جاڭا حابارلار

بيىلعى شينجياڭ ساياحاتى دابىرالى باستالىپ، كورنەكتى ناتيجە جاراتىلدى

    كەلۋ قاينارى: شينجياڭ حالىق راديو ىستانسياسى    2019-02-11 11:13:22  
ستانسيامىزدىڭ ءتىلشىسى جين لەي، ەرىكتى ءتىلشى ۋاڭ جيڭرۋ، ءلاززاتتاردىڭ حابارى: 2019-جىلعى شينجياڭ ساياحاتى دابىرالى باستالىپ، 2018-جىلعى جوعارى قارقىندى دامۋ تەبىنىن جالعاستىردى. ۇعىسۋعا قاراعاندا، 2018-جىلى 11-ايدان 2019-جىلى 1-ايعا دەيىن، شينجياڭنىڭ ەلىمىزدىڭ ءىشى-سىرتىنان قابىلداعان ساياحاتشى سانى 11 ميلليون ادام رەتتەن اسىپ، الدىنداعى جىلدىڭ وسى مەزگىلىنەن %50 تىڭ ۇستىندە ارتقان.
شاعان مەرەكەسى كەزىندە، رايونىمىزدىڭ جەر-جەرىندەگى شاڭعى الاڭدارىندا ادامدار سەڭدەي سوعىلىسىپ، قىسقى كۇن نۇرىنىڭ شۋاعىنا شومىپ،قار-مۇزدىڭ ءلاززاتىنا باتتى. شينجياڭ جىبەك جولى حالىقارالىق دەمالىس ورنىندا شاڭعى تەبۋ اۋەسكەرلەرى شاڭعى جولىندا جۇلدىزداي اقتى. شانشيدىڭ شي-ان قالاسىنان كەلگەن شاڭعى اۋەسكەرى ياڭ دۇڭ: «مەن ءار جىلى وسى اراعا كەلەمىن، بۇل ارانىڭ قارىنىڭ ساپاسى جاقسى، كورىنىسى كوركەم، سونىمەن بىرگە كۇن جىلى، تاعامى دا ءدامدى. شاعاندى وسى ارادا وتكىزۋدە كەرەمەت. كوپشىلىك ءبىر ارادا باس قوسىپ، شاتتىققا شومدىق»،-دەدى.
شينجياڭ جىبەك جولى حالىقارالىق دەمالىس ورنىنىڭ ورىنباسار باس مەڭگەرۋشىسى حۋاڭ حى: «2019-جىلعى شاعان مەرەكەسىنىڭ ۇزاق دەمالىسىندا قابىلداعان جالپى ساياحاتشى 90 مىڭ ادام رەتكە جەتىپ، 2018-جىلعى شاعان مەرەكەسىنىڭ ۇزاق دەمالىسىنداعىنىڭ ەكى ەسەسىندەي بولدى، باسقا جەردەگى كوپتەگەن ساياحاتشى شينجياڭعا كەلىپ شاڭعى تەۋىپ شاعان وتكىزىپ، ولاردىڭ سانى دا ادەتتەگىدەن %50 ارتتى»،-دەدى.
ساناققا قاراعاندا، 2019-جىلى شاعان مەرەكەسى دەمالىسى كەزىندە تۇتاس رايونىمىز قابىلداعان ساياحاتشىلار جيىنى 3 ميلليون 11 مىڭ 700 ادام رەتكە جەتىپ، بىلتىرعى ۇقساس مەزگىلدەگىدەن %71.33 ارتسا، ساياحات جالپى كىرىسى 3 ميلليارد 616 ميلليون يۋان بولىپ، بىلتىرعى ۇقساس مەزگىلدەگىدەن %74.42 ارتقان.
ءۇرىمجى نانشان شاڭعى الاڭىنان اۋات اۋدانى دولان تايپاسىنا دەيىن، قاناس پەن قومداعى كوركەم قارلى اۋىلدان باعىراش كولىنە دەيىن، جەر-جەردىڭ قىسقى ساياحاتى قىزۋ ورلەۋگە كوتەرىلدى. كۇنەس اۋدانىنىڭ نارات كورىنىس وڭىرى قىستا سىرتقا تۇڭعىش رەت اشىلىپ، بۇرىنعى تىم-تىرىس قارلى القاپ وسى قىستا دىر-دۋمانعا بولەندى. نارات كورىنىس وڭىرى جوسپارلاۋ-ساتۋ ورتالىعىنىڭ مەڭگەرۋشىسى دۇڭ حۋا بىلاي دەدى: «بۇل نارات كورىنىس وڭىرىنىڭ قىسقى ساياحات جاعىندا ىزدەنۋى جانە سىناق جاساۋى، بۇل جەردىڭ قىسىنىڭ توتەنشە كوركەم كورىنىسىنەن تىس، اۋەلى وسى ارادا وتكىزىلگەن ات ۇستىندەگى ويىندار، ۇلتتىق سالت-سانا، مالشىلار تۇرمىسى كوپتەگەن دوستارعا تەرەڭ اسەر قالدىردى. 1-ايدىڭ سوڭىنا دەيىن ناراتتىڭ بيىل قىستا قابىلداعان ساياحاتشى سانى 25 مىڭ ادام رەتتەي بولىپ، قىسقى ساياحاتتا كورنەكتى ناتيجە جاراتتى».
التاي ايماعى «ادامزاتتىڭ بايىرعى قار شاڭعى مەكەنى»، «جۇڭگونىڭ قار قالاسى» ايگىلى ماركاسىن جاراتىپ، ساياحاتشىلار تاماشا قار كورىنسى مەن قويۋ ۇلتتىق سالت-ساناعا ءتانتى بولىپ، كورىنىس ءوڭىرىنىڭ باۋراۋ قۋاتى بارعان سايىن كۇشەيدى. قاناس كورىنىس وڭىرىنە بارىپ ساياحاتتاعان گۋاڭدۇڭدىق ساياحاتشى فان حانىم: «بەينە ەرتەگى الەمىنە كەلگەندەيمىن، شىنىندا وتە كەرەمەت، كەلگەننەن كەيىن كەتكىم كەلمەي قالدى. قار كورىنسى مەن تاۋ-تاسى بەينە سىزعان سۋرەتتەي ەكەن، قاراساڭ كوزىڭ تويمايدى»،-دەدى.
بيىل قىستا رايونىمىز ساياحاتىنىڭ ونىمدىلىگى كورنەكتى، تابىسى مول بولدى. بايىنعولىن موڭعۇل اۆتونوميالى وبلىسى ساياحات جانە مادەنيەت، دەنە تاربيە، ءدامدى تاعامدار سياقتىلاردى توعىستىرا ءتۇسىپ، بايىنبۇلاق قار-مۇز نادامى، باعىراش كولىندە كونكي تەۋىپ، قاردا ويناپ شاعاندى قۇتتىقتاۋ، قىستا كوكونىس تەرۋ سياقتى قيمىلداردى وتكىزدى، 2018-جىلى 11-ايدان 2019-جىلى 1-ايعا دەيىن بايىنعولىن وبلىسىنىڭ جالپى قابىلداعان ساياحاتشى سانى ءبىر ميلليون 710 مىڭ ادام رەتكە جەتىپ، ساياحاتتان كىرگەن جالپى كىرىس 940 ميلليون يۋان بولدى. التاي ايماعى ىلگەرىندى-كەيىندى 13-كەزەكتى شينجياڭ قىسقى ساياحات كاسىبى ساۋدا كورمەسى، بۋرىلتوعاي قسىقى بالىق اۋلاۋ مەرەكەسى، بۋىرشىن سۇڭگى مەرەكەسى، كوكتوعاي اۆتوكولىكتىڭ الاڭداعى جۇلدەگە تالاسۋ جارىسى، التاي قالاسى قار-مۇز كورىنىسىن تاماشالاۋ، قاناس قار-مۇز مەرەكەسى سياقتى تارتىمدى قيمىلداردى وتكىزىپ، قار-مۇز ساياحاتى جەدەل دامىدى. التاي ايماقتىق مادەنيەت، دەنە تاربيە، راديو-تەلەۆيزيا جانە ساياحات مەكەمەسىنىڭ ورىنباسار باستىعى نيە پيڭ: «دۇنيە ءجۇزى بويىنشا ەڭ وزىق قىسقى قار-مۇز ساياحات بايلىعىنا سۇيەنىپ، التايدىڭ قىسقى ساياحاتىن ونان ارى جانداندىرىپ، وتكەن جىلى 10-ايدىڭ ورتا شەنىنەن بيىل 1-ايدىڭ 30-كۇنىنە دەيىن، جالپى ءبىر ميلليون 889 مىڭ ادام رەت ساياحاتشى قابىلداپ، ساياحات جالپى تۇتىنۋ مولشەرى ءبىر ميلليارد 990 ميلليون يۋان بولىپ، الدىنداعى جىلدىڭ وسى مەزگىلىنەن جەكە-جەكە %60.4 جانە %87.3 ارتتى»،-دەدى.

بەرىپ كەت ورامالىڭدى

دوستار

الىستاعى اق ەركە