جاڭا حابارلار

ۇزاق دەمالىستا رايونىمىز ەل ءىشى ساياحاتشىلارىنان 8 ميلليون 477 مىڭ ادام رەت قابىلدادى

    كەلۋ قاينارى: شينجياڭ حالىق راديو ىستانسياسى    2017-10-09 12:32:46  
ستانسيامىزدىڭ ءتىلشىسى جين لەي مەن ەرىكتى تىلشىلەر جاڭ حى، يۋان يان، لو ياڭشۋدەردىڭ حابارىن تىڭداڭىزدار: مەملەكەت مەرەكەسى مەن قاربىز مەرەكەسىنىڭ ۇزاق دەمالىسىندا، رايونىمىز ەل ءىشى ساياحاتشىلارىنان 8 ميلليون 477 مىڭ ادام رەت قابىلداپ، ساياحات جاعىنداعى جالپى تۇتىنۋ 11 ميلليارد 260 ميلليون يۋان بولىپ، تاعى دا تىڭ دەڭگەيگە جەتتى.
بيىلعى 1-قازان ۇزاق دەمالىسى قاربىز مەرەكەسىنە تۋرا كەلدى، 8 كۇندىك ۇزاق دەمالىس جەر-جەردىڭ ساياحاتشىلارىنىڭ ساپارعا شىعۋىنا جەبەۋشى بولدى. تيانشان بوعدا كولى، كوكتوعاي، قاناس، قاشقار كونە قالاسى سياقتى رايونىمىزدىڭ ايگىلى كورىنىس رايوندارىندا شينجياڭنان باسقا جەرلەردەن كەلگەن ساياحاتشىلار كورنەكتى ارتتى. تيانشان بوعدا كولى كورىنىس رايونى كۇزدەن قىسقى اۋىسۋ ساياحات ۇلگىسىن باستاپ، تۇنىق اۋا، تۇرلەنگەن كۇزگى كورىنىسى ارقىلى ساياحاتشىلاردىڭ نازارىن ايدىن كول مەن اسقار تاۋعا اۋداردى. شانشيلىق ساياحاتشى لەي باۋرۇڭ بىلاي دەدى: «بۇل جەردىڭ تاۋى وتە كوركەم، سۋى وتە تۇنىق، اۋاسى وتە تازا ەكەن، گۇل-شوپتەرىن قامتىعان تاۋ-تاستارى مەن كولدەرى كىسىنى وزىنە ەرىكسىز ءتانتى ەتەدى».
ۇزاق دەمالىستىڭ سوڭعى ەكى كۇنىندە تيانشان بوعدا كولى كورىنىس رايونىنا قار جاۋسا دا، ساياحاتشىلاردىڭ قىزعىندىلىعى باسىلمادى. 1-قازان ۇزاق دەمالىسىندا كورىنىس رايونى ساياحاتشىلاردان جيىنى 60 مىڭ ادام رەتتەن ارتىق قابىلداپ، ساياحات كىرىسى 36 ميلليون يۋان بولىپ، بىلتىرعى وسى تۇستاعىدان %30 كە تاياۋ ارتتى. وسى سياقتى وتتى القاپ تۇرپاندا دا ساياحات جوعارى ورلەۋگە كوتەرىلدى، يارعول كونە قالاسى، كارىز، يالقۇنتاحتىڭ بارىنەن قارا ءنوپىر ادامدار مەن قايشالىسقان كولىكتەردى كەزىكتىرۋگە بولادى. تۇرپان تۇڭ-ي ساياحات شەكتى جاۋاپكەرلىك سەرىكتەستىگى ساتۋ ءبولىمىنىڭ جاۋپتىسى تاجىگۇل وسمان بىلاي دەدى: «1-قازان كەزىندەگى 8 كۇنگى ۇزاق دەمالىستا، جۇيەمىزدەگى كورىنىس رايونى جيىنى 210 مىڭ ادام رەت ساياحاتشى قابىلدادى، مۇنىڭ ىشىندە، بىتىراندى ساياحاتشى %71 تىن يەلەدى، ءبىز تاعى حىنان، ىشكى موڭعۇل، چيڭداۋ سياقتى 3 جەردەن ارناۋلى پويەزبەن كەلگەندەردى قامتىعان جيىنى 3 مىڭ ادامدى قابىلدادىق. ءبىزدىڭ وسى 8 كۇنگى دەمالىستا قابىلداعان ساياحاتشىلارىمىزدىڭ ادام رەت سانى الدىنداعى جىلدا قابلداعان ادام رەت سانىمەن سالىستىرعاندا كوپ ارتتى».
وسى ۇزاق دەمالىستا، دەمالۋ، دەنساۋلىق ساقتاۋ تۇرىندەگى ساياحاتقا شىعۋشىلار كوپ بولدى. وڭىرلىك ساياحاتتىڭ دەمەۋىندە، اۋىل-قىستاق ساياحاتى شينجياڭداعى ساياحاتشىلاردىڭ قارسى الۋىنا ەرەكشە يە بولىپ، جەرگىلىكتى ورىننىڭ دەمالىس تۇرىندەگى ساياحات تۇتىنۋىنىڭ ارتۋىن جەبەدى. ءۇرىمجى قالاسىنىڭ تۇرعىنى حى حانىم ءۇشتۇرپان اۋدانىنىڭ سۋ ءۇستى جاسىل القاپ ديحاندار تاعامجايىنا كوڭىل كوتەرۋگە ارناۋلى باردى، ول: «تۋىس-تۋعان، دوس-جاراندارىمەن كوڭىل كوتەرۋگە، تاماشالاۋعا كەلدىم، بۇل جەردىڭ كورىنىسى وتە كوركەم ەكەن، كوڭىل-كۇيىم كوتەرىلىپ قالدى»،-دەدى. ديحاندار تاعامجايىنىڭ جاۋاپتىسى ما گوحۇي بىلاي دەدى: «ساياحاتشىلاردىڭ ادام سانى بۇرىنعى جىلدارداعىدان ءبىر ەسەنىڭ ۇستىندە ارتتى، ءار كۇنى ءبىر مىڭ 500 دەن ارتىق ساياحاتشى كەلەدى، قازىر كۇندىك كىرىسىمىز 10 مىڭ يۋاننان اسادى».
ساياحاتشىلاردىڭ تۇرلىشە قاجەتىن قاناعاتتاندىرۋ ءۇشىن، رايونىمىزدىڭ جەر-جەرىنىڭ ساياحات تاراۋلارى كورىنىستىك ساياحات، اۋىل-قىستاق ساياحاتى، ەكولوگيالىق ساياحات، دەربەس ساياحاتتاۋ نەمەسە ءوز كولىگىمەن ساياحاتتاۋ، قالا ماڭىنا ساياحاتتاۋ سياقتى ساياحاتتار ارقىلى دەمالۋ تۇرىندەگى ساياحات بازارىنىڭ مازمۇنىن مولايتتى. ىشكى ولكەنىڭ كوپتەگەن ساياحاتشىسى ايروپلان نەمەسە پويەزبەن شينجياڭعا كەلگەننەن كەيىن اۆتوكولىك جالداپ، ونى وزدەرى جۇرگىزۋدى تاڭداپ، ىشكەرىلەي ساياحاتتادى. سانشيلىق ساياحاتشى سۇن مىرزا مەن دوسى بۋىرشىننىڭ قىزىل جاپىراق ورمانىنىڭ تاماشا كورىنىسىن تاماشالاۋعا ارناۋلى كەلىپتى، ول بىلاي دەدى: «شينجياڭنىڭ بۋىرشىنىنداعى شۇڭقىرعا، بۇل جەردەگى قىزىل جاپىراق ورمانىن كورۋگە كەلدىم، كوز الدىما الدىمەن قىزىل كۇرەك تۇسپەن بويالعان تاماشا القاپ كورىندى، كورىپ قاتتى تاڭ قالدىم، كەيىن وتباسىمداعىلاردى، دوستارىمدى وسى جەرگە كوڭىل كوتەرۋگە، تابيعات سيلاعان كوركەمدىكتەن لازات الۋعا ەرتىپ كەلەمىن».

بەرىپ كەت ورامالىڭدى

دوستار

الىستاعى اق ەركە