جاڭا حابارلار

شي جينپيڭ ا ق ش - تىڭ زۇڭتۇڭى ترامپپەن تەلەفوندا سويلەستى

    كەلۋ قاينارى: شينجياڭ گازەتى    2018-12-31 21:24:41  
 شينحۋا اگەنتتىگىنىڭ 12 - ايدىڭ 29 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 12 - ايدىڭ 29 - كۇنى ۋادە بويىنشا ا ق ش - تىڭ زۇڭتۇڭى ترامپپەن تەلەفوندا سويلەستى. 
  ترامپ شي جينپيڭگە جانە جۇڭگو حالقىنا جاڭا جىل بايلانىسىمەن سالەم جولدادى جانە ىزگى تىلەك ءبىلدىردى. ترامپ مىنانى ءبىلدىردى: ا ق ش - جۇڭگو قارىم - قاتىناسى وتە ماڭىزدى، وعان بۇكىل دۇنيە ءجۇزى جاپپاي كوز تىگىپ وتىر. مەن ءتوراعا شي جينپيڭمەن تاماشا قارىم - قاتىناسىمدى قاستەرلەيمىن. ەكى ەلدىڭ قىزمەت گرۋپپالارىنىڭ ءتوراعا شي جينپيڭ ەكەۋىمىز ارگەنتينادا كەڭەس وتكىزگەندە قول جەتكىزگەن ماڭىزدى ورتاق تانىمدارىمىزدى قۇلشىنا تياناقتاندىرىپ جاتقاندىعىنا قاباعات قۋاندىم. قاتىستى كەلىسسوز، اقىلداسۋ بەلسەندى ىلگەرىلەۋشىلىكتەرگە قول جەتكىزىپ، ەكى ەل حالقىنا جانە دۇنيە جۇزىندەگى ءار ەل حالقىنا يگى تابىستار اكەلۋىن ءۇمىت ەتەمىن. 
  شي جينپيڭ ترامپتى جانە ا ق ش حالقىن جاڭا جىل بايلانىسىمەن قۇتتىقتادى. شي جينپيڭ مىنالاردى اتاپ كورسەتتى: مەن جانە زۇڭتۇڭ مىرزا ەكەۋىمىز دە جۇڭگو - ا ق ش قارىم - قاتىناسىنىڭ ورنىقتى العا دامۋىن ىلگەرىلەتۋدى قۇپتايمىز. كەزەكتە ەكى ەل قارىم - قاتىناسى ماڭىزدى كەزەڭدە تۇر. وسى ايدىڭ باسىندا، مەن زۇڭتۇڭ مىرزامەن ارگەنتينادا ءساتتى كەڭەس وتكىزدىم، ماڭىزدى ورتاق تانىمعا كەلدىك. سودان بەرى ەكى ەلدىڭ قىزمەت گرۋپپالارى تياناقتاندىرۋ قىزمەتىن بەلسەنە ىلگەرىلەتۋدە. ەكى جاق گرۋپپالارىنىڭ ءبىر باعىتتا ىلگەرىلەپ، قىزمەتتى مىقتى ۇستاپ، ءوزارا پايدا جەتكىزىپ، تەڭ يگىلىككە كەنەلەتىن ءارى دۇنيە جۇزىنە پايدالى كەلىسىمگە ەرتەرەك قول جەتكىزۋگە قۇلشىنۋىن ءۇمىت ەتەمىن. 
  شي جينپيڭ مىنانى باسا دارىپتەدى: كەلەر جىلى جۇڭگو مەن ا ق ش ديپلوماتيالىق قارىم - قاتىناس ورناتقاندىعىنىڭ 40 جىلدىعى. جۇڭگو جاق جۇڭگو - ا ق ش قارىم - قاتىناسىنىڭ دامۋىنا وسكەلەڭ ءمان بەرەدى، ا ق ش جاقتىڭ جۇڭگو مەن ا ق ش - تىڭ سەلبەسۋ، سىندارلى قارىم - قاتىناسىن دامىتۋدى قالايتىندىعىن القايدى، ا ق ش جاقپەن بىرگە جۇڭگو مەن ا ق ش قارىم - قاتىناسى دامۋىنىڭ 40 جىلدىق تاجىريبەلەرىن قورىتىندىلاپ، ەكونوميكا، ساۋدا، ەكى ەل ارمياسى، زاڭ اتقارۋ، ەسىرتكىگە تيىم سالۋ، جەرگىلىكتى ورىندار، گۋمانيتارلىق سياقتى سالالارداعى اۋىس - ءتۇيىس سەلبەستىگىن كۇشەيتىپ، كەلەلى حالىقارالىق جانە وڭىرلىك ماسەلەلەردە پىكىرلەسۋ مەن سايكەسۋدى ساقتاپ، ءبىر - ءبىرىنىڭ ماڭىزدى مۇددەسىن ءوزارا قۇرمەتتەپ، سايكەسۋدى، سەلبەسۋدى، ورنىقتىلىقتى نەگىز ەتكەن جۇڭگو - ا ق ش قارىم - قاتىناسىن ىلگەرىلەتىپ، ەكى ەل قارىم - قاتىناسى دامۋىنىڭ ەكى ەل حالقىنا جانە ءار ەل حالقىنا اناعۇرلىم تاماشا باقىت جاراتۋىنا مۇمكىندىك جاساۋ كەرەك. 
  ەكى ەلدىڭ مەملەكەت باسشىلارى چاۋشيان تۇبەگى جاعدايى سياقتى ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر الماستىردى. شي جينپيڭ جۇڭگو جاقتىڭ چاۋشيان مەن ا ق ش ەكى جاقتىڭ ۇزدىكسىز كەلىسسوز وتكىزۋىن ءارى قول جەتكىزگەن بەلسەندى جەتىستىكتەرىن قولداپ - قۋاتتايتىندىعىن قايتالاي دارىپتەدى. 

بەرىپ كەت ورامالىڭدى

دوستار

الىستاعى اق ەركە