جاڭا حابارلار

ءار قايسى ورىندار جولاۋشىلاردىڭ ساپارعا ءساتتى اتتانۋىن قامتاماسىز ەتۋگە بەلسەنە سايكەستى

    كەلۋ قاينارى: شينجياڭ حالىق راديو ىستانسياسى    2018-02-14 11:57:46  
ستانسيامىزدىڭ ءتىلشىسى جين لەيدىڭ حابارىن تىڭداڭىزدار: شاعان مەرەكەسى بايلانىسىمەن، 13-اقپان رايونىمىزدىڭ تەمىر جول، تاسجول تاراۋلارى شاعاننىڭ الدىنداعى جولاۋشىلاردىڭ قاۋرت مولايعان كەزىن قارسى الدى، ءار قايسى ورىندار جولاۋشىلاردىڭ ساپارعا ءساتتى اتتانۋىن قامتاماسىز ەتۋگە بەلسەنە سايكەستى.
ءۇرىمجى ۆاگزالىندا، ۇلكەندى-كىشىلى سومكالارى مەن بۋىنشاق-تۇيىنشەگىن كوتەرگەن جولاۋشىلار لەگى پويەزگە وتىرۋعا اعىلدى. ءتىلشى پويەز ۆاگزالىنىڭ بەلەت ساتۋ زالىنان، بەلەت ساتىپ الۋعا جانە بەلەت شىعارىپ الۋعا كەلگەن جولاۋشىلاردىڭ كوپ ەمەس ەكەنىن، ال بىرنەشە كۇننەن بەرى شينجياڭنىڭ ءىشى-سىرتىنا قاتىنايتىن پويەز بەلەتتەرىنىڭ تاقا تاۋسىلىپ تا كەتپەگەنىن بايقادى. جولاۋشى تاڭ حۇڭليڭ تالەيى وڭىنان كەلىپ، بۇراتالاعا قايتاتىن پويەزعا ەكى بەلەت ساتىپ الدى، ول بىلاي دەدى: «بۇگىن تۇستەگى پويەزدىڭ بەلەتى قالماعان سوڭ، كەشكى پويەزدىڭ قاتتى ورىندىق بەلەتىن ساتىپ الدىم، ادام وتە كوپ ەكەن، قاتتى ورىندىق بەلەتى دە از قالىپتى، ءسال كەشىكسەم بەلەت قالماي قالادى ەكەن، بەلەتتى العانىما قاتتى قۋانىپ تۇرمىن». جولاۋشى جاڭ رۇي اتا مەكەنى سىچۋانعا قايتپاق ەكەن، ول بەلەتتى ءبىر ايدىڭ الدىندا توراپتان ارەڭ الىپتى، ول بىلاي دەدى : «بىرنەشە كۇن جاعالاسىپ ارەڭ الدىم، تاڭەرتەڭ دە، تۇستە دە، كەشتە دە توراپقا شىعامىن، ءتىپتى تاڭ بوزىنان ساعات قوڭىراۋىن تۋرالاپ قويىپ، بەلەت ساتىپ الۋ ورايىن كۇتكەن كەزدەرىم دە بولدى».
ۇعىسۋعا قاراعاندا، بىرنەشە كۇننەن بەرى، تەمىرجولدىڭ قىسقا ارالىققا قاتىنايتىن جولاۋشىلار سانى كورنەكتى ارتقان. وسى سەبەپتى، ءۇرىمجى ۆاگزالى مەن ءۇرىمجى وڭتۇستىك ۆاگزالى بىردەي اۆتوماتتى بەلەت شىعارۋ ماشيناسىن كوبەيتۋ، ايالداماعا جەدەل كىرۋ ءدالىزىن كوبەيتىپ اشۋ سياقتى توتەپ بەرۋ شارالارىن قولداندى. ءۇرىمجى ۆاگزالىنىڭ جولاۋشى تاسىمالىنا جاۋاپتى كەزەكشىسى ۋ حايتاۋ بىلاي دەدى: «سولتۇستىك شينجياڭداعى شىحىزى، كۇيتۇن، قارامايلى، وڭتۇستىك شينجياڭداعى كورلا، اقسۋ باعىتىنا قاتىنايتىن پويەزداردىڭ بەلەتى وتە تاپشى. شاعاننىڭ الدىنداعى ايالداماعا كىرەتىندەردىڭ قاۋىرت مولاياتىن كەزىن ەسكەرىپ، حاۋىپسىزدىكتى تەكسەرۋ ءدالىزىن، بەلەت ساتۋ تەرەزەسىن كوبەيتىپ، جولاۋشىلاردىڭ ۆاگزالعا الدىن الا كىرىپ، بەلەت الىپ، پويەزگە تەز شىعۋىنا قولايلىلىق جاراتتىق».
بۇدان سىرت، رايونىمىزدىڭ تاسجول جولاۋشى تاسىمالى دا شاعاننىڭ الدىنداعى جولاۋشىلاردىڭ قاۋرت مولاياتىن كەزىن قارسى الدى، جەر-جەردىڭ قاتىناس تاراۋلارى تاسىمال كۇشىن دەر كەزىندە كوبەيتىپ، ءار ۇلت جولاۋشىلارىنىڭ اۋىلىنا ۋاعىندا قايتۋىن قامتاماسىز ەتتى. ءۇرىمجى نيانزىگۋ جولاۋشى تاسىمال بەكەتىندە، كوپتەگەن جولاشى توراپ ارقىلى بەلەت ساتىپ العاندىقتان، بەلەت ساتۋ زالىندا ادام شوعىرى ونشا كوپ بولمادى، ءتىلشى، جولاشى ليۋ چيانكۇننەن: «قايدا باراتىنىن، بەلەتتى قالاي ساتىپ العانىن، سۇراپ ەدى، ول : «ساۋانعا بارامىن، بەلەتتى كوپ قينالماي ساتىپ الدىم، باس اياعى 10 مينۋتتا الىپ بولدم»، ــ دەدى. قازىر، جولاۋشىلاردىڭ جەر ـ جەردىڭ ارناۋلى لەنياعا قاتىنايتىن اۆتوكولىكتەرىنە وتىرۋ مولشەرى دە كورنەكتى جوعارىلادى. شوفەر جاڭ يانبيڭ ءدوربىلجىن مەن ءۇرىمجى ارالىعىنا قاتىنايتىن ارناۋلى لەنيا اۆتوكولىگىنىڭ شوفەرى، وسى كەز ونىڭ ەڭ قاربالاس شاعى، ول بىلاي دەدى: «بۇرىن جولاۋشى ەكى اۆتوكولىككە تولمايتىن، قازىر 5، 6 اۆتوكولىك جەتىسپەي قالاتىن بولدى، شاعاندى ۇيىندە وتكىزۋگە قايتقان جولاۋشىلار ەرەكشە كوپ، سول سەبەپتى ءبىز ساياحات اۆتوكولىگى مەن بوس اۆتوكولىكتەردىڭ ءبارىن ىسكە قوستىق».
قازىر، ۇرىمجىدەن شاۋەشەك، بۇراتالا سياقتى باعىتتارعا قاتىنايتىن جولاۋشىلار ۇزدىكسىز مولايدى، بۇل جونىندە جولاۋشى تاسىمال تاراۋلارى دا تاسىمال كۇشىن شۇعىل كوبەيتىپ، جولاۋشى قىسىمىن باسەڭدەتتى. ءۇرىمجى نيانزىگۋ جولاۋشى تاسىمال بەلەتىنىڭ كەزەكشى بەكەت باستىعى پاڭ حۇڭ بىلاي دەدى: «13-، 14-اقپان كۇندەرى شاعاننىڭ الدىنداعى جولاۋشىلار ەڭ كوپ بولاتىن مەزگىل، وسى رەت مەجەمەن 5 مىڭ ادامنان اساتىن كورىنەدى. قازىر كولىككە وتىراتىن جولاۋشىلاردىڭ بەلەتتى الدىن الا الۋىنا بولادى، ءبىز جولاۋشى مولشەرىنە ساي جولاۋشىلار اۆتوبۋسى رەت سانىن كەز-كەلگەن ۋاقىتتا كوبەيتەمىز، شاۋەشەك قالاسى، ءدوربىلجىن اۋدانى، شاعانتوعاي اۋدانىنا تۇگەلدەي 2 دە 3 اۆتوبۋس كوبەيتىپ جۇرگىزدىك».

بەرىپ كەت ورامالىڭدى

دوستار

الىستاعى اق ەركە