يۋاننان اساتىندىعىن ايتا كەلىپ بىلاي دەدى: «ءبىر جىلدىڭ 4 ماۋسىمىندا دا اشامىز. قارامايلى مەن ۇرىمجىدەن كەلەتىندەر كوپ، 10-ايدا، توراڭعى اعاشى سارعايعان كەزدە كەلەتىندەر وتە كوپ بولادى، 10-ايدا، ءبىر كۇندە ءبىر قوي سويدىق».
زالەلبەك بايدوللا ۇلى ايتىپ وتىرعان توراڭعى ورمانى ديحاندار تاعامجايىنان 6 كيلومەتر الىستاعى قىزىلجار كولى كورىنىس رايونىندا. قازىر قىزىلجار كولى قاتىپ، جاعالاۋىنداعى قامىستار قار-مۇزدىڭ كورىك سيلاۋىندا سارى التىن تۇسكە ەنۋدە. كورىنىس رايونىن باسقارۋشى چيان حۇيبيڭ وسى ماڭداعى تالدى قالاشىعى ۇلانيەرگى قىستاعىنىڭ تۇرعىنى، بىرنەشە جىلدىڭ الدىندا ول 40 مۋ جەرىنىڭ ءار مۋىن 550 يۋاننان سىرتقا كوتەرمەگە بەرىپ، ءوزى كورىنىس رايونىنا بارىپ، جۇمىس ىستەيدى. چيان حۇيبيڭ بىلاي دەدى: «قازىر ءبىر جىلدا 40 مىڭ يۋان ەڭبەكاقى الامىن، قاربالاس كەزدەرى ماڭىمىزدان كۇنىنە 140 يۋان دا 150 يۋان اقى بەرىپ، قىزمەتكەر جالداپ اكەلەمىز».
اناعۇرلىم كوپ ەگىنشى-مالشىنى ساياحات كاسىبىنە ات سالىسۋعا باۋراۋ ءۇشىن، 2016-جىلى، تالدى قالاشىعى قارجى قوسىپ، ەكولوگيالىق سالت-سانا باقشاسىن سالىپ، 52 كەدەي وتباسى كەدەيلەردى دالمە-ءدال سۇيەمەلدەۋ، شوعىرلى ورنالاستىرۋ ۇيىنە كوشىپ كىرىپ، نان جاباۋ، كەستەشىلىك سياقتى ساۋدا جۇمىستارىمەن اينالىستى. كەستەحانا اشقان جەڭىسگۇل قىرباي قىزى تىلشىگە بىلاي دەدى: «بۇرىن ۇيىمدە وتىرىپ، كەستە تىگەتىنمىن دە، سىرتقا ساتا المايتىنمىن. قازىر تاۋدان قالاشىققا كوشتىك، شارت-جاعدايىمىز جاقسى، ساياحاتشىلار دا مول، ولار مەن تىككەن كويلەكتەردى، كەپەشتەردى كيىپ، مەنىمەن بىرگە سۋرەتكە تۇسەدى. 18 شاكىرت تاربيەلەدىم، بارلىعى ءوز الدىنا تىگىنحانا اشىپ الدى».
قازىر، تالدى قالاشىعى جىلىنا 150 مىڭ ادام رەتتەن ارتىق ساياحاتشى قابىلدادى. تالدى قالاشىق پارتكومىنىڭ مۇشەسى ۋاڭ جىجۋ: «بيىل 9-ايدا، تالدى قالاشىعى مەن G30 جوعارى قارقىندى تاس جولىنىڭ ءۇرىمجى-كۇيتۇن بولەگى ارالىعىنداعى اۋىل-قىستاق جولدارى وزگەرتىلىپ سالىنا باستادى. كەلەر جىلى 1-مامىردا، ساياحاتشىلار وسى جاڭا جولمەن كورىنىس رايونىنا توتە جەتەتىن بولادى»،-دەدى. ۋاڭ جىجۋ بىلاي دەدى: «بۇل جولدىڭ ۇزىندىعى 15 كيلومەتر، بۇرىن دا اسفاليت جول بولاتىن، الايدا مۇنداي كەڭ ەمەس، قازىر، 4 اۆتوكولىك قاتار جۇرەتىن ەتىپ كەڭەيتىلىپ، ساياحاتشىلاردى بۇقارانىڭ ءۇيىنىڭ الدىنا دەيىن اپارىپ، وسى 15 كيلومەترلىك جول بۇقارانىڭ ساياحات ارقىلى اۋقاتتانۋ جولىنا اينالاتىن بولدى».

بەرىپ كەت ورامالىڭدى

دوستار

الىستاعى اق ەركە